[1] Llapan kamachikuqkunaqa Diosmanta hamuqmi. Hayk'an kamachikushaqkunapas Diospa churasqantaqmi kanku. Chayrayku, llapa runakuna, kamachikuqkunaman hinapuni, umalliq kamachikuqkunata kasukuchunku.
[2] Chay hinaqa, pipas kamachikuqpa kontranpi kaqqa, Diospa churasqanmanmi kontrallikushan. Chay kontrallikuqkunataqmi, paykuna kikinkupaq huchachayta chaskinqaku.
[3] Hatun kamachikuqkunaqa, manan allin kaq ruwaqkunata manchachinankupaqchu kanku. Aswanpas mana allin kaq ruwaqkunata manchachinankupaqmi kanku. Chayrayku, kamachikuqta mana manchakuspa kayta munanki chayqa, allin kaqta ruway. Hinan paypa hatunchasqan kanki.
[4] Kamachikuqqa, allinniykipaq Diosta serbiqmi. Sitaqchus mana allin kaqta ruwashanki chayqa, manchakuy. Manan yanqachu espadataqa apan. Aswanpas Diosta serbiq kasqanraykun, mana allin ruwaqkunata bengakuspa k'arak phiñakuywan kastigananpaq espadataqa apan.
[5] Chaymi kamachikuqtaqa kasukunaykichispuni. Manan, k'arak phiñakuyninraykullachu, aswanpas konsiensiaykichisraykun kamachikuqtaqa kasukunaykichis.
[6] Tribututa kobrasqankunawanmi kamachikuqkunaqa, mana p'itispa Diosta serbinku. Chaypaqmi chay tributotaqa paganaykichispuni.
[7] Pikunamanchus manu kasqaykichistaqa pagapuychis. Tributo paganaykichis kaqtinqa, pagaychis. Impuesto paganaykichis kaqtinpas, pagallaychistaq. Pikunatachus respetanaykichis kaqtinqa, respetaychis. Pikunatachus allinpaq qhawarinaykichis kaqtinpas, allinpaq qhawarillaychistaq.
[8] Amapuni pimanpas manuqa kaychischu. Aswanpas hukkuna-hukkunawan munanakuy manulla kaychis. Pipas runamasinta munakuqqa, Kamachikuy Simitan hunt'an.
[9] Kamachikuy Simiqa ninmi: ‘Aman wasanchankichu, aman runata wañuchinkichu, aman suwakunkichu, aman runamasiykita yanqa qasinmanta tumpankichu, aman munapayankichu,’ nispa. (Exo. 20:13-17) Hinallataq wakin kamachikuykunapas kay pisi simillapin huñusqa kashan. Nintaqmi: ‘Runamasiykitan qan kikiykita hinapuni munakunki,’ nispa. (Lev. 19:18)
[10] Runamasinta munakuqqa, manan ima mana allintapas runamasintaqa ruwanmanchu. Chay hinapin munakuyqa, Kamachikuy Simitapas hunt'an.
[11] Kunan kawsashasqanchis tiempota yachaspa, chaytaqa ruwasunchis. Puñushasqanchismanta rikch'arinanchis orasñataqmi kanpas. Iñikapuqtinchis Diospa qespichiwananchis orasmi qayllanchispiña kashan.
[12] Laqha-tutaqa tukukapushanñan. P'unchaytaqmi ichaqa, illarimushanña. Chayrayku, tutayaqpa ruwayninkunata wikch'upuspanchis, k'anchaypa armankunawan p'achallikusunchis.
[13] P'unchaypi hinapuni allinta purisunchis. Amataq saksapakuykunapichu, nitaq machaykunapichu purisunchis. Amataq qhelli puriykunapichu, nitaq aycha kuerpo mana watakuykunapichu purisunchis. Amallataq huchatariykunapichu, nillataq enbidianakuykunapipaschu purisunchis.
[14] Aswanpas Señor Jesucristomanta p'achallikuychis. Amataq aycha kuerpoq mana allin munasqankunata saksachinallaykichispaqchu yuyaykuychis.