<Apocalipsis 16

[1] Saypitanami wiyarqä jana pasacho kaykaq templupita qanchis angilkunaman sinchipa qayakur nikaqta: “Sararäyashqayki cöpakunapita Tayta Diospa castïgunta pasaman tikwayämuy”.

[2] Sayno niptinmi punta kaq ángel sararashqan cöpacho kaykaq castïguta pasaman tikwamurqan. Saymi anticristupa señalninwan señalash kaqkunata y ïdulunta adoraqkunata qeri pasaypa usharqan. Say qeriwanmi fiyupa nakayarqan.

[3] Ishkay kaq angilnami sararashqan cöpacho kaykaq castïguta lamarman tikwamurqan. Saymi yawarman lamar tikraptin saycho kaqkunaqa lapan wanuyarqan.

[4] Kimsa kaq angilnami sararashqan cöpacho kaykaq castïguta lapan mayukunaman y pukyukunamanpis tikwamurqan. Saymi mayupis pukyupis yawarman tikrarqan.

[5] Saypitanami wiyarqä yakupaq munayyuq kaykaq ángel kayno nimuqta: “Runakunata sayno castigar alitami ruraykanki, [Tayta Dios]. Unaypita pasami imayyaqpis kaykanki. Qamqa santumi kaykanki.

[6] Qamman yärakuqkunatapis y profëtaykikunatapis wanusirmi yawarninta jichayarqan. Saymi kikinkunapis yawarta upuyänanpaq yakuta yawarman tikrasishkanki”.

[7] Saynöpis wiyarqä jana pasacho kaykaq altarpita kayno nimuqta: “Lapanpaq munayyuq Tayta Dios, alimi juzgaykanki”.

[8] Chusku kaq angilnami sararashqan cöpacho kaykaq castïguta intiman tikwarqan. Saymi inti fiyupa shanaptin runakuna pasaypa nakayarqan.

[9] Sayno nakarpis Tayta Diosta manami adorayarqansu ni jusalikuytapis wanakuyarqansu. Saypa trukanqa castigashqanpitami Tayta Diospa contran imaykatapis parlayarqan.

[10] Pisqa kaq angilnami sararashqan cöpacho kaykaq castïguta anticristupa trönunman tikwamurqan. Saymi anticristo mandashqan lapan markakuna sakakäkuyarqan. Runakunanami nanaywan qalluntapis kaniyarqanraq.

[11] Qeri qeshyawan pasaypa nakarmi Tayta Diospa contran imaykatapis rimayarqan. Sayno nakaykarpis y qeri ushaykaptinpis jusalikuykunata manami wanakuyarqansu.

[12] Soqta kaq angilnami sararashqan cöpacho kaykaq castïguta Éufrates jatun mayuman tikwamurqan. Saymi mayu sakiskirqan inti jeqamunan kaqpita shamuq reykuna soldädunkunawan päsayämunanpaq.

[13] Saypitanami rikarqä säpu niraq kimsa supaykunata. Say supaykunami yarqayämurqan dragonpa shiminpita, anticristupa shiminpita y lula profëtapa shiminpitapis.

[14] Say kimsa supaykunaqa milagrukunatapis rurayarqanmi. Maysaypapis aywarmi reykunata y soldädunkunata shuntayarqan lapanpaq munayyuq Tayta Dios juzganan junaq pelyayänanpaq.

[15] “Mana musyayashqayki hörami suwano elaqpita shamushaq. Kushishqami kayanqa mödanashla rikaq rikaqla shuyakamaqkunaqa. Kutimur kamarikünita tariptï qarapächunöla karmi pasaypa penqakuyanki”.

[16] Saypitami say kimsa supaykuna lapan reykunata soldädunkunatawan juk pasaman shuntayarqan. Hebreo idiömacho say pasapa jutin kaykan Armagedónmi.

[17] Qanchis kaq angilnami sararashqan cöpacho kaykaq castïguta wayraman tikwamurqan. Saymi [jana pasacho kaykaq] templupita y Diospa trönunpita sinchipa kayno nimuqta wiyarqä: “¡Kananqa lapanpis cumplishnami kaykan!”

[18] Sayno nimuptinmi asikyaypa asikyar elqukuy rikakämurqan y maqakuy bunrurumushqanpis wiyakämurqan. Pasapis fiyupami suksukyarqan. Runakunata Tayta Dios kamashqanpita pasa manami imaypis sayno suksukyarqansu.

[19] Jatunkaray Babilonia markacho taq runakuna jusalikuyashqanpitami cöpa junta winaraykaq rabyayninta Tayta Dios upusir fiyupa castigarqan. Sayno castigaptinmi say marka kimsaman rachikarqan. Wakin markakunanami pasaypa juchur ushakäyarqan.

[20] Lapan islakunapis y jirkakunapis elaqaskiyarqanmi.

[21] Jana pasapitami chusku arröbano jatusaq runtu tamya tamyamurqan. Say runtu tamyawan nakarmi runakuna imaykatapis Tayta Diospa contran rimayarqan.