Apocalipsis 17
[1] Saypitanami cöpata tikwamuq qanchis angilkunapita juk ángel shamuykur nimarqan: “Aku aywashun yaku janancho jamaraykaq prostitüta warmita Tayta Dios imano castigashqantapis rikasinäpaq.
[2] Say warmiwanqa mana penqakuypami mandaq reykuna kakuyash. Mana ali costumbrinkunaqa shinkäsikuq vïnunömi kaykan. Say vïnuta upurmi kay pasacho runakuna shinkäyarqan”.
[3] Saypitanami revelacioncho sunyaq jirkaman ángel pushamarqan. Saychömi rikarqä juk warmi mansariypaq puka ichayta loqaraykaqta. Say ichay karqan qanchis umayuq y chunka waqrayuqmi. Ichaypa jananchömi Tayta Diospa contran qelqaraykarqan.
[4] Warmipa mödananmi karqan granäti y puka püru tëlapita. Qoriwan, kuyaylapaq rumikunawan y perlaskunawanpis adornashqami kaykarqan. Sararashqan qori cöpachömi winararqan lapan jusalikushqankuna. Sayqa pasaypa melanaypaqmi karqan.
[5] Urkunchönami runakuna mana musyayashqan jutin qelqaraykarqan kayno nir: “Jatun Babilonia markami kä. Prostitüta warmikunapa mamanmi kä. Jusalikuqkunapa mamanmi kä”.
[6] Saypita rikärishqächönami tantiyaskirqä Jesucristuman yärakuqkunata wanusir yawarninta upushqanwan say warmi shinkash kaykashqanta. Sayta rikaykur pasaypa mansarir manami ima ruraytapis kamäpakurqäsu.
[7] Saymi ángel nimarqan: “¿Imanirtaq mansakash kaykanki? Kanan tantiyasishayki say warmipita y loqaraykashqan qanchis umayuq y chunka waqrayuq ichaypitapis.
[8] Say rikashqayki ichayqa nawpata kawash karpis kananqa manami kawannasu. Sayno karpis wanwanyaykaqpitami yarqamunqa. Nirkurmi ushakanqa. Shamuqta rikarmi runakuna fiyupa espantash rikakuyanqa. Say runakunapa jutinkuna manami Libru de la Vïdacho qelqaransu. Say libruta Tayta Dios qelqarqan kay pasata kamashqan wisanmi.
[9] “Tantiyakuq kaqqa shumaq tantiyakuyäsun. Say ichaypa qanchis umankuna kaykan prostitüta warmi jamarashqan qanchis lömakunami.
[10] Saynöpis say umankuna kaykan mandaq qanchis reykunami. Say qanchis reykunapita pisqa reykuna maynami ushakäyash. Kananqa juknami mandaq kaykan. Qanchis kaq rey yurimurnami pöcu tiempula mandanqa.
[11] Nawpata kawaq puka ichayqa puwaq kaq mandaq reymi kanqa. Qanchis kaq mandaq reykunanömi kanqa. Nirkur paypis ushakanqami.
[12] “Chunka waqrakunata rikashqaykiqa chunka reykunami kaykäyan. Paykuna manaraqmi mandar qalaykuyanraqsu. Juk tiempulapaqmi mandaq kayta chaskiyanqa ichaywan juntu mandayänanpaq.
[13] Mandarnami say chunka reykuna wilanakur munayninta ichayta qoyanqa.
[14] Saymi say ichayqa Carnishpa contran sharkur paywan pelyayanqa. Contran sharkuyaptinpis lapan mandaqkunapa y reykunapa mandaqnin karmi paykunata Carnish vincinqa. Carnishwanmi kayanqa qayashqan, akrashqan y imaypis cäsukuq runakuna”.
[15] Nirkurnami ángel nimarqan: “Prostitüta warmi jamarashqan yakuqa maysay marka runakuna, maysay nación runakuna y tukuy idiömata parlaq runakunami kaykäyan.
[16] Rikashqayki chunka waqrakuna y ichaypis say prostitüta warmita fiyupami chikikurkuyanqa. Saymi lapan imankunatapis apakur qarapächulata kachaykuyanqa. Saypitanami aysanta mikuyanqa y pusuq kaqtana rupasiyanqa.
[17] Saypita Tayta Dios yarpayta qoshqannölami say chunka waqrakuna wilanakur ichayta munayninta qoyanqa. Saymi say ichay munayyuq kanqa Tayta Dios nishqannöla lapanpis cumplikashqanyaq.
[18] “Rikashqayki warmiqa jatunkaray markami kaykan. Say markaqa kay pasacho kaykaq reykunatami munaynincho sararaykan”.