Apocalipsis 2
[1] “Éfeso markacho kaykaq iglesiapa angilninpaq kay nishqäta qelqay: Noqami aluq kaq makïcho qanchis qoyllarkunata sararaykä. Qoripita rurash qanchis candelabrukunapa chawpinchömi purï.
[2] “Noqa rikaykämi imaypis yärakamur lapan rurayashqaykikunata. Lutan yachasikuqkunata manami chaskipäyashkankisu. Apóstol tukuqkuna lutanta yachaykäsiqtami taripäyashkanki.
[3] Yärakayämushqaykipita nakasiyäshuptikipis mana ajayaypami munashqäno kawaykäyanki.
[4] “Isanqa manami gustamansu nawpata kuyakuq kayashqayki qajakashqan.
[5] Puntata kuyakuq kayashqaykino kananpis kuyakuq kayay. Sayno mana kayaptikiqa [elaqpita] shamurmi nawpaykicho kaykaq candelabruykita jorqurishaq.
[6] “Sayno karpis nicolaíta runakunapa costumbrinkunata mana chaskipäyashpayki alitami ruraykäyanki. Paykuna yachasiyashqankunata manami wiyaytapis munäsu.
[7] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun. Imano nakarpis mana ajayaypa yärakamuqkunataqa Tayta Diospa nawpancho imayyaqpis kawasikuq jachapa wayuynintami qarashaq”.
[8] “Esmirna markacho kaykaq iglesiapa angilninpaq kay nishqäta qelqay: Noqami qalaykunan y ushanan kaykä. Wanushqäpitapis kawarimushkämi.
[9] “Noqa rikaykämi [lapan rurayashqaykikunata,] nakaykäyashqaykita y pobri kayashqaykitapis. Pobri karpis rasunpaypa rïcunömi kaykäyanki. Saynöpis wiyaykämi washaykita rimaykäyashqanta. Washayki rimaq runakunaqa ‘Tayta Dios kuyashqan Israel runami kayä’ nikarpis Satanás munashqantami ruraykäyan.
[10] “Nakaykuna qamkunaman chaykämunnami. Sayno kaptinpis ama mansakäyaysu. Diablumi qepaman kutiyänaykita munar wakinnikita carcilman wichqasiyäshunki. Saychömi chunka junaq nakayanki. Sayno kaptinpis wanuyashqaykiyaq mana ajayaypa noqaman yärakayämuy. Sayno kayaptiki corönatami qarayäshayki. Say corönaqa mana ushakaq kawaymi kanqa.
[11] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun. Imano nakarpis mana ajayaypa yärakamuqkunaqa manami nina qochaman qaykushsu kayanqa”.
[12] “Pérgamo markacho kaykaq iglesiapa angilninpaq kay nishqäta qelqay: Noqami ishkan lädunpa afilash espädä aptash kaykä.
[13] “Noqa rikaykämi [lapan rurayashqaykikunata y] markaykicho Satanáspa trönun kashqanta. Sayno kaptinpis mana ajayaypami noqaman yärakaykäyämunki. Wilakuynïta wilakuq Antipasta say markacho wanusish kayaptinpis mana qajakaypami yärakayämushkanki.
[14] “Isanqa ruraykäyashqayki juk ishkay manami gustamansu. Wakinnikikunami Balaam yachasishqanno lutanta yachaykäsiyanki. Pay shimita qoptinmi Balac jutiyuq runa Israel runakunata fiestankunaman qayasiyarqan ïdulukunapa jutincho pishtayashqan aysata mikuyänanpaq. Saynöpis runakunata yäsirqan fornicación jusata jusalikuyänanpaqmi.
[15] “Saynöpis wakinnikikuna nicolaíta runakunapa yachasikuynintami chaskiyashkanki. [Say yachasikuytaqa pasaypami melanä.]
[16] Sayno kaykaptinqa wanakuyashpayki say yachasikuykunata kachariyay. Mana kachariyaptikiqa qamkuna kaqman elaqpita shamur shimïpita yarqamuq espädawanmi ushakäsiyäshayki.
[17] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun. Imano nakarpis mana ajayaypa yärakamuqkunataqa jana pasacho churaraykaq maná mikuytami qarashaq. Saynöpis taksha yuraq rumitami qoykushaq. Say rumichömi mushuq jutin qelqaraykanqa. Say jutitaqa rumita chaskikuqkunalami musyayanqa”.
[18] “Tiatira markacho kaykaq iglesiapa angilninpaq kay nishqäta qelqay: Noqami Tayta Diospa Surin kä. Nawïpis ninanöraqmi asikyaykan. Chakïpis chipipiykaq broncipita rurashnömi kaykan.
[19] “Noqa rikaykämi lapan rurayashqaykikunata y pïmaywanpis kuyanakuyashqaykita. Saynöpis musyaykämi noqaman yärakayämushqaykita, yanapäkuq kayashqaykita y munashqäno imaypis kawayashqaykita. Unay sirviyämashqaykipita masmi sirviykäyämanki.
[20] “Isanqa manami alisu kaykan Jezabel lutanta yachasiptin mana michäyashqayki. Say warmiqa profetïsa tukurmi noqaman yärakamuqkunata criyisir yachaykäsin fornicación jusata jusalikuyänanpaq y ïdulukunapa jutincho pishtayashqan aysata mikuyänanpaq.
[21] Kananyaqnami shuyarashkä say warmi jusankunata wanakunanpaq. Saypis jusalikuyta manami kacharinsu.
[22] “Saymi payta qeshyawan castigashaq. Say warmi yachasishqanta chaskikuqkunatapis jusalikuyta mana wanakuyaptinqa fiyupami castigashaq.
[23] Paykunapa wamrankunatapis wanusishaqmi. Saynöpami noqaman yärakamuqkuna tantiyakuyanqa runakuna imata yarpäyashqantapis musyashqäta. Noqaqa imanöpis rurayashqanman tupumi pïmaytapis juzgashaq.
[24] “Wakinnikikunaqa say warmipa lutan yachasikuyninkunata manami chaskipäyashkankisu. ‘Mas alinnin kaq yachasikuyta yachakushun’ niptinpis say yachasishqankunaqa Satanáspitami kaykan. Saymi qamkunata kayno nï:
[25] Noqa yachasishqäkunata shamushqäyaq mana qonqaypa wiyakuyay.
[26] Imano nakarpis mana ajayaypa yärakamuqkunataqa nacionkunata munaynincho sararäyänanpaqmi churashaq.
[27] Mandanäpaq Taytä churamashqannömi paykunatapis mandaq kayänanpaq churashaq. Munayyuq karmi nacionkunata fiërru väranwan mandayanqa. Mitu mankata shaluriqnömi paykunata asulayanqa.
[28] Say mandaqkunata waraq qoyllartami qoykushaq.
[29] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun.