<Apocalipsis 6

[1] Saychömi rikarqä röllucho punta kaq laqaraykaq cërata Carnish jorquqta. Jorquriptinmi nawpancho kaq chusku kawaykaqkunapita juknin maqakuynöraq qayakamur nimurqan: “¡Shamuy!”

[2] Sayno nimuptin rikärishqächömi yuraq cawalluta rikarqä. Loqaraqninmi flëchan aptash kaykarqan. Paymi corönata chaskirkur Tayta Diospa contran kaqkunata majaypa majar ushakäsinanpaq aywarqan.

[3] Röllucho ishkay kaq laqaraykaq cërata Carnish jorquriptinmi nawpancho kaq chusku kawaykaqkunapita juknin qayakamur nimurqan: “¡Shamuy!”

[4] Sayno nimuptinmi puka cawallu yarqamurqan. Loqaraqninmi jatun espädata chaskiskir runakuna chikinakur kikinpura wanusinakuyänanpaq aywarqan.

[5] Röllucho kimsa kaq laqaraykaq cërata Carnish jorquriptinmi nawpancho kaq chusku kawaykaqkunapita juknin qayakamur nimurqan: “¡Shamuy!” Sayno nimuptin rikärishqächömi yana cawallu shamuykaqta rikarqä. Loqaraqninmi balanzan aptash kaykarqan.

[6] Saymi say chusku kawaykaqkunapa chawpinpita kayno nimuqta wiyarqä: “¡Muchuymi kanqa! Saymi juk junaq arur gänayashqan aypanqa juk kïlu trïguta o kimsa kïlu cebädata rantiyänalanpaq. Muchuy kaptinpis aceititawan vïnutaqa ama ushakäsiysu”.

[7] Röllucho chusku kaq laqaraykaq cërata Carnish jorquriptinmi nawpancho kaq chusku kawaykaqkunapita jukninna qayakamur nimurqan: “¡Shamuy!”

[8] Sayno nimuptin rikärishqächömi bäyu cawalluta rikarqä. Loqaraqninpa jutinmi karqan Wanuy. Paypa qepantanami Hades shamurqan. Ishkanmi yarqayämurqan runakunata espädawan, muchuywan, qeshyawan y munti uywakunawan wanusiyänanpaq. Saymi munayyuq kayarqan pulanpa pulannin runakunata wanusiyänanpaq.

[9] Röllucho pisqa kaq laqaraykaq cërata Carnish jorquriptinmi almakuna altar chakincho kaykäyaqta rikarqä. Say almakuna kayarqan Diospa wilakuyninta wiyakuyashqanpita y Jesucristuman yärakuyashqanpita wanusiyash runakunapa almankunami.

[10] Paykunami sinchipa niyarqan: “Nishqaykikunata cumpliq santu Tayta Dios, ¿imaynataq wanusiyämaq runakunata juzganki?”

[11] Sayno niyaptinmi Tayta Dios nirqan: “Shuyaykuyayraq. Qamkuna wanuyashqaykinölami wakin yärakamuqkunapis wanuyanqa”. Sayno nirmi say almakunata yuraq mödanata jatiparqan.

[12] Röllucho soqta kaq laqaraykaq cërata Carnish jorquriptinmi pasa fiyupa suksukyarqan. Say hörami rikarqä inti yanayar lütu tëla niraq rikakuqta y killapis yawar niraq rikakuqta.

[13] Fiyupa wayraptin hïgus shikwamuqnöraqmi qoyllarkunapis jana pasapita shikwayämurqan.

[14] Jana pasapis rölluno luylukarkur luylukarkurmi elaqakäkurqan. Jirkakuna y lamarcho islakunapis juklämanmi witikuyarqan.

[15] Kay pasacho reykuna, rïcukuna, mandaq soldädukuna, ashmaykuna y wakin runakunapis qaqakunaman y machaykunamanmi pakakuyarqan.

[16] Saychömi jirka puntakunata y qaqakunatapis niyarqan: “¡Janäkunaman juchumuy! ¡Trönucho jamaraykaqpis y Carnishpis fiyupa rabyashqami kaykäyan! ¡Paykunapita pakaykayälämay!

[17] ¡Lapan runakunata castigananpaq kaq tiempu chämushnami! ¡Tayta Diospa castïgunta manami pipis awantanqasu!”