<Apocalipsis 10

[1] Saypitanami rikarqä munayyuq ángel pukutaycho jana pasapita uraykämuqta. Uman jananchömi seqyaw ichiraykarqan. Qaqlanpis intinömi chipipirqan. Chankankunapis junishta nina sharkuqnöraqmi karqan.

[2] Kicharaykaq taksha röllun aptashqami shamurqan. Aluq kaq chakinmi lamarman jarurarqan y isuq kaq chakinnami pasaman jarurarqan.

[3] Paymi leonnöraq seqaypa qapararqan. Sayno qaparaptinmi maqakuykunapis qanchis kuti bunrurumurqan.

[4] Say qanchis maqakuykuna bunrurumur nishqankunata qelqayta munaptïmi jana pasapita nimarqan: “Say wiyashqaykita ama qelqaysu. Imata niyämushqantapis ama pitapis wilapaysu”.

[5] Saymi lamarcho y pasacho ichiraq ángel aluq kaq makinta jana pasaman joqarirqan.

[6] Sayno joqarkurmi jana pasatapis, kay pasatapis, lamartapis kamaq y imayyaqpis kawaq Tayta Diospa jutincho jurar nirqan: “¡Tayta Dios mananami mas shuyanqanasu!

[7] ¡Qanchis kaq ángel cornëtata tukayta qalaykuptinmi lapantapis Tayta Dios cumplir qalaykunqa! ¡Lapanpis päsanqa sirviqnin profëtakunawan wilashqannölami!”

[8] Saypitanami jana pasapita yapay nimarqan: “Lamarta y pasata jaruraykaq angilman ayway kicharaykaq rölluta chaskinaykipaq”.

[9] Sayno nimaptinmi ángel kaqman aywar say rölluta manakurqä. Saymi ángel nimarqan: “Kay rölluta mikuy. Mikuptiki abëjapa mishkinnömi mishkinqa. Pachaykichömi isanqa seqaypa ayanqa”.

[10] Rölluta chaskirkurmi mikurqä. Mikuptïmi shimïcho abëjapa mishkinnöraq mishkirqan. Pachächönami seqaypa ayarqan.

[11] Mikuskiptïmi nimarqan: “Runakunata ima päsananpaq kaqkunata yapay wilakuy. Tayta Dios nishqannölami runakunata päsanqa pï casta kayaptinpis, may nacionpita kayaptinpis, ima idiömata parlayaptinpis y rey kayaptinpis”.