Apocalipsis 11
[1] Saychömi shoqushpita rurash värata ángel aptaparkamashpan nimarqan: “Jerusalénpa ayway Tayta Diospa templunta y altarta tupumunaykipaq. Nirkur yupamunki saycho adoraq runakunata.
[2] Templu waqtancho kaykaq patiuta isanqa ama tupumunkisu. Say patiuta kachariykushkä mana cäsukamaq runakuna munaynincho sararäyänanpaqmi. Paykunami chusku chunka ishkay (42) killa sagrädu Jerusalén markata munaynincho sararäyanqa.
[3] Say wisanmi ishkay wilakuqnïkunata noqa nishaq juk waranqa ishkay pachak soqta chunka (1,260) junaq wilakuynïta wilakuyänanpaq. Paykunaqa qachqa mödanankuna jatishqami wilakuyanqa”.
[4] Say ishkay wilakuqkunaqa kay pasata kamaq Tayta Diospa nawpancho kaykaq ishkay olïvukuna y ishkay candelabrukunami kaykäyan.
[5] Pipis paykunata wanusiyta munayaptinqa shiminkunapita nina yarqamurmi rupar ushanqa. Paykunawan churaqkunaqa saynömi wanuyanqa.
[6] Say ishkay wilakuqkunaqa munayyuqmi kayanqa tamyatapis mana tamyasiyämunanpaq, yakutapis yawarman tikrasiyänanpaq y munayashqan höra pestiwan runakunata ushakäsiyänanpaqpis.
[7] Tayta Dios munashqanno wilakuyninta wilakur ushaskiyaptinnami wanwanyaykaqpita anticristo yarqamur paykunapa contran sharkur wanusinqa.
[8] Wanusiptinmi ayankuna jatun markapa pläzancho jitaräyanqa. Say markachömi Señor Jesucristutapis wanusiyarqan. Say markapaqmi Sodomano y Egiptuno kashqanta niyan.
[9] Kimsa junaq pulanyaqmi maysay marka runakunapis, maysay trïbu runakunapis, ima idiömata parlaq runakunapis y maysay nación runakunapis wanush jitaraykäyaqta rikayanqa. Ayankunatapis pampayänanta manami kachapäyanqasu.
[10] Say wilakuqkuna aläpa rabyanäsish kayaptinmi runakuna kushikuyashpan regäluta jukninpis jukninpis qaranakuyanqa.
[11] Wanush jitaraykäyashqanpita kimsa junaq pulantami say ishkay wilakuqninkunata Tayta Dios kawarisimunqa. Sayta rikaqkuna lapanmi pasaypa mansakäyanqa.
[12] Kawarirkamurnami wiyayanqa “¡kayman shayämuy!” nir jana pasapita qayakamuqta. Chikiqninkuna rikaraykäyaptinmi pukutay rurinpa jana pasaman aywakuyanqa.
[13] Say höra pasa fiyupa suksukyaptinmi say markacho cada chunka wayipita juk wayi juchunqa y qanchis waranqa (7,000) runakuna wanuyanqa. Kawaykar quëdaqkunaqa pasaypa mansakashqami Tayta Diosta alabayanqa.
[14] Ishkay kaq nakay päsaptinpis juk masraqmi chämunanpaq kaykan.
[15] Qanchis kaq ángel cornëtata tukamuptinmi jana pasacho angilkuna sinchipa kayno niyämushqan wiyakämurqan: “¡Lapan nacionkunapis Señorninsi Tayta Diospa y Cristupa makinchönami kaykäyan! ¡Paymi imayyaqpis rey kanqa!”
[16] Saymi Diospa puntancho kaykaq ishkay chunka chusku (24) mayor runakuna trönunkunacho jamaraykäyashqanpita lätakuykur Tayta Diosta adorayashpan
[17] niyarqan: “Lapanpaq munayyuq Tayta Dios, qamtami agradëcikuyä. Unaypitami kaykanki, kananpis kaykankimi [y shamunaykipaqnami kaykanki]. Lapantami munaynikicho sararaykanki. Kanan qamnami mandayta qalaykushkanki.
[18] Nishqaykita wiyakuyta mana munarmi maysaychöpis runakuna fiyupa rabyanäyarqan. Kananqa kikikimi rabyakur wanushkunata juzganki. Tiempu chämushnami sirvishuqniki profëtakunata y qamman yärakur mansapakushuqnikikunata rïcu kayaptinpis pobri kayaptinpis premiuta qonaykipaq. Runa mayinta wanusiqkunataqa ushakäsinkimi”.
[19] Saymi jana pasacho kaykaq templu kichakaskiptin rikarqä saycho kaykaq Pactu Babulta. Elqukuypis, maqakuypis y runtu tamyapis fiyupami karqan. Kay pasapis fiyupami suksukyarqan.