[1] Mana llullakuspaymi, cheqaqtapuni Cristopi rimani. Konsiensiaytaqmi Santo Espiritupi chaytaqa willawan.
[2] Sinchi llakikuyniy, hinallataq mana thaniq sonqo nanayniymi kapushawan.
[3] Ñoqa kikiypas, aychaman hina llaqtamasiy wawqe-panaykunarayku, Cristomanta t'aqakuytaqa, hinallataq ñakasqa kaytapas munaymanmi.
[4] Paykunaqa, Israelpa mirayninkunan kanku. Diospa wawachakapusqanpas, k'anchariypas, rimanakuykunapas, Kamachikuy Simipas, Diosta sirbiypas, promesakunapas paykunaqmi.
[5] Paykunallaqtaqmi Israelpa ñawpa taytankunapas kanku. Chay hinallataqmi Cristopas, aycha mirayman hinaqa, paykunamanta hamurqan. Cristoqa, tukuy imaymanakunaq Diosninmi. Payllapunitaq wiñay-wiñaypaq saminchasqa kachun. Ahinapuni kachun.
[6] Diospa siminqa, manapunin pantanmanchu. Ichaqa, manan llapan Israelmanta naseqkunachu cheqaq Israelpa mirayninkunaqa kanku.
[7] Nitaqmi Abrahampa mirayninkuna kaspachu, llapallaqa paypa churinkuna kanku. Aswanpas Diosqa nirqanmi: ‘Isaakpin mirayniykitaqa askhayachisaq,’ nispan. (Gen. 21:12)
[8] Chay hinaqa, manan aycha mirayman hina kaqkunallachu Diospa wawankunaqa kanku. Aswanpas prometisqan kaqkunan Israelpa cheqaq mirayninkuna nispa yupasqakunaqa kanku.
[9] Prometisqan simikunaqa ninmi: ‘Kay huk tiempomantan kutimusaq, hinan Saraqa huk qhari wawayoq kanqa,’ nispan. (Gen. 18:10)
[10] Manataqmi chayllapaschu, aswanqa Rebekapas huk runa taytanchis Isaakmantan wiksallikurqan.
[11] Hinaña, Rebekaq wawankuna manaraq nasesharqanchu chaypas, Diosmi payta rimaykurqan. Chay wawakunaqa, manaraqmi allin kaqtapas, nitaq mana allin kaqtapas ruwarqankuraqchu. Chay hinapin Diosqa, yuyaykusqanman hina, akllakusqankuna takyasqa kanankupaq rimaykurqan. Manan paykunaq ruwayninkuraykuchu, aswanpas Diospa waqyasqan kasqankuraykun.
[12] Diosmi Rebekata nisqa karqan: Kurak kaqmi, sullk'a kaqta serbinqa, nispa. (Gen. 25:23)
[13] Qelqapas ninmi: ‘Jakobtan munakurqani, Esautataqmi ichaqa, cheqnikurqani, ’ nispa. (Mal. 1:2-3)
[14] Chay hinaqa, ¿imanisunchistaq? ¿Mana chanin kayri Diospi kanmanchu? ¡Imaynallanmantapas manapunin!
[15] Moisestan Diosqa nisqa karqan: ‘Pitachus yanapaykuyta munasaq chayqa, paytan yanapaykusaq. Hinallataq, pitachus khuyapayayta munasaq chayqa, paytan khuyapayasaq,’ nispan. (Éxo. 33:19)
[16] Chay hinaqa, manan munaq runamantachu, nitaq phaway munaq runamantapaschu chaykunaqa kanku. Aswanpas yanapaykuyninta rikuchiq Diosmantan kanku.
[17] Faraonmantaqmi Qelqaqa nin: ‘Kaypaqpunin hatarichirqayki. Qanpi atiyniyta rikuchinaypaq, hinallataq llapan hallp'a pachantinman sutiymanta willakunanpaqmi hatarichirqayki,’ nispan. (Exo. 9:16)
[18] Chay hinaqa, Diosmi pitachus yanapaykuyta munan chayqa, payta yanapaykun. Piqpa sonqontachus rumiyachiyta munan chaytaqmi ichaqa, payta rumiyachillantaq.
[19] Chay hinaqa, niwankichá: ¿Imanaqtintaq Diosri huchachan? ¿Pitaq munayninpa kontranpiri hatarinman? nispayki.
[20] Ñawpaqtaraqqa, ¡yaw runa! Diospa kontranpi churanakunaykipaq, ¿qanri pitaq kanki? T'urumanta ruwasqa qero, ruwaqninta ninmanchu: ¿Imanaqtintaq kay hinatari ruwawanki? nispa.
[21] Icha, ¿manachu raqch'i ruwaqqa, kasqan t'urullamantataq munasqanman hina ruwayta atinman? ¿Manachu huk kaq qerota allinpaq qhawarisqa kananpaq, huk kaq qerotataq pisipaq qhawarisqa kananpaq ruwaytaqa atinman?
[22] Chay hinaqa, ¿imanisunchistaq? Diosmi k'arak phiñakuyninta, hinallataq atiyniyoq kayninta reqsichiyta munarqan. Ichaqa ancha pasiensiayoq kaspanmi, chhallunapaq wakichisqa kaq k'arak phiñakuy qerokunatapas mana chhallurqanchu.
[23] Hinallataq, ñawpaqmantaraqmi Diosqa allinpaq qhawarisqa qerokunata k'ancharinanpaq wakichirqan. Qhapaq k'anchayninta yanapaykusqan qerokunaman reqsichinanpaqtaqmi chaytaqa ruwarqan.
[24] Chay qerokunaqa, ñoqanchismi kanchis. Judío runakunamanta, hinallataq mana-judío runakunamantapas Diosqa waqyawarqanchismi.
[25] Oseas Qelqapipas Diosqa nillantaqmi: ‘Mana llaqtaytan, llaqtaymi nispa sutiyasaq. Mana munakusqaytataq, munakusqaymi nispa nisaq,’ nispan. (Ose. 2:23)
[26] Nillantaqmi: ‘Kay hinan pasanqa. Ñoqan nisaq: “Qankunaqa manan llaqtaychu kankichis,” nispay. Hinallataq maypichus chaytaqa nirqani, chayllapitaqmi nisaq: “Kawsaq Diospa wawankunan kankichis,” nispay,’ nispa. (Ose. 1:10)
[27] Isaiaspas, Israel llaqtamantaqa kay hinatan willakullarqantaq: ‘Hinaña Israelpa wawankuna, mama-qochapi mana yupay atina, aqo hinaraq kanqa chaypas, paykunamanta puchuqllan qespichisqankunaqa kanqaku.
[28] Señormi, siminkunata chanin kaywan, usqhayllamanpuni hunt'anqa. Hinallataqmi, hallp'a pachapi siminkunatapas usqhayllamanpuni ruwanqa,’ nispa. (Isa. 10:22-23)
[29] Ñawpaqmantapacharaqmi Isaiasqa nillarqantaq: ‘Ejersitokunaq Señornintaqchus mirayninchista mana saqewasunmanchu karqan chayqa, Sodoma llaqta hinaraqmi kasunman karqan. Hinallataq Gomorra llaqta hinaraqmi kasunman karqan,’ nispa. (Isa. 1:9)
[30] Chay hinaqa, ¿imanisunchistaq? Chay chanin kayta, mana qatikuq, mana-judío runakunaqa chanin kaymanmi ayparqanku. Huk niypiqa, chay chanin kaymanqa, iñiyllawanmi ayparqanku.
[31] Israel llaqta runakunataqmi ichaqa, chay chanin kaytaqa, Kamachikuy Simipi chanin kaywan qatikurqanku. Manataqmi ayparqankuchu.
[32] ¿Imanaqtintaq manari ayparqankuchu? Chay chanin kaytaqa, manan iñiywanchu qatikurqanku. Aswanpas Kamachikuy Simiq nisqanta ruwaspallankun qatikurqanku. Chayraykun, misk'achiq rumipi misk'akurqanku.
[33] Qelqaqa ninmi: ‘Qhawariychis, Sionpin huk misk'achiq rumita, hinallataq urmachiq qaqata churani,’ nispa. (Isa. 8:14) Nillantaqmi: ‘Pipas paypi iñiqqa, manan p'enqachisqachu kanqa,’ nispa. (Isa. 28:16)