[1] Chay hinaqa, ¿imanisunchistaq? ¿Imatataq machulanchis Abrahamri aycha mirayman hina tarirqan?
[2] Sichus Abrahamqa, ruwayninrayku chaninman tukuchisqa karqan chayqa, chaymanta rimaykachayta atinmanmi. Diospa ñawpaqenpin ichaqa, mana atinmanchu.
[3] ¿Imanintaq Qelqari? Qelqaqa ninmi: ‘Abrahamtaqmi Diosta kreerqan, hinan chaninpaq yupasqa karqan,’ nispa. (Gen. 15:6)
[4] Llank'aqpa pagonqa, manan yanqallan qoykusqa hinachu, aswanpas manukusqata pagay hinan.
[5] Ichaqa, mayqenpas allin kaqta mana ruwashaspalla, aswanpas mana Diosniyoq runata chaninman tukuchiqpi iñikuqqa kanmanmi. Sichus chay hina kanman chayqa, chay iñiyninraykun chaninpaq yupasqa kanqa.
[6] Diosmi runakunaq kuentanman, mana ruwaykunawan, paypa chanin kayninta yupan. Chay kusikuymantan Davidpas willakun.
[7] Nintaqmi: ‘Pikunachus Kamachikuy Simita mana kasukusqankumanta, pampachasqa kaqkunaqa, kusisamiyoqmi kanku. Hinallataq, pikunachus huchanku p'ampasqa kaqkunapas kusisamiyoqmi kanku.
[8] Pi runatachus Señorqa manaña hayk'aqpas huchankunamanta kikinpa kuentanman churanqañachu chayqa, chay runaqa, kusisamiyoqmi,’ nispan. (Sal. 32:1-2)
[9] Chay hinaqa, ¿chay saminchayri sirkunsidasqa kaqkunallapaqchu, icha mana sirkunsidasqa kaqkunapaqwanchu? Ninchismi: ‘Abrahamtaqa iñiyninraykun Diosqa chaninpaq yuparqan,’ nispanchis. (Gen. 15:6)
[10] ¿Hayk'aqtaq chaninpaq yupasqari karqan? ¿Manaraq sirkunsidasqa kashaqtinchu, icha sirkunsidachikusqan qhepatañachu? Manan sirkunsidachikusqan qhepatañachu, aswanpas manaraq sirkunsidasqa kashaqtinmi chaninpaq yupasqa karqan.
[11] Abrahamqa, manaraq sirkunsidasqa kashaspanmi, chay sirkunsisiontaqa señalta hina chaskirqan. Chay sirkunsisiontaqa, iñiyninpi chaninpaq yupasqa kananpaqmi, sellota hina chaskirqan. Chay señalqa, llapa mana sirkunsidasqa iñiqkunaq taytanku kananpaqmi karqan. Hinallataq, chay señalqa, iñiqkunaq iñiyninkuq chawpinta, kuentankuman churasqa kaspanmi, chaninpaq yupasqa karqan.
[12] Manan Abrahamqa sirkunsidasqa kaqkunaq taytallankuchu karqan. Aswanpas, mana sirkunsidasqa kashaspa, taytanchis Abraham hina iñiypi puriqkunaqpas taytallankutaqmi karqan. Abrahampa chay iñiyninqa, manaraq sirkunsidasqa kashaqtinmi karqan.
[13] Diosmi Abrahamman, hinallataq mirayninmanwan kay pachata erensiata chaskinankupaq prometirqan. Manan Kamachikuy Simiq chawpillantachu prometirqan. Aswanpas iñiymanta hamuq chanin kaypa chawpintan prometirqan.
[14] Sichus Kamachikuy Simipi kaqkunalla erensiata chaskiq kankuman karqan chayqa, iñiymi yanqayachisqa kapunman karqan. Chaymi prometisqanqa, mana balorniyoqchu kapunman karqan.
[15] Maypichus Kamachikuy Simi mana kanchu, chaypiqa Kamachikuy Simita p'akiypas manan kallantaqchu. Kamachikuy Simitaqmi ichaqa, k'arak phiñakuyllata rurun.
[16] Chaymi iñiyqa, Diospa allinpaq qokuyninpa chawpinta hamun. Chay hinapin, chay prometisqanqa, Abrahampa llapan mirayninpaq allin takyasqa kanqa. Chayqa, manan Kamachikuy Simipi kaqkunallapaqchu, aswanpas Abrahampa iñiyninpi kaqkunapaqwanmi kanqa. Hinan payqa, iñiypi llapanchispa taytanchis kapun.
[17] Qelqapas ninmi: ‘Askha suyukunaq taytanku kanaykipaqmi churarqayki,’ nispan. (Gen. 17:5) Hinaqa Diosmi, wañusqakunaman kawsay qoqqa, hinallataq imaymana manaraq kashaqkunatapas ñapas kashanmanña hina sutiyaqqa.
[18] Abrahamqa, manaña suyakuynin kashaqtinpas, suyakuspanmi kreerqan. Chay hinapin, askha suyukunaq taytanku kayman chayarqan. Chaytaqmi, imanispachus Dios payta nirqan, chaywan tupan. Diosqa nisqan karqan: ‘Mirayniykiqa kay hinapunin kanqa,’ nispan. (Gen. 15:5)
[19] Abrahamqa, kuerponña yaqa wañusqa hina kashaqtinpas, manan iñiyninpiqa pisi-kallpayarqanchu. Aswanpas yaqa pachak watayoqña Abraham kashaqtinpas, Saraq killanpas ch'akipusharqanña chaypas, manan iñiyninpiqa pisi-kallpayarqanchu.
[20] Nitaqmi Diospa chay prometisqanmantaqa, mana iñispanchu iskayarqan. Aswanmi Dios hatunchasqa kananpaq, iñiypi kallpachakurqan.
[21] Hinallataqmi Abrahamqa, Diospa ima prometisqantapas hunt'ananpaq atiyniyoq kasqanmantaqa manapuni iskayarqanchu.
[22] Chaymi, Abrahampa iñiyninqa chaninpaq yupasqa karqan.
[23] Manataqmi Abrahampa chaninpaq yupasqa kasqallanmantachu Qelqaqa qelqakurqan. Aswanpas ñoqanchispaqpas nishallantaqmi. (Gen. 15:6)
[24] Ñoqanchismi ichaqa, iñiyninchiswan chaninpaq yupasqa kasunchis. Señorninchis Jesusta wañusqakunamanta kawsarichimpusqanta ñoqanchisqa kreenchismi.
[25] Ñoqanchisqa, Kamachikuy Simita p'akiqmi kanchis. Chayraykun, Señor Jesucristoqa wañuyman hap'iykuchisqa karqan. Hinan chaninman tukuchiwananchispaq payqa kawsarichimpusqa karqan.