[1] Chay hinaqa, ñoqanchis kallpasapa kaqkunan, pisikallpayoqkunata pisi-kallpa kayninkuta apaysinanchis. Manataqmi ñoqanchis kikinchista kusichikuspachu kananchis.
[2] Sapanka hukninchis, runamasinchis allin kananpaq, hinallataq wiñananpaqwan runamasinchista kusichiq kasunchis.
[3] Cristopas manan pay kikinta kusichikuspachu karqan. Aswanpas Qelqaq nisqanman hinan karqan. Qelqataqmi nin: ‘Ñak'arichiqkunaq qanta ñak'arichisqankun ñoqaq patayman urmaykamun,’ nispa. (Sal. 69:9)
[4] Ñawpa Qelqakunaqa, yachachiwananchispaqmi qelqasqa karqan. Pasiensiakuypa chawpinta, hinallataq Qelqakunaq sonqochayninpa chawpinta suyakuyniyoq kananchispaqmi qelqasqa karqan.
[5] Diostaqmi ichaqa, pasiensiakuytapas, sonqochaykuytapas qowanchis. Cristo Jesusman hina, qankunapura ch'ulla yuyaylla kanaykichispaq Diospa qonasunkichistan munani.
[6] Huk sonqolla, ch'ulla kunkalla, Señorninchis Jesucristoq Yayan Diosta hatunchanaykichispaq, Diosllapuni ruwachun.
[7] Chay hinaqa, imaynan Cristopas Diospa hatunchasqa kananpaq chaskirqasunkichis, chay hinatapuni qankunapas hukkunahukkunawan chaskiykunakuychis.
[8] Kunantaqmi nini: ‘Diospa cheqaq kayninraykun, Cristo Jesusqa sirkunsidasqa kaqkunaq kamachinman tukurqan. Chay hinapi, machulanchiskunaman prometisqankunata sut'inchananpaqmi chaytaqa ruwarqan.
[9] Hinallataq, mana-judío runakuna Diospa yanapaykuyninmanta payta hatunchanankupaqmi chaytaqa ruwarqan,’ nispay. Qelqataqmi nin: ‘Chay hinaqa, ñoqan mana-judío runakunapurapi qanmanta willakusaq. Qanpa sutiykimantapas takillasaqtaqmi,’ nispa. (Sal. 18:49)
[10] Yapamantapas Qelqaqa nillantaqmi: ‘¡Mana-judío runakuna, Diospa llaqtanwan q'ochukuychis!’ nispa. (Deut. 32:43)
[11] Huktawanpas Qelqaqa nillantaqmi: ‘¡Llapan mana-judío runakuna, Señorta yupaychaychis! ¡Llapan llaqtakuna, payta hatunchaychis!’ nispa. (Sal. 117:1)
[12] Huktawanmi Isaiaspas nillantaq: ‘Isaipa saphinmi hamunqa, hinan mana-judío runakunata kamachinanpaq sayarinqa. Mana-judío runakunataqmi, paypi suyakuyniyoq kashanqaku,’ nispa. (Isa. 11:10)
[13] Kreeqtiykichis, tukuy q'ochukuywan, hinallataq thak kaywan suyakuy qoq Dios hunt'aykunasunkichispaqmi mañakushani. Hinan Santo Espírituq atiyninpa chawpinta, suyakuyniykichispi llimp'arinaykichispaq mañakushallanipuni.
[14] Wawqe-panaykuna, qankunaqa qoykukuq kaywan, hinallataq tukuy yachaywan hunt'aykusqan kashankichis. Ñoqa kikiytaqmi chaytaqa allintapuni yachani. Chaymi qankunaqa, hukkuna-hukkunata anyaykuyta atinkichis.
[15] Chaywanpas wawqe-panaykuna, imakunachus kawasqantaqa, mana manchakuywanmi sut'itapuni qelqamuykichis. Kaytaqa Diospa allinpaq qokuyninta qowasqanraykun, yuyarichinaypaq qelqamuykichis.
[16] Mana-judío runakunaman Diospa allin willakuyninta willaspay, Jesucristoq llank'aqnin kanaypaqmi allinpaq qokuyninta Diosqa qowarqan. Chay hinapin, mana-judío runakunaqa Diospa chaskinanpaq ofrenda kanankupaqwan, Santo Espírituq t'aqasqan kanankupaqwan, Diosqa allinpaq qokuyninta qowarqan.
[17] Chay hinaqa, Diospa kaqninkunamanta Cristo Jesuspi rimarikunaypaqqa kapuwanmi.
[18] Ñoqaq chawpiyta Cristoq ruwasqankunamantaqa, manan rimaykachayta atiymanchu. Ichaqa, kayllatan nini: ‘Ñoqaq rimaykusqaywan, ruwasqaywan iman, mana-judío runakunaqa Diosta kasukunku.
[19] Diospa Espiritunpa atiyninwan, musphana ruwaykunawan, atiywan ruway señalkunaq chawpintan chaykunaqa karqan. Hinan Jerusalén llaqtamantapacha, Ilíriko llaqtaq muyuriqninkama, Cristoq allin willakuyninta willaspay llapaman hunt'achirqani,’ nispay.
[20] Chay hinapin, hukpa teqsi churasqanpi mana hatarichishanaypaq, maypichus manaraq Cristomanta willasqachu karqan, chaypi allin willakuyta willanaypaq kallpachakurqani.
[21] Qelqapas ninmi: ‘Pikunamanchus mana hayk'aqpas paymanta willasqachu karqan, paykunan rikunqaku. Mana hayk'aqpas uyariqkunataq, entiendinqaku,’ nispa. (Isa. 52:15)
[22] Chay hinaqa, askha kutitan qankunaman hamuyta munarqani. Ichaqa, imaymanakunaq hark'asqanmi rikukurqani.
[23] Kunantaqmi ichaqa, kay suyukunapi manaña kampopas kanñachu. Ancha unay watakunamantañataqmi qankunaman hamuyta anchatapuni yuyaykukushani.
[24] Españaman rishaspaytaq ichaqa, qankunaman hamuspa, rikuykuyta munashaykichis. Hinan imaynallatapas qankunawan huk tiempota chaypi q'ochurikuqtiyña, ñanman churaykuwanaykichistawan munashani.
[25] Kunantaqmi ichaqa, t'aqasqa kaqkunata serbinaypaq Jerusalén llaqtaman rishani.
[26] Jerusalén llaqtapi kashaq t'aqasqakunaqa, wakchan karqanku. Chaymi Masedonia probinsiapi kashaqkunapas, Akaya probinsiapi kashaqkunapas kusikuywanpuni ofrendata churakusqaku karqan.
[27] Sichus mana-judío runakuna espiritual kaqkunawan yanapaykusqa karqanku chayqa, aswantaraqmi judío runakunamanqa kaqninkuwan yanapaykunanku. Jerusalén llaqtapi kaqkunamanqa, manupunin kanku. Chaymi chay yanapaykuyninkuqa, mana-judío runakunaman allinpuni rikch'akurqan.
[28] Chay hinaqa, chay ofrenda rurukunata rakiyta tukuruspayñan, qankunaq kasqaykichis chayninta Españaman risaq.
[29] Qankunaman hamuqtiy, Cristoq allin willakuyninpa ancha askha saminchayninwan chayamunaytaqa yachanin.
[30] Ichaqa wawqe-panaykuna, Señorninchis Jesucristoq chawpinta, hinallataq Espírituq munakuyninpa chawpintawan, anchatapuni ñoqapaq Diosman parlaysiwanaykichispaqmi balikuykichis.
[31] Judea probinsiapi kashaq, mana iñiqkunamanta Dios hark'aykuwananpaq, Diosman parlaysiwaychis. Hinallataq Jerusalén llaqtapi t'aqasqa kaqkunata serbisqay, paykunata kusichiqpuni kananpaq Diosman parlapuwaychis.
[32] Dios munaqtinqa, qankunaman kusikuywan chayamunaypaq, hinallataq qankunawan kuska kaspay samaykuyta tarinaypaq, Diosmanqa parlapuwaychis.
[33] Thak kayniyoq Diostaq, llapallaykichiswanpuni kachun. Ahinapuni kachun.