[1] Wawqe-panallaykuna, kaytaqa kamachikuy simita reqsiqkunamanmi rimashani. Kamachikuy simiqa, runaq kawsanankaman paymanta munaychakun. ¿Chayta manachu yacharqankichis?
[2] Kasarasqa warmiqa, qosan kawsanankamaqa kamachikuy simiwanmi qosanman hukllachasqa kashan. Qosan wañukapuqtinmi ichaqa, chay qosantawan hukllachaqnin kamachikuy siminmanta kacharichisqaña kapun.
[3] Chay hinaqa, sichus qosan kawsakushaqtin wak qhariwan kasarakapunman chayqa, wasanchaq warmi nispa sutiyasqan kanqa. Sichus qosan wañukapunqa chaymi ichaqa, chay kamachikuy simimanta kacharichisqaña kapun. Wak qhariwanña kasarakunqa chaypas, manan wasanchaq nispa sutiyasqañachu kanqa.
[4] Chay hinallataqmi qankunapas wawqe-panallaykuna, Cristoq kuerponpa chawpinta Kamachikuy Simipaqqa wañupurqankichisña. Qankunataqmi mayqenchus wañusqakunamanta kawsarimpuq Cristowanña hukllachasqa kankichis. Chay hinapin, ancha askha ruruta Diosninchispaq rurusunchis.
[5] Chay hinaqa, aycha kuerpoq munasqanman hina kawsashaqtinchismi, Kamachikuy Simiq chawpinta huchallikuyllapuni munaq kayninchisqa huchallikurqan. Chay hinapin, aycha kuerponchispa miembronkunapi wañuyta rururqan.
[6] Ñawpaqqa, Kamachikuy Simimanmi hap'ipasqa karqanchis. Kunantaqmi ichaqa, chay Kamachikuy Simipaqqa wañupunchisña. Hinan chaymantaqa, kacharichisqaña kanchis. Chay hinapin, manaña ñawpaq Kamachikuy Simi qelqatañachu serbinchis. Aswanpas Espírituq mosoq kamachikuynintañan serbishanchis.
[7] Chay hinaqa, ¿imanisunchistaq? ¿Kamachikuy Simiqa huchachu? ¡Imaynallanmantapas manapunin! Aswanmi mana Kamachikuy Simi kaqtinqa, ñoqapas manan imachus huchaqa kasqanta reqsiymanchu karqan. Chay hinaqa, manachus Kamachikuy Simi ninman karqan: ‘Aman munapayankichu,’ nispa, chayqa, munapayay hucha kasqantaqa manan yachaymanchu karqan. (Exo. 20:17)
[8] Maypichus mana Kamachikuy Simi kanchu, chaypin huchaqa wañusqa kashan. Chaymi huchaqa, Kamachikuy Simiq chawpinta, imaymananiraq lliw munapayaykunata ñoqapi paqarirachin.
[9] Chay hinaqa, huk tiempopin mana Kamachikuy Simiyoq kawsarqani. Kamachikuy Simi hamuqtintaqmi ichaqa, hucha kawsarimurqan, ñoqataq wañupurqani.
[10] Chay kikin kamachikuyqa, kawsanapaqmi karqan. Kunanmi ichaqa, wañunaypaq kasqanta yacharuni.
[11] Huchaqa, kamachikuyniyoqman tukuspallanmi q'otuwarqan. Hinan chay q'otuwasqanpa chawpinta wañuchiwarqan.
[12] Chay hinapin, cheqaqtapuni Kamachikuy Simiqa ch'uyapuni. Hinallataqmi kamachikuypas ch'uyapuni, chaninpuni, allinpunitaq kanpas.
[13] Chay hinaqa, ¿ñoqapaq allin kaqchu, wañuchiqniyman tukurapun? ¡Imaynallanmantapas manapunin! Aswanmi huchaqa, allin kaqpa chawpinta, hucha kasqanta reqsichikunanpaq ñoqapi wañuyta rikhurichin. Hinan kamachikuypa chawpinta huchaqa sinchi hucha kayman chayaspa wañuyta rikhurichin.
[14] Kamachikuy Simi espiritual kasqantaqa yachanchismi. Ñoqataqmi ichaqa, huchapakuq aycha runa kani. Chay huchapakuq aycha runa kayniypin huchaman bendesqa kani.
[15] Imachus munasqaytaqa, manan ruwanipunichu, aswanpas imachus mana munasqaytan ruwani. Chaymi imachus ruwasqaytaqa manapuni entiendinichu.
[16] Imachus mana munasqaytataqmi ichaqa ruwani. Chaywanmi, Kamachikuy Simiq allin kasqantaqa sut'inchani.
[17] Kunantaq ichaqa, manan ñoqañachu chay mana allin ruwaqqa kani. Aswanpas ñoqapi kashaq huchan chaytaqa ruwan.
[18] Allin kaqta ruwayllapuni munayqa, ñoqapi kashanmi. Allin kaqta hunt'aytaqmi ichaqa, mana kanchu. Chayraykun ñoqapi, huk niypiqa aycha kuerpoypi, allin kaq mana kashasqantaqa yachani.
[19] Allin kaq ruway munasqaytaqa manan ruwanichu. Mana munasqay mana allin kaqtataqmi ichaqa, ruwashallanipuni.
[20] Sichus ñoqaq mana munasqay kaqta ruwashallanipuni chayqa, manan ñoqañachu chaytaqa ruwashani. Aswanpas ñoqapi kashaq huchan chaytaqa ruwashan.
[21] Chay hinaqa, allin kaqtan ruwayta munashani. Mana allin kaqtaqmi ichaqa, ñoqapi kashallanpuni. Chay kamachikuy simitataqmi ñoqapi tarini.
[22] Chay hinaqa, ñoqaq ukhuypi kashaq runa kayniyman hinaqa, Diospa kamachikuynin simipin kusikuni.
[23] Kuerpoypa miembronkunapin ichaqa, huk niraq kamachikuy kashasqanta qhawarini. Chay kamachikuyqa, yuyayniypa kamachikuyninpa kontranpin maqanakushan. Hinan kuerpoypa miembronkunapi kashaq huchaq kamachikuyninwan, presochawan.
[24] ¡Ay ñoqa wakcha runamanta! ¿Pitaq wañuyman apaqniy kay aycha kuerpoymantari kacharichiwanqa?
[25] ¡Grasiastan Diosman qoni! Paymi Señorninchis Jesucristoq chawpinta kacharichiwanqa. Chay hinaqa, ñoqa kikiypas yuyayniywanqa Diospa kamachikuy simintan sirbini. Aycha kuerpoywantaqmi ichaqa, huchaq kamachikusqanta sirbini.