[1] Iñiyninchisraykun, Diosqa chaninman tukuchiwanchis. Chaymi, Señorninchis Jesucristoq chawpinta Dioswan thak kayninchisqa kapuwanchis.
[2] Iñiyninchisraykullataqmi, Señor Jesuspa chawpinta kay allinpaq qokuyninmanpas haykuyta atinchis. Chaypitaqmi allin takyasqa kashanchis. Hinallataq Diospa k'anchayninpi, suyakusqanchispi hatunchakuyniyoq kashanchis.
[3] Manataqmi chayllachu, aswanmi ñak'ariykuna pasiensiakuy rurusqanta yachaspanchis, ñak'ariykunapiña kashaspanchispas hatunchakunchis.
[4] Pasiensiakuyqa, yuyaysapa kaytan rurun. Yuyaysapa kaytaq, suyakuyta rurun.
[5] Hinallataqmi suyakuyqa, mana p'enqachinchu. Aswanpas, qowasqanchis Santo Espírituq chawpintan, sonqonchisman Diospa munakuyninqa hich'arimusqa karqan.
[6] Pisi-kallpayoqkuna kashaqtinchismi, Cristoqa tiemponpi mana Diosniyoq kashaqkunapaq wañurqan.
[7] May sasatapunin mayqen runapas huk chanin runarayku wañuyta atinman. Chay tukuywanpas, ñak'aytachá pillapas huk allin runarayku wañuytaqa atinman.
[8] Diosmi ichaqa, pay kikinpa munakuyninta ñoqanchispaq rikuchiwanchis. Hinaña huchasapakuna kasharqanchis chaypas, Cristoqa ñoqanchisraykun wañupuwarqanchis.
[9] Diosmi, Cristoq yawarninwan chaninmanña tukuchiwanchis. Chay hinaqa, aswantaraqmi Cristoq chawpinta k'arak phiñakuymantapas qespichiwasunchis.
[10] Diospa awqankuna kashaqtinchismi, payqa Churinpa wañuyninwan pay kikinwan allipunachiwanchis. Chay hinaqa, aswantaraqmi allipunachisqa kaspa, kawsayninwan qespichisqa kasunchis.
[11] Manan allipunachillawanchischu, aswanpas Señorninchis Jesucristoq chawpintan, Diospi hatunchakuyniyoq kayninchisqa kapuwanchis. Paypa chawpillantataqmi allipunachiytapas chaskinchisña.
[12] Chay hinaqa, imaynan kay pachaman hucha ch'ulla runaq chawpillanta haykumurqan. Huchaq chawpintataq wañuy chayamurqan. Chay hinallatataqmi, llapa runakunaq huchallikusqankurayku, wañuyqa llapa runakunaman chayamurqan.
[13] Manaraq Kamachikuy Simi kashaqtinpas, huchaqa kay pachapiñan kasharqan. Manaraq Kamachikuy Simi kashaqtintaqmi ichaqa, manapuni runaq kuentanman huchaqa churakunchu.
[14] Wañuyqa, Adanmanta Moiseskaman munaycha- kurqan. Adanqa, Diospa kamachikuynintan p'akirqan. Chaymi wañuyqa, mana chay hina huchallikuqkunapaqwanraq munaychakurqan. Adantaqmi, pichus usqhaylla hamunan karqan, paypa rikch'aynin karqan.
[15] Yanqallanmanta qokuyninqa, manan Kamachikuy Simi p'akiy hinachu. Ch'ulla runallaq Diospa kamachikuyninta p'akisqanraykun, askha runakuna wañurqanku. Chay hinan, aswantaraq Diospa allinpaq qokuynin, hinallataq yanqallanmanta qowasqanchispas aswan askhapaqraq kanqa. Chay allinpaq qokuyninqa, ch'ulla runa Jesucristollapin.
[16] Cheqaqtapunin ch'ulla runaq huchallikusqanraykulla, huchachayqa hamurqan. Diospa yanqallanmanta qokuyninmi ichaqa, Kamachikuy Simita sapa kuti p'akisqankumanta chaninman tukuchinanpaq hamurqan. Chayraykun qokuyninqa, mana chay huk runaq huchallikusqan hinallachu.
[17] Ch'ulla runaq huchallikusqanraykun wañuyqa munaychakurqan. Chay hinaqa, aswantaraqmi allinpaq qokuyninta, hinallataq chanin qokuyninta chaskiqkunapaqqa, sapallan Jesucristoq ruwasqanhawa kawsaypi kamachikunqaku.
[18] Chay hinaqa, imaynan ch'ulla runaq Kamachikuy Simita p'akisqallanwan llapa runakunaman huchachayqa hamurqan, chay hinallataqmi kikin Jesucristoq chanin ruwasqallan, llapa runakuna kawsanankupaq chaninman tukuchin.
[19] Imaynan ch'ulla runaq mana kasukusqanrayku askha runakuna huchayoq rikhurirqanku, chay hinallataqmi ch'ulla runaq kasukuyninraykulla askha runakuna chaninman tukuchisqa kanqaku.
[20] Huchaq askhayananpaqmi ichaqa, Kamachikuy Simi, kay pachaman haykumurqan. Hinaña hucha askhayasharqan chaypas, allinpaq qokuyqa aswan-aswantaraqmi askhayallarqantaq.
[21] Chay hina kaqtinqa, huchan wañuypaq munaychakurqan. Chay hinallataqmi, allinpaq qokuypas chanin kaypa chawpinta, hinallataq Señorninchis Jesucristoq chawpintawan wiñay kawsaypaq munaychakullarqantaq.