[1] Cenkrea llaqtapi kashaq iñiq t'aqamanta diakonisa pananchis Febeta sumaqta qhawariyapuwankichis.
[2] Payqa, askha runakunatan yanapaykurqan, ñoqatawanpas yanapaykuwarqanmi. Chayrayku, t'aqasqakunamanta hukninta hinapuni, Señorpi chaskiykuychis. Hinallataq imapiña pisichi- kuqtinpas yanapaykuychispuni.
[3] Cristo Jesuspi llank'aqmasiykunata Priscilatawan, Aquilatawan napaykapuwaychis.
[4] Paykunaqa, kawsayniyraykun yaqa wañuymanraq kawsayninkuta churarqanku. Paykunamanmi anchatapuni grasiasta qoni. Manataqmi ñoqallachu, aswanpas mana-judío runakunaq llapan iñiq t'aqankunapas grasiastan qollankutaq.
[5] Hinallataq wasinkupi kashaq iñiq t'aqatapas napaykapullawaychistaq. Munakusqay Epenetotapas napaykapuwaychis. Payqa, Akaya probinsiamanta Cristopi ñawpaq kaq iñiqmi.
[6] Mariatapas napaykapuwaychis. Paymi mana sayk'uspa qankunapurapi llank'arqan.
[7] Andronikotawan, Juniastawan napaykapuwaychis. Paykunaqa, familiaykuna, hinallataq karselpi wisq'asqa kaq masiykunan kanku. Hinallataq apostolkunapurapipas ancha munakusqan kanku. Chaymantapas, ñoqamanta Cristopi ñawpaqtaraq iñiqkunan kanku.
[8] Señorpi munakusqay Ampliastapas napaykapuwaychis.
[9] Cristopi yanapaqniy Urbanotapas, hinallataq munakusqay Estakistapas napaykapuwaychis.
[10] Apelestapas napaykapuwaychis. Payqa Cristopi allinpaq qhawarisqan karqan. Aristóbuloq wasinpi kaqkunatapas napaykapullawaychistaq.
[11] Familiay Herodiontapas napaykapuwaychis. Narsisoq wasinpi kaqkunatapas napaykapullawaychistaq. Paykunaqa, Señorpin kashanku.
[12] Trifenatawan, Trifosatawan napaykapuwaychis. Paykunaqa, Señorpin llank'arqanku. Munasqa Persidatapas napaykapullawaychistaq. Paymi Señorpi anchatapuni llank'arqan.
[13] Señorpi Diospa akllakusqan Rufotapas napaykapuwaychis. Rufoq mamitantapas napaykapullawaychistaq. Payqa, mamitay hinan karqan.
[14] Asinkritotapas, Flegontetapas, Hermastapas, Patrobastapas, Hermestapas, hinallataq paykunawan kashaq wawqe-panakunatapas napaykapuwaychis.
[15] Hinallataq Filologotapas, Juliatapas, Nereotapas, hinallataq paypa panantapas, Olimpastapas, hinallataq paykunawan kashaq llapallan t'aqasqa kaqkunatapas napaykapuwaychis.
[16] Ch'uya much'aykuywan qankunapura napaykunakuychis. Cristoq Iñiq t'aqankunapas napaykamullasunkichistaqmi.
[17] Wawqe-panaykuna, wak t'aqa hatarichiqkunamanta, hinallataq imaynachus yachachisqayku yachachikuypa kontranpi misk'achiqkunamanta kuidakuychis. Hinallataq paykunamanta t'aqakunaykichispaq balikuykichis.
[18] Chay runakunaqa, manan Señorninchis Jesucristotachu serbinku. Aswanpas kikinkuq wiksallankutan serbishanku. Llamp'u simikunawantaq, misk'i rimaqman tukuspa q'otukuq simikunawan, wawa hina sonqoyoqkunata q'otunku.
[19] Llapa runakunataqmi, kasukuq kasqaykichistaqa yachanku. Chayraykun qankunahawa q'ochukuni. Allin kaqpaqqa, yachaysapa kanaykichistan munani. Mana allin kaqpaqtaq ichaqa, mana qhellichakuq kanaykichista munani.
[20] Thak kayniyoq Diostaqmi usqhayllaman chakiykichispa pampanman Satanasta t'ustunqa. Señorninchis Jesucristoq allinpaq qokuynintaq, qankunawanpuni kachun.
[21] Llank'aqmasiy Timoteopas napaykamusunkichismi. Hinallataq Luciopas, Jasonpas, Sosipaterpas napaykamullasunkichistaq. Paykunaqa, familiaykunan kanku.
[22] Kay Qelqata qelqamuq ñoqa Terciopas Señorpin napaykamuykichis.
[23] Ñoqatapas, hinallataq llapan iñiq t'aqatapas, qorpachaqniyku Gayopas napaykamusunkichismi. Llaqtaq qolqen hap'iq Erastopas, hinallataq wawqenchis Kuartopas napaykamullasunkichistaqmi.
[24] Señorninchis Jesucristoq allinpaq qokuynin llapallaykichiswanpuni kachun. Ahinapuni kachun.
[25] Allin takyasqa kanaykichispaq, imallatapas ruwayta atiqman, allinpaq qhawariyqa kachun. Paymi, allin willakuyniyman hina, hinallataq Jesucristomanta willasqayman hina, chaytaqa ruwan. Hinallataq, wiñay-wiñaymantaraq pakasqallapuni kaq, pakasqa yachaypa chawpintan chaytaqa ruwan.
[26] Kunantaqmi ichaqa, chaykunata Diosqa rikhurichimun. Diospa rantinpi rimaqkunaq Qelqasqanku chawpinta, hinallataq wiñaymantapacharaq kaq Diosqa kamachikusqanpa chawpintan, chaytaqa ruwarqan. Llapan suyukunaq iñiyta kasukunankupaqtaqmi, Diosqa chayta rikhurichimun.
[27] Sapallan ancha yachayniyoq Diosman, Jesucristoq chawpinta wiñay-wiñaypaq allinpaq qhawariyqa kachun. Ahinapuni kachun.