[1] Iñiypi pisi-kallpayoqtaqa, chaskiykullaychis. Amataq ichaqa, nisqankumanta churanakunaykichispaqchu chaskiychis.
[2] Wakinqa, llapanpas mikhunalla kananpaqmi yuyan. Iñiyninpi pisi-kallpayoqtaqmi ichaqa, berdura kaqkunallata mikhun.
[3] Mikhuqqa, amapuni mana mikhuqta pisichachunchu. Hinallataq, mana mikhuqpas amapuni mikhuqtaqa huchachachunchu. Diosqa mayqen kaqtapas chaskiykullanmi.
[4] Chay hinaqa, ¿wak runaq kamachinta huchachanaykipaq, pitaq qanri kanki? Kikin wiraqochanpaqmi sayashanpas, otaq urmasqapas kashan. Qaqata sayachinanpaq Diosqa atiyniyoqmi.
[5] Wakinmi p'unchaykunamanta huk kaq p'unchayninta allinpaq hap'in. Wakinñataq ichaqa, sapa p'unchaytapas kasqan kamallapaq hap'in. Sapanka hukyá, yuyaykusqanpi allin takyasqa kachun.
[6] P'unchayqa, imaynachus kasqanta yuyaykuqqa Señorpaqmi yuyaykun. Hinallataq p'unchayqa, imaynachus kasqanta mana yuyaykuqpas Señorpaqmi mana yuyaykunchu. Mikhuqqa, Señorpaqmi mikhun, chay hinapin Diosman grasiasta qon. Hinallataq mana mikhuqpas Señorpaqmi manaqa mikhunchu, hinan Diosman grasiasta qollantaq.
[7] Manan mayqenninchispas kikinchispaqchu kawsanchis. Manallataqmi mayqenninchispas kikinchispaqchu wañunchis.
[8] Sichus kawsashanchis chayqa, Señorpaqmi kawsashanchis. Sitaqchus wañukapunchis chaypas, Señorpaqmi wañukapunchis. Chay hinaqa, kawsashanchisña, otaq wañukapusunña chaypas, Señorpan kanchis.
[9] Wañuqkunaqpas, kawsaqkunaqpas Señorninku kananpaqmi, Cristoqa wañurqan, kawsarimpurqan, hinallataq wakmanta kawsashan.
[10] Ichaqa, ¿imanaqtintaq qanri wawqeykita huchachanki? Otaq qanpas, ¿imanaqtintaq wawqeykitari pisichanki? Llapallanchismi Cristoq chaninchana tiyananpa ñawpaqenpiqa rikhurisunchis.
[11] Qelqasqan kashan: ‘Señorqa ninmi: “Ñoqaqa kawsashanin. Llapa runakunaq moqonkun ñoqaman qonqoriykukuwanqaku. Hinallataq llapa runakunaq siminkun Diosman willakapunqaku,” nispan’ nispa. (Isa. 45:23)
[12] Chay hinapin, sapanka hukninchis kikinchismanta Diosman kuentata qosunchis.
[13] Hinaqa amaña hukkuna-hukkunawan chaninchanakushasunchisñachu. Amallataq wawqenchisman misk'anata, nitaq hark'atapas churayta yuyaykusunchischu.
[14] Señor Jesuspi kaspaymi, mana imapas kikinpi mana chaskinapaq hina kasqantaqa allintapuni yachani. Pichus imapas mana chaskinapaq hina kasqanta yuyaqpaqmi ichaqa, mana chaskinapaq hinallapuni paypaqqa imapas kashan.
[15] Ichaqa, sichus mikhusqaykihawa, wawqeyki khuyayman tukuchisqa kanman chayqa, manan munakuyman hinañachu purishanki. Pikunaraykuchus Cristoqa wañurqan, paytaqa amapuni mikhusqaykihawapas chinkaymanqa churaychu.
[16] Chay hinaqa, qankunaq allin kaq qhawarisqaykichismanta mana allin rimanankutaqa hark'akuychis.
[17] Diospa qhapaq suyunqa, manan mikhunachu, nitaq ukyanachu. Aswanpas Santo Espiritupi chanin kay, thak kay, hinallataq kusikuymi.
[18] Hinaqa, kay imaymana kaqkunapi Cristota serbiqqa, Diostan kusichin. Runakunataqmi ‘allinmi’ ninku.
[19] Chay hinaqa, thak kayman pusakuq kaqkunataqa ruwallasunpuni. Hinallataq ñoqanchispura wiñachiqtapas ruwashallasunpuni.
[20] Diospa llank'asqantaqa, amapuni mikhunahawa urmachiychu. Cheqaqtapuni llapan imaymanakunapas llimphuymi. Ichaqa huk runachus, mikhunahawa iñiqmasinta misk'achinman chayqa, manan allinchu kanman.
[21] Aychata mana mikhuyniykichispas, binota mana ukyayniykichispas allinmi. Sichus wawqeykita mana misk'achinkichu, nitaq pisi-kallpayachinkipaschu, nillataq imatapas ruwaspayki phiñachinkipaschu chayqa, allinmi.
[22] ¿Qanpa iñiyniyki kanchu? Diospa ñawpaqenpi qanllapaq kachun. ‘Allinmi’ nisqanpi kikinta mana huchachakuqqa, kusisamiyoqmi.
[23] Iskayaspa mikhuqmi ichaqa, mana iñiywan mikhusqanhawa, pay kikinta huchachakun. Pipas mana iñiywan imatapas ruwaqqa huchallikunmi.