<Apocalipsis 8

[1] Röllucho qanchis kaq laqaraykaq cërata Carnish jorquriptinmi jana pasacho pulan hörano pipis parlakurqansu.

[2] Nirkurnami Tayta Diospa nawpancho qanchis angilkuna ichiraykäyaqta rikarqä. Paykunami cada ünun cornëtata chaskiyarqan.

[3] Saypitanami Tayta Diospa trönun nawpancho kaykaq altarman juk ángel charqan inciensu qoshnisikunan aptash. Altarpis inciensu qoshnisikunanpis qoripitami karqan. Saychömi aska inciensuta chaskirqan Diosman yärakuqkuna manakuyashqantawan altarman churananpaq.

[4] Altarcho rupasiptinmi yärakuqkuna manakuyashqanpis y inciensupa qoshtayninpis Tayta Diosman charqan.

[5] Say angilmi inciensu qoshnisikunanman altarcho kaykaq shanshata winarkur kay pasaman jitaramurqan. Saymi asikyaypa asikyar elqukurqan, maqakuypis seqaypami bunrurumurqan y pasapis fiyupami suksukyarqan.

[6] Saypitanami cornëtata chaskiq qanchis angilkuna tukayänanpaq kamarikuyarqan.

[7] Punta kaq ángel cornëtata tukamuptinmi ninawan yawar talush runtu tamya pasaman tamyarqan. Saywanmi cäsi pulan pasa rupar ushakarqan. Say runtu tamya chashqan kaqqa jachapis qewapis lapanmi ushakäyarqan.

[8] Saypita ishkay kaq ángel cornëtata tukamuptinmi jatunkaray jirkano rupaykar lamarman kuchparqan. Saymi cäsi pulan lamar yawarman tikrarqan.

[9] Yawarman tikrashqan kaqchöqa lapanmi wanuyarqan. Saynölami saycho kaykaq büquikunapis talpukar ushakäyarqan.

[10] Kimsa kaq ángel cornëtata tukamuptinmi jatunkaray rupaykaq qoyllar shikwamurqan. Say qoyllarmi cäsi pulan mayukunaman y cäsi pulan pukyukunaman charqan.

[11] Qoyllarpa jutinmi karqan Ayaq. Ayaq kaptinmi say qoyllar chashqan kaq yakuqa ayaq rikakurqan. Say yakuta upuq kaqkunaqa saysikami wanuyarqan.

[12] Chusku kaq ángel cornëtata tukamuptinmi intipis killapis qeshyarqan. Saymi intipis ni killapis shumaq asikyarqannasu. Saynölami cäsi pulan qoyllarkunapis chipipïyarqannasu.

[13] Saypitanami rikarqä juk anka junaqpa tumaykaqta. Say hörami wiyarqä say anka sinchipa kayno nimuqta: “¡Wawalaw, wawalaw, wawalaw! Pasacho kawaqkuna ¡imanöraq kayanqa! ¡Kimsaraqmi angilkuna cornëtata tukayämunan pishin!”