<Apocalipsis 18

[1] Saypitanami rikarqä munayyuq juk ángel jana pasapita uraykämuqta. Chipipiyninmi intëru pasata asikyaparqan.

[2] Say angilmi sinchipa nimurqan: “¡Ushakashnami, ushakashnami jatunkaray Babilonia marka! Kananqa supaykunalanami saycho taykäyan. Saychöqa melanaypaq impüru wiskurkuna y tukukunalami waqaykäyan.

[3] Babiloniapa mana ali costumbrinkuna shinkäsikuq vïnunömi karqan. Say vïnutami intëru pasacho runakuna upuyarqan. Kay pasacho reykuna mana ali costumbrinkunata Babiloniapita yachakurmi ïdulukunata adorayarqan. Imatapis rikashqan kaqta Babilonia rantiptinmi negociantikuna seqaypa rïcuyäyarqan”.

[4] Saypitanami wiyarqä jana pasapita nimuqta: “¡Kuyashqä runakuna, Babiloniapita aywakuyay! ¡Mana jusalikuyänaykipaq witikuyay! Mana witikuyaptikiqa Babiloniaman castïgu chämushqannömi qamkunamanpis chämunqa.

[5] Babiloniapa jusankunaqa jana pasayaqmi chash. Lapan jusalikushqanta Tayta Dios musyaykanmi.

[6] Jukta nakasiyashqannöla kikintapis castigar nakaykasilay, Tayta Dios. Jusalikushqanman tupu yapa yaparkur castigaykulay.

[7] Imaykayuqpis kar pasaypa ali tukurmi kawarqan. Sayno kashqanman tupu nakaykasilay y lakikuyman churaykulay. Babiloniaqa shonquncho kaynömi nirqan: ‘Noqaqa reinanömi kaykä. Manami viüdasu kä. Manami imaypis lakikur waqashaqsu’.

[8] Sayno kashqanpitami pasaypa nakanqa. Wanuypis, nakaypis y mikanaypis elaqpitami payman chanqa. Sayno nakaykaqtami nina rupar ushanqa. Babiloniataqa lapanpaq munayyuq Tayta Diosmi castiganqa”.

[9] Rupashqanpita qoshtay sharkuykaqta rikarmi lapan nacionkunapa mandaqnin reykuna lakikuyashpan waqayanqa. Say reykuna Babilonia runakunawan riquëzankunata qaranakur ïdulukunatapis adorayarqan.

[10] Castigashqanta rikarmi mansakash karulapita rikarar niyanqa: “¡Wawalaw, jatunkaray Babilonia marka! ¡Munayyuqmi karqayki! ¡Kananqa elaqpitami ushakaykushkanki!”

[11] Saymi negociunkunata rantiyänanpaq pipis manana kaptin lapan negociantikunapis seqaypa waqayanqa.

[12] Paykunami rantikuyänanpaq apayaq qorita, qellayta, kuyaylapaq rumikunata, perlaskunata, lïnupita y sëdapita rurash granäti y puka tëlakunata, tukuy niraq fïnu tablakunata, kuyaylapaq marfilpita, qerupita, broncipita, fiërrupita y marmolpita rurash adornukunata.

[13] Saynölami rantikuyänanpaq apayaq canëlata, inciensuta, mïrrata y tukuy niraq mushkuq jachakunatapis. Saynölami apayaq vïnuta, aceitita, jarinata, trïguta, wäkakunata, uyshakunata, cawallukunata y carrëtakunatapis. Saynölami runakunatapis rantikuyaq ashmaynin kayänanpaq.

[14] Saymi negociantikuna lakikur say markata niyanqa: “¡Imaykanöpapis shuntashqayki riquëzaykikuna manami kannasu! ¡Kuyaylapaq sararashqaykikuna ushakashnami! ¡Rïcu kashqaykinöqa manami imaypis kankinasu!”

[15] Say markacho rïcuyaq negociantikunami rupaykaqta karulapita rikaykurmi mansakash waqar

[16] niyanqa: “¡Wawalaw, jatunkaray Babilonia marka! Say marka kuyaylapaq kar lïnupita rurash puka y granäti mödanash warminömi karqan. Qoriwan, kuyaylapaq rumikunawan y perlaskunawan adornash warminömi karqan.

[17] ¡Riquëzankuna elaqpitami chipyaq ushakaykush!” Büqui manijaqkuna y büquicho lapan arupakuqkunapis karulapitami rikaraykäyan.

[18] Say markapita qoshtay sharkuqta rikarmi seqaypa waqar niyanqa: “Manami may markapis say markano seqaypa kuyaylapaqqa kashsu”.

[19] Fiyupa waqar qaparäyashpanmi alpatapis umankunaman winakur niyanqa: “¡Wawalaw, jatunkaray Babilonia marka! Saychömi büquiyuqkuna negociunta rantikur lapanpis rïcuyäyash. Kananqa elaqpitami pasaypa ushakäkush”.

[20] Jana pasacho kaqkuna, ¡kushikuyay! Apostolkuna, profëtakuna y Diosman lapan yärakuqkunapis, ¡kushikuyay! Qamkunata wanusiyäshushqaykipitami Tayta Dios say markata chipyaq ushakäsish.

[21] Saypitanami munayyuq juk ángel mulinu niraq rumita joqarkur lamarman jitarir nirqan: “Babilonia marka, kaynömi ushakanki. Qamta manami imaypis rikayäshunkinasu.

[22] Runakuna cantayashqankunapis manami qamcho wiyakanqanasu. Manami arpapis, pinkullupis ni cornëtapis wiyakanqanasu. Ima aruyta yachaqkunapis manami kayanqanasu. Mulinu taqrarashqanpis manami wiyakanqanasu.

[23] Pipis mana taptin aksipis mananami kanqanasu. Casaray fiestapis mananami kanqanasu. Qamcho taykaq negociantikuna maysay negociantikunapitapis mas munayyuqmi kayarqan. Brüju karmi maysaychöpis taq runakunata criyisishkanki.

[24] Qamchömi profëtakunapa, Diosman yärakuqkunapa y maysay runakunapa yawarnin mashtaraykan”.