<Apocalipsis 3

[1] “Sardis markacho kaykaq iglesiapa angilninpaq kay nishqäta qelqay: Noqami Tayta Diospa qanchis espïritunkunata sararaykä. Noqami makïcho qanchis qoyllarkunata sararaykä. “Noqa rikaykämi lapan rurayashqaykikunata. Tayta Dios munashqanno kawaykäyashqaykita runakuna yarpäyaptinpis qamkunaqa wanushnömi kaykäyanki.

[2] “Shonquykikuna manaraq chukruyashqanyaq Tayta Dios munashqanno kawayänaykipaq shumaq yarpachakuyay. Alita ruraykäyashqaykita yarpäyaptikipis Tayta Diospaqqa mana alimi kaykan.

[3] Yachakuyashqaykita y wiyayashqaykita mana qonqaypa wiyakuyay. Jusalikuyta wanakur munashqänöna kawayay. Sayno mana kawayaptikiqa elaqpita suwa shamushqannömi qamkunata castiganäpaq shamushaq.

[4] “Walkaqlami Tayta Dios munashqanno kawaykäyanki. Sayno kawayashqaykipitami yuraq mödanayki jatish nawpächo kawayanki.

[5] Imano nakarpis mana ajayaypa yärakamuqkunaqa yuraq mödanan jatishqami kayanqa. Paykunapa jutinkunata Libru de la Vïdapita manami börrashaqsu. Taytäpa y angilkunapa nawpanchömi favornin parlashaq.

[6] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun.

[7] “Filadelfia markacho kaykaq iglesiapa angilninpaq kay nishqäta qelqay: Noqaqa santumi kaykä. Nishqäkunata cumplïmi. Davidpa llävinpa wawantami sararaykä. Saymi punkuta kichaptï pipis wichqanqasu. Wichqapaptï manami pipis kichanqasu.

[8] “Noqa rikaykämi lapan rurayashqaykikunata. Munayniynaq kaykarpis mana ñëgamaypami nishqäkunata cumpliyashkanki. Saymi gloria punkuta kichapashkä. Say punkupa yaykuyaptiki manami pipis michäyäshunkisu.

[9] “Markaykicho wakin runakuna ‘Tayta Dios kuyashqan Israel runami kayä’ nikarpis lulakuykäyanmi. Paykunaqa Satanás munashqantami ruraykäyan. Tayta Dios kuyashqan runakuna kayashqanta niyaptinpis qamkunatami noqa kuyä. Sayta musyayänanpaqmi puntaykiman qonqurpakuyänanpaq mandashaq.

[10] “Nishqäta cumplirmi imano nakarpis mana ajayaypa yärakaykäyämunki. Sayno kayashqaykipitami maysaycho taq runakuna fiyupa nakayänanpaq kaq tiempu chämuptinpis qamkunawan kaykäshaq.

[11] “Noqa shamunäpaqnami kaykä. Sayno kaykaptinqa yachasishqäkunata mana qonqaypa wiyakuyay. Saynöpami corönaykita pipis qechushunkisu.

[12] Imano nakarpis mana ajayaypa yärakamuqkunataqa Diosnïpa templuncho columna kayänanpaqmi churashaq. Saymi mana yarquypa saycho imayyaqpis kayanqa. Paykunamanmi Tayta Diosnïpa jutinta y markanpa jutinta qelqashaq. Say marka jana pasapita shamuq mushuq Jerusalénmi kaykan. Saynölami kikïpa mushuq jutïtapis paykunaman qelqashaq.

[13] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun.

[14] “Laodicea markacho kaykaq iglesiapa angilninpaq kay nishqäta qelqay: Noqami Tayta Dios promitishqankunata cumplï. Imaypis rasun kaqlatami nï. Noqawanmi Tayta Dios lapantapis kamarqan.

[15] “Noqa rikaykämi lapan rurayashqaykikunata. Musyämi alaqpis ni akaqpis mana kayashqaykita. Saypa trukanqa alaqpis o akaqpis kayankiman.

[16] Wawaquñuyla kayaptikimi shimïpita aqturishayki.

[17] “Rïcu kayashqaykiman atiënikurmi imapis mana pishïyäshushqaykita nikäyanki. Sayno nirpis manami cuentata qokuyankisu kuyapaypaq pobri, qapra y qarapächula kaykäyashqaykita.

[18] Rasunpaypa rïcu kayta munarqa ninawan sulusish qori püruta noqapita rantiyay. Qarapächu kayta mana munarqa yuraq mödanata noqapita rantiyay. Qapra kayta mana munarqa noqapita jampita rantiyay. Saynöpami rïcu, ali mödanash y ali rikaq kayanki.

[19] “Kuyashqä kaqtaqa lutanta ruraptin corrigïmi. Sayno kaptinqa jusalikuyta wanakur lapan shonquykikunawan sirviyämay.

[20] ¡Tantiyakuyay! Punkuykichömi qayakaykämü. Mayqaykipis qayakamushqäta wiyar kichapämaptikiqa yaykamuptï juntumi mikushun.

[21] Imano nakarpis mana ajayaypa yärakamuqkunataqa noqawan mandaq kayänanpaqmi churashaq. Satanásta vincishqäpitami noqatapis Taytä churamash paywan imayyaqpis mandaq kanäpaq.

[22] “Espíritu Santumi iglesiakunata sayno nikan. Rinriyuq kaqkunaqa nishqäkunata wiyakuyäsun”.