[1] Chay hinaqa, ¿imanisunchistaq? ¿Allinpaq qokuy anchata askhayananpaqri, huchallapipunichu kashasunchis?
[2] ¡Imaynallanmantapas manapunin! Huchapaq wañupuqkunaqa, ¿imaynatataq huchallapiraqri kawsashasunman?
[3] Hayk'an Cristo Jesuspi bautisasqakunaqa, wañuyninpin bautisasqa karqanchis. ¿Manachu chayta yacharqankichis?
[4] Chayraykun bautismopiqa, paywan kuska wañuypaq p'ampasqa karqanchis. Imaynan Cristopas, Yayaq k'anchariyninwan wañusqakunamanta kawsarimpurqan, chay hinallatataqmi, ñoqanchispas, mosoq kawsaypi purinanchis.
[5] Sichus paywan kuska wañuyninpa rikch'ayninman hukllachasqa karqanchis chayqa, chay hinallataqmi kawsarimpuyninpa rikch'ayninmanpas hukllachasqa kallasunchistaq.
[6] Huchallikuq kuerponchisqa, mana huchallikuqman tukuchisqa kananpaqmi, mawk'a runa kayninchisqa, Cristowan kuska chakatasqa kapurqan. Chaymi manaña huchaq kamachinñachu kanchis. Chaytaqa yachanchismi.
[7] Pichus wañupuqqa, huchamanta chaninman tukuchisqañan kapun.
[8] Ichaqa, sichus Cristowan kuska wañupurqanchis chayqa, Cristowan kuska kawsarimpunanchistapas kreellanchistaqmi.
[9] Wañusqakunapuramantan Cristoqa kawsarimpurqan. Hinan payqa manaña wañunqañachu. Manañataqmi wañuypas paymantaqa munaychakunqañachu. Chaytaqa yachanchismi.
[10] Cristo wañuspanqa, huchapaqmi ch'ulla kutillata llapapaq wañurqan. Kawsashan chaytaqmi ichaqa, Diosllapaqña kawsashan.
[11] Chay hinallataq qankunapas, huchapaqqa wañusqapuniña kashasqaykichista yuyaychis. Diospaqtaq ichaqa, Señorninchis Cristo Jesuspi kawsashaqpuniña kashasqaykichista yuyaychis.
[12] Chay hinaqa, amapuni wañupuq kuerpoykichispa mana allinkuna munapayasqankunata kasunaykichispaq huchaqa kamachikuchunñachu.
[13] Amallataq kuerpoykichispi miembroykichiskunatapas mana chanin ruwanapaq kaqta hina huchamanqa hap'ichiychischu. Aswanpas wañusqakuna ukhumanta kawsashaq hinapuni Diosman hap'ichikuychis. Kuerpoykichispa miembronkunatapas, chanin kaq ruwanapaq kaqkunata hinapuni Diosman hap'ichikullaychistaq.
[14] Qankunaqa, manan Kamachikuy Simita kasukuna tiempopichu kashankichis. Aswanpas allinpaq qokuy tiempopin kashankichis. Chaymi huchaqa, qankunamanta manaña munaychakusunkichischu.
[15] Kunanqa, manan Kamachikuy Simi tiempopichu kashanchis. Aswanpas allinpaq qokuy tiempopin kashanchis. Chay hinaqa, ¿huchallikushallasunchisraqchu? ¡Imaynallanmantapas manapunin!
[16] Pimanpas kamachin kaspa kasunaykichispaq k'askaykakapunkichis chayqa, payta kasukuq kamachinmi kapunkichis. Chay hinaqa, wañuypaq huchaq kamachin, otaq chanin kaypaq kasukuypa kamachinmi kapunkichis. ¿Chayta manachu yacharqankichis?
[17] Ñawpaqqa, huchaq kamachinkunan karqankichis. Kunantaq ichaqa, imaynatachus yachachirqaykiku, chayta sonqomanta kasukurqankichis. Chaymantaqmi Diosqa hap'ichirqasunkichis. Chaymi Diosmanqa grasiasta qoni.
[18] Ichaqa, huchamanta kacharichisqa kapuspaykichisqa, chanin kaqpa kamachinkunamanmi tukupunkichis.
[19] Pisi-kallpayoq kasqaykichisraykun, runa kayllaypi rimaykuykichis. Ñawpaqqa, kuerpoykichispa miembronkunatan qhelli kawsayman, hinallataq aswan-aswantaraq Kamachikuy Simita mana kasukuykunaman hap'ichirqankichis. Chay hinallataqyá kunanqa, kuerpoykichispa miembronkunata ch'uyanchasqa kananpaq, chanin kayman hap'ichikuychis.
[20] Huchaq kamachin kashaspaykichisqa, manan chanin kaqpa kamachinraqchu karqankichis.
[21] Chay imaymanakunaq p'uchukayninqa wañuymi. Chayrayku, ¿kunan p'enqakunaykichispaq huchakunata tarpusqaykichiskunamantari imatataq chaskinkichis?
[22] Kunantaqmi ichaqa, huchamanta kacharichisqaña kankichis. Hinallataq Diospa kamachinkunaña kapunkichis. Hinan p'uchukaypipas ch'uyanchasqa ruruyniyoq hinallataq wiñay kawsayniyoq kankichis.
[23] Huchaq pagayninqa wañuymi. Diospa qokuyninmi ichaqa, Señorninchis Cristo Jesuspi wiñay kawsaypuni.