[1] Kunantaq ichaqa, Cristo Jesuspi kashaqkunapaqqa, manan ima huchachaypas kanchu. Paykunaqa, manan aychaq munayninman hinachu purinku. Aswanpas Espírituq munayninman hinan purinku.
[2] Cristo Jesuspi kawsay qoq Espírituq kamachikuyninmi, huchaq kamachikuyninmantapas, wañuymantapas kacharichiwan.
[3] Aychaq munayninraykun Kamachikuy Simiqa, mana atiyniyoq pisi-kallpa karqan. Chaymi Diosqa, Kamachikuy Simiq mana atisqanta ruwarqan. Diosqa, kikin Churintan huchapakuq aycha runata hina tukuchinanpaq, hinallataq huchamanta pago kananpaqwan kachamurqan. Chay hinapin huchanchisrayku, aycha kuerpopi huchataqa huchacharqan.
[4] Chay hinapin, Kamachikuy Simiq chanin kayninta ñoqanchispi hunt'ananpaq, Diosqa Churinta kachamurqan. Hinan ñoqanchisqa, mana aychaq munayninman hinañachu, aswanpas Espírituq munayninman hinaña purinchis.
[5] Aychaq munayninman hina kawsaqkunaqa, aychaq munayninkunallapin yuyaymananku. Espírituq munayninman hina kawsaqkunataqmi ichaqa, Espírituq kaqninkunapi yuyaymananku.
[6] Aychaq munayninman hina yuyaymanayqa, wañuymi. Espírituq munayninman hina yuyaymanaytaqmi ichaqa, kawsay, hinallataq thak kaypiwan kanku.
[7] Hinallataqmi, aychaq munayninman hina yuyaymanayqa, manan Diospa kamachikuy siminmanqa kasukunmanchu, nitaqmi kasukuytapas atinmanchu. Chayrayku, aychaq munayninman hina yuyaymanaqqa Diospa awqan kapun.
[8] Aychaq munayninman hina kawsaqkunataqmi, manapuni Diosta kusichiyta atinkumanchu.
[9] Qankunan ichaqa, mana aychaq munayninman hinachu kawsashankichis. Aswanpas, sichus Diospa Espíritun qankunapi tiyashan chayqa, Espírituq munayninman hinan kawsashankichis. Sitaqchus Cristoq Espíritun mayqenpipas mana kashanchu chayqa, chay runaqa manan Cristoqchu.
[10] Ichaqa Cristochus qankunapi kashan chayqa, kuerpoykichismi hucharayku wañusqa kashan. Hinallataq espirituykichispas, chanin kayhawa kawsashan.
[11] Jesusta wañusqakunamanta kawsarichimpuqpa Espiritunmi qankunapi tiyashan. Chay hinaqa, pichus Cristota wañusqakunamanta kawsarichimpuqmi, qankunapi tiyashaq Espiritunpa chawpinta wañupuq aycha kuerpoykichistapas kawsarichinqa.
[12] Chay hinaqa wawqe-panaykuna, manupunin kanchis. Ichaqa, manan aychaman hina kawsananchispaqchu, aychaq munayninman manuqa kanchis.
[13] Sichus aychaq munayninman hina kawsashankichis chayqa, wañupunkichispunin. Aycha kuerpoq ruwayninkunatachus Espirituwan wañuchipunkichis chaytaqmi ichaqa, kawsankichis.
[14] Pikunachus Diospa Espiritunpa pusasqankunaqa, Diospa wawankunan kanku.
[15] Manan wakmanta manchakuypi kanaykichispaqchu kamachi kay espiritutaqa chaskikurqankichis. Aswanpas wawachakuqniykichis Espiritutan chaskikurqankichisqa. Paypa chawpintan waqyakunchis: ‘¡Abba, Yayay!’ nispanchis.
[16] Kikin Espiritullataqmi, espiritunchiswan kuska Diospa wawankuna kasqanchistaqa willakunku.
[17] Sichus wawankunapuni kanchis chayqa, erensiata chaskiqkunan kanchis. Hinaqa, Diosmanta erensiata chaskiqkuna, hinallataq Cristoq erensiata chaskiqmasinkunan kallanchistaq. Sichus paywan kuska ñak'arisunchis chayqa, paywan kuskallataqmi hatunchasqa kasunchis.
[18] Kunan tiempopi ñak'ariyninchiskunaqa, manan hamuq tiempopi k'ancharinanchiswan wakichachikuy atikunmanchu. Chaytaqa yachanin. Chay k'anchariymi ñoqanchispi rikuchisqa kanqa.
[19] Kamasqataqmi, Diospa wawankuna rikhurichisqa kananta maki-makillapuni suyakushan.
[20] Hinallataq kamasqaqa manan kikinpa munayllanmantachu yanqayayman hap'ichisqa karqan. Aswanpas suyakuypi kananpaqmi, Diospuni munayninman hina yanqayaymanqa hap'ichirqan.
[21] Hinallataqmi, kikin kamasqapas ismuq kaypa kamachi kayninmanta kacharichisqa kanqa. Hinan Diospa wawankunaq k'ancharishaq kacharichisqa kasqanpi kanqaku.
[22] Tukuy kamasqan ch'ulla kunkalla llakipakuspa waqasqantaqa yachanchismi. Hinallataq imaynan wachakuq warmi nanayta muchun, chay hinallataqmi kunankama sinchita muchusqantapas yachallanchistaq.
[23] Manan kamasqallanchu llakipakuspa waqashan. Aswanpas, Espírituq ñawpaq kaq ruruyninta chaskikuqkuna kashaspapas, ñoqanchis kikinchismi llakipakuspa waqashallanchistaq. Diospa wawachakapuwananchistan suyakushanchis. Hinallataq aycha kuerponchis rantipapusqa kanantan suyakushanchis.
[24] Suyakuypi qespichisqan karqanchis. Rikushasqanchispi suyakuymi ichaqa, mana suyakuyñachu. ¿Pitaq ña rikusqanpiñari suyakushallanman?
[25] Ichaqa, sichus mana rikusqanchista suyakushanchis chayqa, pasiensiawanpuni suyakushasunchis.
[26] Kikin Espiritullataqmi, pisi-kallpa kayninchispi yanapaykuwanchis. Imaynatachus Diosman parlaykunanchistaqa manan yachanchischu. Ichaqa kikin Espiritupunin mana atina rimaykunawan, llakipakuy waqaywanraq ñoqanchispaq rimapayapuwanchis.
[27] Ichaqa pichus sonqokunata t'aqwiqllan, imachus Espírituq yuyaykusqankunatapas yachan. Paytaqmi, Diospa munayninman hina t'aqasqakunapaq rimapayan.
[28] Tukuy imaymanakunapas Diosta munakuqkunaq allinninpaq kasqantaqa yachanchismi. Chayqa, paypa yuyaykusqanman hina waqyas qakunapaqmi.
[29] Pikunatachus ñawpaqmantapacha reqsisqankunatan, qallariymantapacharaq akllarqan. Paykunallatataqmi, Churinman rikch'ayniyoqta ruwananpaq akllarqan. Chaykunataqa, askha wawqe-panapurapi phiwi Churin kananpaqmi ruwarqan.
[30] Pikunatachus qallariymantapacha akllarqan, paykunallatataqmi waqyarqan. Pikunatachus waqyarqan, paykunallatataqmi chaninman tukuchirqan. Pikunatachus chaninman tukuchirqan, paykunallatataqmi hatuncharqanpas.
[31] Chay hinaqa, ¿kay imaymanakunamantari imanisunchistaq? Sichus Dios ñoqanchismanta kashan chayqa, ¿pitaq ñoqanchispa kontranchispiri kanman?
[32] Diosqa, manan pay kikinpa Churin qoyta mich'akurqanchu. Aswanpas llapanchisraykun payta hap'ichirqan. Chay hinaqa, ¿imaynataq manari Churinmanwan kuskata tukuy imaymanakunata yanqallan qowasunmanchu?
[33] Diosmi runata chaninman tukuchiqqa. Chay hinaqa, ¿pitaq Diospa akllasqankunatari yanqanmanta huchachanman?
[34] Criston wañurqan. Chaymantapas payllataqmi kawsarimpurqan. Payllataqmi, Yayaq paña ladonpipas kashan. Ñoqanchispaqtaqmi Diosman parlapushawanchis. Chay hinaqa, ¿pitaq huchachaqri kanman?
[35] ¿Pitaq Cristoq munakuyninmantari t'aqawasunman? ¿Ñak'ariychu? Icha, ¿llakikuychu? Icha ¿qatiykachasqa kuychu? Icha ¿yarqaychu? Icha ¿mana p'achayoq kaychu? Icha ¿peligropi kaychu? Icha ¿espadachu?
[36] Qelqapas ninmi: ‘Qanraykun tukuy tiempo wañuchiwanku. Nak'anaman apanapaq obehakuna hinan, qhawasqa kayku,’ nispan. (Sal. 44:22)
[37] Tukuy chay imaymanakunapin ichaqa, munakuqninchispa chawpinta aswan atipaqkunapuni kanchis.
[38] Mana imapas Diospa munakuyninmanta t'aqayta atiwananchispin sonqo churayniyqa kashan. Chay hinaqa, manan wañuypas, nitaq kawsaypas, nitaq angelkunapas, nitaq hatun umalliqkunapas, nitaq atiyniyoqkunapas, nitaq kunan kaqkunapas, nillataq hamuq kaqkunapas, Diospa munakuyninmantaqa t'aqayta atiwasunmanchu.
[39] Hinallataq manapunin wichay-niqkunapi kaqkunapas, nitaq ukhu pacha-niqkunapi kaqkunapas, nillataq ima kamasqa kaqkunapas Señorninchis Cristo Jesuspi Diospa munakuyninmantaqa t'aqayta atiwasunmanchu.