[1] Chay hinaqa, mayqenña kanki chaypas, ¡yaw runa! chaninchasqaykiwanmi manaña imanispa kutichikunaykipaqpas kanñachu. Qanpas runamasiykiq ruwasqantan kasqallantataq ruwanki. Chayrayku runamasiykita chaninchasqaykipi, qan kikiykitapuni huchachakushanki.
[2] Ichaqa, chay mana allinta ruwaspallapuni kashaqkunaq kontranpi cheqaq kaqman hina, Diospa taripaynin kasqantapas yachanchismi.
[3] ¡Yaw runa! qanpas chay mana allin ruwaq runakunata chaninchaq kashaspayki, qanpas kasqallantataq ruwashanki. ¿Diospa taripasqan kanaykimanta ayqeytachu qanri yuyaykushanki?
[4] Icha, ¿qhapaq sumaq sonqo kayninta, pasiensiayoq kayninta, suyaykukuq kayninta imachu pisipaq hap'ishanki? Hinallataq, ¿Diospa sumaq sonqo kayninwan yuyayman kutirikunaykipaq pusasqantachu manaqa yachanki?
[5] Ichaqa, rumiyasqa sonqoyoq kaqtiykin, hinallataq mana yuyayman kutirikuy munaq sonqoyoq kasqaykiwanmi, k'arak phiñakuyta qan kikiykipaq huñushanki. Chay k'arak phiñakuytaqa, Diosmi chanin taripay p'unchaypi rikhurichimunqa.
[6] Hinan payqa, sapanka hukman ruwasqanman hina pagapunqa.
[7] Allin ruwaykunallapipuni takyaspa, hatunchayta, allinpaq qhawariyta, mana ismuq kayta maskhaqkunamanqa, wiñay kawsaytan qonqa.
[8] Wakinkunaqa, huchatariyllapi purispankun, mana cheqaq kaqtachu kasukunku. Aswanpas mana chanin kaqtan kasukunku. Paykunamanmi ichaqa, phiñakuyninta, hinallataq k'arak phiñakuynintawanraq qonqa.
[9] Llapan mana allinta ruwashaspallapuni kashaq runakunapaqqa, hatun ñak'ariypiwan, llakikuypiwanmi kanqa. Chay phiñakuyninqa judío runakunapaqraqmi ñawpaqtaqa kanqa, chaymantañan mana-judío runakunapaqpas kallanqataq.
[10] Llapallan allin kaqta ruwaqkunapaqtaqmi ichaqa, allinpaq qhawariy, hatunchay, thak kay ima kanqa. Chayqa, judío runakunapaqraqmi ñawpaqtaqa kanqa, chaymantañan mana-judío runakunapaqpas kallanqataq.
[11] Hinaqa, wakin runata allinpaq qhawariyqa, wakintataq pisipaq qhawariyqa Diospaqqa manan kanchu.
[12] Chay hinaqa, llapa mana Kamachikuy Simiwan huchallikuqkunaqa, mana Kamachikuy Simillawantaqmi hatun llakikuyman chayanqaku. Hinallataqmi, llapa Kamachikuy Simipi kashaspa huchallikuqkunapas, Kamachikuy Simillawantaq chaninchasqa kanqaku.
[13] Diospa ñawpaqenpi chanin runaqa, manan Kamachikuy Simita uyariqkunallachu kanku. Aswanpas Kamachikuy Simita kasukuspa, chaywan chaninman tukuchisqa kaqkunan chaninqa kanqaku.
[14] Wakin mana-judío runakuna mana Kamachikuy Simita hap'iqkunapas, kikillankumantan Kamachikuy Simitaqa kasukunku. Kamachikuy Siminkuña mana kanchu chaypas, paykuna kikinkun kamachikuyninkuqa kanku.
[15] Paykunan, Kamachikuy Simiq ruwayninta sonqonkupi qelqasqa kashasqanta rikuchinku. Kikinkuq konsiensiankutaqmi, huchayoq kasqankutapas, otaq mana huchayoq kasqankutapas defiendispa sut'inchan.
[16] Chay imaymanakunaqa, runaq sonqon ukhupi huchankunata Jesucristoq chawpinta Dios chaninchanan p'unchaymi kanqa. Chayqa, allin willakuy willakusqayman hinan kanqa.
[17] Qhawarillaypas, qanqa judío runa nisqa sutiyoqmi kanki. Hinan Kamachikuy Simiman hap'ipakunki, Diospi hatunchakuyniyoqtaqmi kankipas.
[18] Kamachikuy Simipi allin yachachisqan karqanki. Qanqa Diospa munaynintan reqsinki. Hinallataq balorniyoq kaynintapas aswan allinmi ninkin.
[19] Qanqa, ñawsakunata pusaq kasqaykipi sonqo churayniyoqmi kashanki. Qanqa, tutayaqpi kashaqkunaq k'anchayninmi kanki.
[20] Qanqa, mana yuyayniyoqkunaq yuyaychaqnin, hinallataq wawakunaq yachachiqninmi kanki. Qanqa, cheqaq kaqtapas, Kamachikuy Simitapas allintapunin reqsinki.
[21] Chay hinaqa, qanpas hukkunata yachachiq kashaspa, ¿manachu qan kikiykita yachachikunki? Qanmi ninki: ‘Ama suwakuychu,’ nispa. ¿Qantaqchu ichaqa, suwakushankiraq?
[22] Qanmi ninki: ‘Ama wasanchaychu,’ nispa. Ichaqa ¿qan kikiykitaqchu wasanchashankiraq? ¿Idolokunata millakushaspaykichu, chay idolokunaq kanan wasikunamanta suwakuspa qhatushankiraq?
[23] Qan, Kamachikuy Simimanta rimaykachashanki, ichaqa Kamachikuy Simitataq p'akishanki. ¿Manachu chaywan Diostaqa pisinchashanki?
[24] Qelqaq nisqanwanqa tupanmi. Chay Qelqaqa ninmi: ‘Qankunahawan, mana-judío runakunaqa Diospa sutinta k'arakta k'aminku,’ nispa. (Isa. 52:5)
[25] Sichus Kamachikuy Simita kasukunki chaymi, sirkunsisionqa balisunki. Qanqa Kamachikuy Simitapas, sirkunsisiontapas chaskikurqankin. Kamachikuy Simitachus p'akinki chaymi ichaqa, chay chaskisqaykitapas yanqayachipunki.
[26] Chayrayku, sichus huk mana sirkunsidasqa runa Kamachikuy Simiq kamachikuyninkunata kasukunqa chayqa, ¿manachu Diosqa sirkunsidasqata hina qhawarinqa?
[27] Pichus kuerponpi mana sirkunsidasqa kashaspa, Kamachikuy Simita hunt'aq runan, qanta chaninchasunki. Qantaq Kamachikuy Simi qelqata hap'ishaspayki, hinallataq sirkunsidasqa kashaspayki, Kamachikuy Simita p'akiq kashanki.
[28] Judío runaqa manan patallan rikuna kaqchu, nitaqmi sirkunsidasqa kaqpas aychanpi sut'i reqsisqa kaqllachu.
[29] Cheqaq judío runaqa, manan kamachikuy qelqapichu sirkunsidasqa kashan, aswanpas sonqon ukhupi, espiritunpi iman sirkunsidasqaqa kashan. Hinallataqmi allinpaq qhawarisqa kayninpas, mana runakunamantachu hamun. Aswanpas Diosmantan hamun.