[1] Jesucristoq apostolnin kanaypaqmi, Diosqa munayninman hina, ñoqa Pablota waqyawarqan. Hinan wawqenchis Sostenespas ñoqawan kashallantaq.
[2] Korinto llaqtapi kashaq Diospa iñiq t'aqanmanmi qelqamuni. Qankunaqa, Cristo Jesuspi t'aqasqankuna kanaykichispaqmi waqyasqa karqankichis. Hayk'an tukuy cheqaspi Señorninchis Jesucristoq sutinta waqyakuqkunawan t'aqasqa kanaykichispaqmi, waqyasqa karqankichis. Señorninchis Jesucristoqa, ñoqanchispapas, paykunaqpas Señorninpunin.
[3] Dios Yayanchispa, hinallataq Señor Jesucristoq allinpaq qokuyninpas, thak kayninpas, qankunawanpuni kachun.
[4] Diospa allinpaq qokuyninta, Cristo Jesuspa chawpinta qankunaman qosqasunkichismantan, Diosniymanqa grasiasta qoshallanipuni.
[5] Llapan imaymanakunapin, tukuy rimakuyniykichispipas, tukuy imaymana yachasqaykichispipas, qhapaqya- chisqa karqankichis.
[6] Chay hinapin Cristomanta willakuyqa, qankunapi allin takyachisqa karqan.
[7] Chaymi, Señorninchis Jesucristo rikhurimunanta makilla suyakunaykichiskamaqa, manan Diospa ima qokuyninpas pisisunkichischu.
[8] Chaymantapas, Señorninchis Jesucristoq hamunan p'unchaykaman, mana imamanta huchachana kanaykichispaq Diosqa p'uchukaykama takyachisunkichis.
[9] Diosqa hunt'aqpunin. Payllataqmi, Churin Señorninchis Jesucristowan huk sonqolla kawsakunaykichispaqpas waqyarqasunkichis.
[10] Wawqe-panaykuna, qankunapurapi llapallaykichis sumaqta rimanaykukuspa, amaña t'aqanakuykunapas kashananpaq, Señorninchis Jesucristoq sutinpi balikuykichis. Aswanqa, cheqaqmantayá yuyaykusqaykichispipas, ima chaninchasqaykichispipas huk runa hinalla kashaychis.
[11] Wawqe-panallaykuna, Kloepa familiankunan qankunapurapi huchatariykuna kasqanta willawanku.
[12] Kaykunamantan rimashaniqa. Sapanka hukniykichismi ninkichis: ‘Ñoqaqa Pabloqmi kani,’ nispaykichis. Huk kaqtaq nin: ‘Ñoqaqa Apolospan kani,’ nispa. Huk kaqtaq nin: ‘Ñoqaqa Cefaspan kani,’ nispa. Huk kaqñataqmi nin: ‘Ñoqaqa Cristoqmi kani,’ nispa.
[13] ¿Cristori, t'aqa-t'aqachu kashan? ¿Pablotachu qankunaraykuri chakatarqanku? ¿Ichari, Pabloq sutinpichu bautisasqa karqankichis?
[14] Manan mayqenniykichistapas bautisarqaykichischu, aswanpas Crispotawan, Gayollatawanmi bautisarqani. Chaymantan Diosmanqa, grasiasta qoni.
[15] Chay hinapi mana mayqenpas ñoqaq sutiypi bautisasqa kasqanta rimashananpaqmi, mana mayqentapas bautisarqanichu.
[16] Chaymantapas, Estefanaspa familiankunallatan bautisallarqanitaq. Chaymanta aswantaqa, manan mayqen bautisasqaytapas yuyanichu.
[17] Cristoqa, manan bautisanaypaqchu, aswanpas allin willakuyta willanaypaqmi kachamuwarqan. Willayniyqa, manan yachaysapa simikunawanchu karqan. Mana hina kaqtinqa, kruspi Cristoq wañusqanchá mana baleq kanman.
[18] Wañuy ñak'ariyman riqkunapaq krusmanta willakuyqa, mana yuyayniyoqpa rimasqan hinapunin. Ñoqanchis qespisqa- kunapaqtaqmi ichaqa, Diospa atiynin kapuwanchis.
[19] Qelqaqa ninmi: ‘Yachaysapakunaq yachayninkutaqa, chinkachipusaqmi. Yuyaysapakunaq entiendisqankutapas wikch'upusaqmi,’ nispa. (Isa. 29:14)
[20] ¿Maypitaq yachaysapari kashan? ¿Maypitaq kamachikuy simita yachachiqri kashan? ¿Maypitaq kunan tiempopi churanakuqpas kashan? ¿Manachu kay pacha yachayta Diosqa mana yuyayniyoqpa rimasqanman hina tukurqachipun?
[21] Kay pacha runakunaqa, kikinkuq yachayninkuwanmi Diospa yachayniyoq kasqanta mana reqsirqankuchu. Chaymi, chay mana yuyayniyoq hina willakuyllawan iñiqkunata qespichiynin Diosmanqa allin rikch'akurqan.
[22] Judío runakunaqa, señalkunatan mañakunku. Griego runakunataqmi yachayta maskhanku.
[23] Ñoqaykutaqmi ichaqa, chakatasqa Cristomanta willakuyku. Paymi judío runakunapaqqa laq'akunanku, mana-judío runakunapaqtaq ichaqa, mana yuyayniyoqpa rimasqanman rikch'akun.
[24] Diospa waqyasqankunapaqmi ichaqa, judío runakunaña kaqtinkupas, otaq griego runakunaña kaqtinkupas, Cristoqa Diospa atiynin, hinallataq yachaynin kasqanta willakuyku.
[25] Hinaña Dios mana yuyayniyoq kanman chaypas, chay mana yuyayniyoq kayninqa, runakunaq yachaysapa kayninkumantapas aswan yachaysaparaqmi. Hinallataq, hinaña Dios pisi-kallpa kanman chaypas, chay pisi-kallpa kayninqa, runakunaq kallpasapa kayninkumantapas aswan kallpayoqraqmi.
[26] Chayraykun wawqe-panaykuna, qankunaqa Diospa waqyasqankuna kasqaykichista qhawakuychis. Aychaman hina qhawarisqaqa yachayniyoqkunapas, atiyniyoqkunapas, hinallataq ancha reqsisqa wiraqochakunapas manan askhachu waqyasqakunaqa kanku.
[27] Aswanmi Diosqa kay pachapi mana yuyayniyoq kaqkunallata, yachaysapakunata p'enqachinanpaq akllakurqan. Hinallataqmi Diosqa, kay pachapi pisi-kallpayoq kaqkunata akllakurqan. Chaytaqa, kallpasapakunata p'enqachinanpaqmi ruwarqan.
[28] Diosqa, kay pachapi pisichasqa kaqtawan, wikch'usqakunatawanmi akllakurqan. Mana imapaq baleqkunatataqmi, baleq kaqkunata ch'usaqyachinanpaq akllakurqan.
[29] Diospa ñawpaqenpi mana pipas umata hoqarinanpaqmi paykunataqa akllakurqan.
[30] Dios munaqtinmi, qankunapas Cristo Jesuspiqa kashankichis. Paytaqmi, ñoqanchispaq Cristo Jesusqa yachay kananpaq ruwarqan. Ñoqanchista chaninman tukuchiqninchispas, ch'uyanchaqninchispas, hinalla taq rantipapuqninchispas payllataqmi.
[31] Qelqaq nisqanman hina kananpaqmi, qelqasqa karqan. Chay Qelqataqmi nin: ‘Pipas hatunchakuyta munan chayqa, Señorpi hatunchakuchun,’ nispa. (Jer. 9:24)