Apocalipsis 14
[1] Saypitanami rikarqä Sión lömacho Carnish ichiraykaqta. Paypa nawpanchömi pachak chusku chunka chusku waranqa (144,000) runakuna kaykäyarqan. Paykunapa urkunkunachömi Carnishpa jutin y Carnishpa Taytanpa jutin qelqaraykarqan.
[2] Jana pasapitami wiyakämurqan aska yaku raqrapa bunyaypa bunyar aywaqno y maqakuy bunruruqno. Saynöpis saysika arpakunata tukayämushqannömi wiyakämurqan.
[3] Sayqa karqan mushuq alabanzata cantayashqanmi. Sayta cantayarqan Tayta Diospa trönun nawpancho, chusku kawaykaqkunapa nawpancho y saycho kaq ishkay chunka chusku (24) mayor runakunapa nawpanchömi. Wakin runakuna manami say alabanzata yachakuyta kamäpakuyarqansu. Saypa trukanqa say pachak chusku chunka chusku waranqa (144,000) salvash runakunalami yachayarqan.
[4] Paykunaqa warmiwan mana kakuq runakuna karmi doncëlla jipashno püru kaykäyan. Imano nakarpis Carnish munashqannömi kawayarqan. Paykunata salvarqan Tayta Diospaq y Carnishpaq primiciano kayänanpaqmi.
[5] Imaypis mana lulakur jusaynaqmi kaykäyan.
[6] Saypitanami rikarqä juk ángel junishpa pajaykaqta. Paymi mana ushakaq ali wilakuyta apamurqan. Say wilakuy kaykan maysay nación runakunapaq, maysay trïbu runakunapaq, ima idiömata parlaqkunapaq y maysaycho taq runakunapaqmi.
[7] Say angilmi sinchipa nimurqan: “¡Tayta Diosta mansapakur payta alabayay! ¡Höra chämushnami lapan runakunata juzgananpaq! ¡Jana pasata, kay pasata, lamarta y pashtaq yakukunatapis kamaq Tayta Diosta adorayay!”
[8] Say angilpa qepanta juk angilpis aywarmi nirqan: “¡Ushakashnami, ushakashnami jatunkaray Babilonia marka! ¡Babiloniami vïnuwan shinkäsiqnöpis lapan nación runakunata mana ali costumbrinkunata yachasirqan!”
[9] Say angilpa qepantanami mas juk angilpis aywar sinchipa nirqan: “Mayqanpis anticristuta y ïdulunta adorar señalninta urkunman o makinman churasikuq kaqkunataqa
[10] cöpa junta winaraykaq rabyaynintami Tayta Dios mana kuyapaypa upusinqa. Carnish y santu angilninkunapis rikaykäyaptinmi say runakuna azufrintin nina rataykaqcho rupar nakayanqa.
[11] Paqasta junaqta mana upiypa rupaptinmi imaypis qoshtay sharkunqa. Saynölami anticristuta y ïdulunta adorar señalninta churasikuqkunapis paqasta junaqta nakayanqa”.
[12] Say ángel nishqanno kananpaq kaykaptinqa Jesucristuman yärakuqkuna Tayta Diospa mandamientunkunata cäsukur mana ajayaypa payman yärakuyäsun.
[13] Saypitanami wiyarqä jana pasapita kayno nimuqta: “Kay nishqäta qelqay: ‘Kananpitaqa Jesucristuman yärakuykar wanuqkuna kushishqami kayanqa’ ”. Santu Espïritupis nirqan: “¡Aw, paykunaqa mananami nakayanqanasu, sinöqa jawkanami kawayanqa! Payman yärakur alita rurayashqankunata Tayta Dios manami qonqanqasu”.
[14] Rikärishqächömi rikarqä yuraq pukutay janancho runapa surin niraq jamaraykaqta. Paymi kaykarqan qori coronash y afilash ösin aptash.
[15] Saypitanami jana pasacho kaykaq templupita juk ángel yarqaskamur pukutay janancho jamaraykaqta sinchipa nirqan: “¡Cosëcha poquraykannami! ¡Cosechanaykipaq tiempu chämushnami! ¡Ösikita aptakurkur cosechamunaykipaq ayway!”
[16] Sayno niptinmi pukutay janancho jamaraykashqanpita shamur ösinta aptakurkur kay pasacho runakunata shuntamurqan.
[17] Saypitanami mas juk ángel jana pasacho kaykaq templupita ali afilash ösin aptash yarqamurqan.
[18] Altarcho kaykashqanpitanami yapay mas juk angilpis yarqamurqan. Paymi altarcho nina kawasiq karqan. Say angilmi ösin aptash kaq angilta sinchipa qayakur nirqan: “¡Üva poquraykannami! ¡Ösikiwan lapanta shuntamuy!”
[19] Sayno niptinmi say ángel ösinwan kay pasacho üvata shuntarqan. Shuntarkurnami üvata jarukunan jatunkaray pözuman winarqan. Say pözuqa Tayta Diospa rabyayninmi kaykan.
[20] Markapita jukläman jorqurirmi üvata jaruqno runakunata wanusirqan. Runakunapa yawarninmi cawallupa shiminman töpaq altuyaq y soqta chunka (60) lëwayaq aywarqan.