[1] Chay hinaqa wawqe-panaykuna, Diospa khuyapayakuyninrayku, kuerpoykichisqa sakrifisio kananpaq, Diosman haywanaykichispaqmi balikuykichis. Chay sakrifisioqa, kawsashaq, t'aqasqa, hinallataq Diosta kusichiqmi kanan. Chay ruwayniykichisqa, Diosta cheqaq kaypi yupaychaspa serbiyniykichismi.
[2] Amataq kunan tiempopi runakunaq kawsasqankuta hinaqa kawsaychischu. Aswanpas yuyayniykichista mosoqyachispa, hukniraymanña t'ikrasqa kaychis. Chay hinapin, maychus Diospa allin kaq, kusichikuq, hinallataq k'apak munayninta yachankichis.
[3] Chay hinaqa, allinpaq qokuyta Diospa qowasqanpa chawpintan, sapanka hukniykichista niykichis: ‘Ama mayqenpas imaynachus kashasqanmanta aswan allin kananpaq yuyaykuyniyoqqa kachunchu. Aswanpas sapankaman Diospa rakisqan iñiyninman hina, allin yachaywan imaynachus kashasqallantapuni yuyaykuchun,’ nispay.
[4] Chay hinaqa, imaynan ch'ulla kuerpollapi askha miembronchiskuna kapuwanchis, ichaqa manan llapan miembrokunachu kasqan ruwanallayoqqa kanku.
[5] Chay hinallataqmi ñoqanchispas askhaña kanchis chaypas, Cristopiqa ch'ulla kuerpollaña kapunchis. Hinallataqmi llapanchispas hukkuna-hukkunawan miembromasintin kapunchis.
[6] Diospa imaymana ruwanakuna qowasqanchisqa, allinpaq qokuyninman hina qowasqanchismi. Sichus piqpapas Diospa rantinpi rimananpaq kan chayqa, iñiyninpa kasqanman hina Diospa rantinpi rimachun.
[7] Sichus piqpapas serbinanpaq kan chayqa serbichun. Sichus piqpapas yachachinanpaq kan chaypas, yachachillachuntaq.
[8] Sitaqchus kallpanchananpaq kaqpas kallpanchaykuchun, qoykuqpas sonqomanta qoykuchun. Llaqta pusaqpas tukuy kallpawan pusachun. Yanapaykukuqpas kusikuywan yanapaykullachuntaq.
[9] Munakuyniykichisqa, amapuni iskay-uya kaywanchu kachun. Mana allin kaqta cheqnikuspa, allin kaqllamanpuni hap'ipakuychis.
[10] Wawqe-panakunantin hinapuni hukkuna-hukkunawan munanakuychis. Allinpaq qhawarinakuypipas hukkuna-hukunawan aswantaraq allinpaq qhawarinakuychis.
[11] K'uchillapuni kaychis. Amataq qellaqa kaychischu. Ruphashaq sonqowan Señorta serbiqkunapuni kaychis.
[12] Suyakuypipas kusisqallapuni kashaychis. Ñak'ariypi kaspapas pasiensiaykukuychis. Diosman parlayniykichispipas amapuni sayk'uychischu.
[13] Diospaq t'aqasqa kaqkunaman pisichikuyninkupi haywarispallaykichispuni, hinallataq qorpachaykuspallaykichispuni kashaychis.
[14] Qatiykachaqniykichiskunata saminchaychis. Amataq paykunata ñakaychischu, aswanpas saminchallaychispuni.
[15] Q'ochukuqkunawanpas q'ochukuychis. Waqaqkunawanpas waqallaychistaq.
[16] Qankunapurapipas ch'ulla yuyaylla kawsaychis. Ama uma hoqariqqa kaychischu. Aswanpas huch'uyaykukuqkunawan huñunaykukuychis. Amallataq kikiykichispa yuyaykusqaykichisman hinaqa, yachaysapachu kaychis.
[17] Ama pimanpas mana allinmantaqa, mana allinllawantaq kutichiychischu. Llapa runaq ñawpaqenpipas allin kaqllatapuni ruwaychis.
[18] Atikunmanchus chayqa, llapa runakunawan thak kayllapipuni kashaychis.
[19] Munakusqaykuna, ama qankuna kikiykichisqa bengakuychischu. Qelqapipas Señorqa ninmi: ‘¡Bengakuyqa ñoqaqmi! ¡Ñoqañan pagapusaq!’ nispan. (Deut. 32:35) Chayrayku Diospa k'arak phiñakuyninman chaytaqa saqeychis.
[20] Qelqapas nillantaqmi: ‘Sichus awqayki yarqachikun chayqa, mikhuchiy. Sitaqchus ch'akichikun chaypas, ukyachiy. Chayta ruwaspaykiqa, uman patamanmi yawrashaq sansata huñuykunki,’ nispa. (Prov. 25:21-22)
[21] Amapuni mana allin kaqwanqa atipachikuychu. Aswanpas mana allin kaqtaqa, allin kaqwan atipay.