[1] Hinaqa, ¿judío runa kayniykiqa, wakinkunamanta aswan allinmanchu tukuchisunki? Sirkunsidasqa kaypas, ¿ima allintataq apamunri?
[2] Chaykunaqa, tukuy ancha allinkunatan apamun. Ñawpaqtaqa Diosmi, paypa siminkunata paykunaman qorqan.
[3] Paykunamanta wakinninkun, mana iñirqankuchu. ¿Chay hinari, chay mana iñiq kayninku, Diosqa hunt'aqpuni kayninta yanqayachinmanchu?
[4] ¡Imaynallanmantapas manapunin! Aswanmi llapan runakunaña llulla kaqtinkupas, ñawpaqtaraq Diosqa cheqaqpuni kachun. Qelqaqa ninmi: ‘Rimasqaykikunapi chaninman tukuchisqa kanaykipaq hinallataq, qanqa chaninchasuqtiykikupas atipankipuni,’ nispan. (Sal. 51:4)
[5] Ichaqa sichus ñoqanchispa mana chanin kayninchis, Diospa chanin kayninta sut'iman rikhurichin chayqa, ¿imanisunchistaq? ¿Mana chanin kaspanchu, Diosqa k'arak phiñakuyninta churan? Chaytaqa runakayllaypin nini.
[6] ¡Imaynallanmantapas manapunin! ¿Chay hina kaqtinri, imaynatataq Diosqa teqsi muyuntinpi runakunata chaninchanman?
[7] Ichaqa, sichus llulla kashaqtiy Diospa cheqaq kaynin, pay hatunchasqa kananpaq anchata askhayanman chayqa, ¿imanaqtintaq huchasapa nispari huchachawanman?
[8] ¿Imanaqtintaq manari nisunmanchu: ‘Mana allin kaqkunata ruwasunchis, hinan allin kaqkuna hamunqa,’ nispari? Chaymantan tumpawanku, wakintaqmi hinapunin ninku. Chay hina niq runakunata, Diospa huchachayninqa chaninpunin.
[9] Chay hinaqa, judío runakunatapas, mana-judío runakunatapas ñan huchachanchisña. Ninchistaq: Llapallankun huchaq kamachinpi kashanku, nispanchis. ¿Chay hinari, paykunamanta aswan allinchu kanchis?
[10] Qelqakunapas ninmi: Manapunin ch'ullallapas chaninqa kanchu.
[11] Manan pipas entiendiqqa kanchu. Manallataqmi pipas Diosta maskhaqpas kanchu.
[12] Llapallankun t'aqarikapuspa mana baleqman tukupunku. Manan pipas hukkunapaq allin kaqkunata ruwaqqa kanchu, Manapunin ch'ullallapas kanchu. (Sal. 14:1-3)
[13] Kunkankupas kicharayashaq aya p'ampana t'oqo hinan. Qallunkuwantaqmi q'otunku. (Sal. 5:9) Qallunkuq ukhunpitaqmi mach'aqwaypa benenon kashan. (Sal. 140:3)
[14] Siminkupas ñakaywan, phiñakuywan ima hunt'aykusqan kashan. (Sal. 10:7)
[15] Chakinkupas usqhayllatan runa wañuchiyman phawarin. (Prov. 1:16)
[16] Thuniy, hinallataq wakcha kayllapunin ñanninkupipas kashan.
[17] Manataqmi thak kay ñantapas reqsirqankuchu. (Isa. 59:7-8)
[18] Ñawinkupipas manallataqmi Diosta manchakuyqa kanchu, nispa. (Sal. 36:1)
[19] Kamachikuy Simipi kashaqkunaman, Kamachikuy Simiq lliw nisqantaqa yachanchismi. Chay hinapin llapa runaq siminqa wisq'asqa kanqa. Hinallataqmi teqsi muyuntinpi runakunapas Diospa huchachasqan kallanqataq.
[20] Kamachikuy Simiq chawpintataqmi huchataqa reqsinchis. Chaymi, Kamachikuy Simita ruwaykunaq chawpintaqa, manapuni Diosqa mayqen runatapas chaninmanqa tukuchinmanchu.
[21] Kunanmi ichaqa, Kamachikuy Simimanta wak, Diospa chanin kayninqa rikhurimun. Kamachikuy Simipas, Diospa rantinpi rimaqkunapas, chay chanin kaymantan willakunku.
[22] Wakinta allinpaq, wakintataq pisipaq qhawarinakuyqa manañan kanchu. Chaymi, iñiypa chawpinta, Jesucristopi llapa iñiqkunapaq, hinallataq llapankupipas Diospa chanin kayninqa rikuchikun.
[23] Llapallankun huchallikurqanku. Chayraykun, Diospa qhapaq k'anchayninmantaqa karupi kashanku.
[24] Diosmi, Cristo Jesuswan runakunata rantipapuspa, allinpaq qokuyninwan yanqallan chaninman tukuchin.
[25] Diosqa, pasiensianwanmi ñawpaq huchanchiskunata pampachawarqanchis. Cristo Jesuspa yawar hich'asqanpi iñiqtinchistaqmi, chaskinanpaq hina hunt'asqa pago kananpaq payta churarqan. Chay hinapin, Diosqa pay kikinpa chanin kayninta sut'incharqan.
[26] Chaykunataqa, kunan tiempopi chanin kayninta rikuchinanraykun ruwan. Chay hinapin Diosqa, chanin kasqanrayku, hinallataq chaninman tukuchiq kasqanrayku, pipas Jesuspi iñiqtaqa chaninman tukuchin.
[27] ¿Chayri, maypitaq rimaykachayqa kashan? Yanqayachisqañan kapun. ¿Mayqen kamachikuytaq yanqayachipunri? ¿Ruwaykunaq kamachikuynin hawachu? ¡Manapunin hayk'aqpas! Aswanpas iñiy kamachikuyllan yanqayachipun.
[28] Chay hinaqa, tukupunchis: Manan Kamachikuy Simita hunt'asqanraykuchu, aswanpas, iñiypa chawpintan Diosqa runata chaninman tukuchin.
[29] ¿Diosri, sapan judío runakunaq Diosnillankuchu? Manan, aswanpas mana-judío runakunaqpas Diosnillankutaqmi, riki.
[30] Diosqa, ch'ullallan. Paymi sirkunsidasqatapas, mana sirkunsidasqatapas iñiyninpa chawpinta chaninman tukuchinqa.
[31] Chay hinaqa, ¿Kamachikuy Simitari, iñiyninchiswanchu yanqayachipusun? ¡Imaynallanmantapas manapunin! Aswanmi Kamachikuy Simitaqa takyachinchis.