[1] Wawqe-panaykuna, sonqoypa munasqanpas, hinallataq Diosman mañakuyniypas Israel llaqtata Diospa qespichinanpaqmi.
[2] Judío runakunaqa, Diosmanta wañukuqraq kasqankumantan willaykichis. Ichaqa manataqmi yachayman hinachu wañukuyninkuqa kan.
[3] Diospa chanin kayninta mana yachasqankuraykutaqmi, kikinkuq chanin kayninkuta takyachiyta munarqanku. Chay hinapin, Diospa chanin kaynintaqa manapuni kasukurqankuchu.
[4] Kamachikuy Simiq tukukuyninqa, Cristollapunin. Chayrayku llapan paypi iñiqkunaq chanin kayninkuqa, payllapunitaq kanpas.
[5] Chanin kayqa, Kamachikuy Simipi kasqanmantan Moisesqa kay hinata qelqarqan: ‘Chay Kamachikuy Simipi kaqkunata kasukuq runaqa, chaykunata ruwaspanmi kawsanqa,’ nispan. (Lev. 18:5)
[6] Iñiypi chanin kay kaqtaqmi ichaqa, kay hinata nin: ‘Ama sonqoykipi niychu: “¿Pitaq hanaq pachamanri wichanqa?” nispaykiqa,’ nispa. (Deut. 30:12) Chay hina niyqa, Cristotapas: ‘uraykamuy,’ nispa nishawaq hinan kanman.
[7] Amallataq niypaschu: ‘¿Pitaq chinkay-chinkay ukhu pachamanri uraykunqa?’ nispaykiqa. (Deut. 30:13) Chay hina niyqa, Cristotapas: ‘wañusqakunamanta hatarimuy,’ nispa nishawaq hinan kanman.
[8] Ichaqa, ¿Qelqari imanintaq? Qelqaqa ninmi: ‘Qayllallaykipiñan simiykunaqa kashan. Hinallataq simiykipi, sonqoykipi imañan simiykunaqa kashan,’ nispa. (Deut. 30:14) Iñiymanta willakusqayku simiqa kaymi.
[9] Sichus simiykiwan Jesusqa Señorpuni kasqanta rimarinki, hinallataq payta wañusqakunamanta Diospa kawsarichimpusqanta sonqoykipi iñinki chayqa, qespisqan kanki.
[10] Chanin kaypi kanapaqqa, sonqowanmi iñina. Qespisqa kanapaqtaqmi ichaqa, simiwanpuni willakapuna.
[11] Qelqaqa ninmi: ‘Pikunachus paypi iñiqqa, manapunin p'enqachisqachu kanqa,’ nispa. (Isa. 28:16)
[12] Llapa runakunaq Señorninqa, kikin Señorpunin. Hinallataq hayk'an sutinta waqyakuqkunaq qhapaq Señorninpas payllataqmi. Chayraykun, judío runakunawan, mana-judío runakuna- wanpas, wakinta allinpaq, wakintataq pisipaq qhawariyqa manapuni kanchu.
[13] Pillapas Señorpa sutinta waqyakuqqa, qespichisqan kanqa. (Joel 2:32)
[14] Hinaqa, ¿imaynatataq Señormanta paypi mana iñishaspankuri waqyakunkuman? ¿Imaynatataq Señormanta mana uyarishaspankuri paypi iñinkuman? ¿Imaynatataq mana pipas willashaqtin Señormantari uyarinkuman?
[15] ¿Imaynatataq mana pipas kamachishaqtinri willamunkuman? Qelqapas ninmi: ¡Thak kay allin willakuyta willaqkunaq chakinkunaqa, may sumaqmi kanku! ¡Paykunaqa allin willakuypa allin kaq willakuyninkunatan willakunku! nispa. (Isa. 52:7)
[16] Ichaqa, manataqmi allin willakuytaqa llapachu kasukurqanku. Chaymi Isaiasqa nin: ‘Señor, ¿pitaq willakusqaykutari kreerqan?’ nispa. (Isa. 53:1)
[17] Chay hinaqa, uyariypa chawpintan iñiyqa hamun. Uyariytaqmi, Diospa siminpa chawpinta hamun.
[18] Ichaqa tapukunin: ‘¿Manachu uyarirqankuri? ¡Arí uyarirqankupunin!’ nispay. Qelqaqa ninmi: ‘Llapan hallp'a pachantinmanmi willaqkunaq kunkankuqa chayarqan. Hinallataq rimasqankupas, kay pachaq k'uchunpi tiyaqkunakamaraqmi chayarqan,’ nispa. (Sal. 19:4)
[19] Ichaqa tapukullanitaqmi: ‘¿Manachu Israel suyuqa chayta entiendirqan?’ nispay. Moisesmi ñawpaqtaraq Diospa nisqanta qelqarqan: ‘Mana llaqtay kaqta munakuspaymi, wañukunaykichispaqraq churasaykichis. Hinallataq, mana yuyayniyoq suyuwanmi k'arakta phiñakuymanraq churasaykichis,’ nispa. (Deut. 32:21)
[20] Isaiaspas, mana mancharikuspanmi, Diospa nisqanta nillarqantaq: ‘Mana maskhawaqniykunan tariwarqanku. Ñoqamanta mana tapukuqniykunamanmi rikuchikurqani,’ nispa. (Isa. 65:1)
[21] Israel suyumanta Diospa nisqantapas nillarqantaqmi: ‘Mana kasukuq, hinallataq kutipakuq llaqtamanmi ch'isiyaqnintin makiykunata mast'arirqani,’ nispa. (Isa. 65:2)