[1] Chay hinaqa, tapukunin: ‘¿Diosri, llaqtanta wikch'upurqanchu?’ nispay. ¡Imaynallanmantapas manapunin! Ñoqa kikiypas Israel llaqtayoqmi kani. Abrahampa mirayninmi kani. Hinallataq Benjaminpa ayllunmantan kani.
[2] Ñawpaqmantapacharaq reqsisqan llaqtanta Diosqa manan wikch'upunchu. Icha, ¿manachu Israelpa kontranpi Eliaspa Diosta imaynatachus kihakuspa nisqanmanta Qelqaq nisqanta yachankichis?
[3] Eliasqa nirqanmi: ‘Señor, rantiykipi rimaqkunatan wañuchinku, altarniykikunatapas thuniyunkun. Ñoqa sapallayñataqmi qhepakuni. Hinan wañuchiwanankupaq maskhashawanku,’ nispan. (I Rey. 19:10, 14, 18)
[4] Ichaqa, ¿imanispataq Diosri kutichirqan? Diosqa nirqanmi: ‘Baal diospa ñawpaqenpi mana qonqorikuq, qanchis waranqa qharikunatan ñoqapaq waqaychakurqani,’ nispan. (I Rey. 19:18)
[5] Chay hinallataq, kunan kay tiempopipas, allinpaq qokuyninwan akllakusqan huk puchuq t'aqaqa kashanraqmi.
[6] Allinpaq qokuywanchus kanman chayqa, manañan ruwaykunawanñachu kanman. Mana hinaqa, allinpaq qokuymi mana allinpaq qokuyñachu kanman. Ichaqa, ruwaykunawanchus kanman chayqa, manan allinpaq qokuywanñachu kanman. Mana hina kaqtinqa, ruwayqa manan ruwayñachu kanman.
[7] Chay hinaqa, Israel llaqtan imachus maskhasqanta mana tarirqanchu. Diospa akllakusqankunataqmi ichaqa, tarirqanku. Wakinkunataqmi sonqonku rumiyachisqa karqanku.
[8] Qelqaqa ninmi: ‘Diosmi, paykunata kunan p'unchaykama ñawinkupas mana rikunanpaq, hinallataq ninrinkupas mana uyarinanpaq, mana reparaq espirituta qorqan,’ nispa. (Deut. 29:4)
[9] Davidpas nirqanmi: ‘Mikhunanku mesapas toqllaman, hap'ina llikaman, misk'achinaman, hinallataq kastigoman tukupuchun.
[10] Ñawinkupas mana rikunankupaq tutayapuchun. Wasankupas wiñaypaq qhopuyapuchun,’ nispan. (Sal. 69:22-23)
[11] Chay hinaqa tapukunin: ‘¿Israel llaqtayoq runakunaqa, urmanankupaq manachu misk'akurqanku?’ nispay. ¡Imaynallanmantapas manapunin! Aswanmi Kamachikuy Simita p'akisqankurayku, mana-judío runakunaman qespikuyqa hamurqan. Chaymantataqmi, judío runakunaqa wañukuywanraq kashanku.
[12] Kamachikuy Simita p'akiyninkutaqmi ichaqa, kay pacha runakunaman qhapaq kaykunata apamurqan. Hinallataq urmayninkupas mana-judío runakunaman qhapaq kaykunata apamurqan. Chay hinaqa, ¿manachu Diospa wakmanta hunt'asqapi hatarichiyninqa aswan allinninkupaqraq kanqa?
[13] Mana-judío runakuna, qankunamanmi niykichis: ‘Manajudío runakunaq apostolninmi kani. Chaymi, Diospa qowasqan llank'anaytaqa allinpaq qhawarini,’ nispay.
[14] Sichus imaynapipas aychaman hina llaqtamasiykunata wañukunankupaqraq munapayachiyman chayqa, Diospa qowasqan llank'anaytaqa, manan pisipaq qhawarisqa kananta munanichu. Wakin judío runamasiykunata qespichinaypaqmi Diospa qowasqan llank'anaytaqa allinpaq qhawarini.
[15] Wikch'usqa kayninkutaqchus, kay pachantin runakunata Dioswan allipunachin chayqa, huktawan chaskisqa kayninkuqa ¿manachu wañusqakunapuramanta kawsay kanqa?
[16] Sichus ñawpaq kaq rurun ch'uya t'aqasqa kashan chayqa, llapanmi ch'uya t'aqasqa kashallantaq. Sichus saphinkuna ch'uya t'aqasqa kashan chayqa, k'allmankunapas ch'uya t'aqasqallataqmi kashanku.
[17] Ichaqa, wakin k'allmakunaqa wit'upusqan karqanku. Sichus k'ita olibos kashaspayki, chay wit'usqaman watasqa karqanki chayqa, chay olibos mallkiq saphinmantawan, ununmantawan kawsanaykipaqmi watasqa karqanki.
[18] Chay hinaqa, k'allmakunaq kontranpiqa ama hatunchakuychu. Ichaqa, sichus hatunchakunki chayqa, kayta yuyariy: Manan qanchu saphintaqa kawsachishanki. Aswanpas saphinmi qanta kawsachishasunki.
[19] Hinaqa ninkipaschá: ‘Diosmi ñoqata chay wit'usqanman watapuwananpaq chay k'allmakunata wit'upurqan, nispayki.
[20] Manan chay hinachu, aswanpas mana kreesqankuraykun wit'usqa karqanku. Qantaq ichaqa, iñiyniykiwan kikin mallkipiña kashanki. Chay hinaqa, ama hatunchakuychu, aswanpas manchakuy.
[21] Sichus Diosqa, kikin mallkiq k'allmankunata mana pampacharqanchu chayqa, manallataqmi qantapas pampachasunkimanchu.
[22] Chayrayku, Diospa sumaq sonqo kayninta, hinallataq phiñakuq kaynintapas qhawariy. Cheqaqtapuni phiñakuyninqa urmayuqkunapaqmi. Ichaqa, sichus sumaq sonqo kayninpi takyankichis chayqa, qanpaqmi chay sumaq sonqo kayninqa kanqa. Mana hina kaqtinqa, qanpas wit'usqallataqmi kapuwaq.
[23] Chay wit'usqa kaqkunan, kunanqa mana kreenkuchu. Ichaqa, sichus chay hina mana iñiyninkupi manaña kashallanqakupunichu chayqa, Diosmi wakmanta wit'usqa kaqkunata wataykapunqa. Chay wit'usqa kaqkunata wakmanta wataykapunanpaq Diosqa atiyniyoqmi.
[24] Sichus qanta, k'ita olibosmantapuni wit'umuspan, kikin sach'aq kontranpi kashaqtiyki, wit'usqanman wataykurqasunki chayqa, aswantaraqchá kikinmanta wit'usqan k'allmakunataqa, kasqan wit'usqa mallkiman wataykapunqa.
[25] Wawqe-panaykuna, kikiykichispa yuyayniykichispi yachaysapaman tukuq kanaykichistaqa, manan munanichu. Chayraykun kay pakasqa yachayta yachanaykichista munani. Mana-judío runakunaq yupaynin hunt'asqa kanankaman Diosqa, Israel llaqtayoq askha runakunaq sonqonta rumiyachirqan.
[26] Chaymantañan, llapan Israel llaqtaqa, qespichisqa kanqa. Qelqasqan kashan: ‘Sionmantan kacharichiqqa hamunqa. Jakobpa millay huchankunatataqmi qechupunqa.
[27] Paykunaq huchankuta pampachasqaytaqmi, paykunawan rimanakuyniyqa kanqa,’ nispan. (Isa. 59:20-21)
[28] Chay hinaqa, allin willakuyman hinan, qankunarayku paykunaqa awqakunaman tukupunku. Akllasqanman hinataqmi ichaqa, machulankurayku munakusqanpuni kanku.
[29] Diosqa, qokuykuna qowasqanchistapas, waqyawasqanchistapas, manan qechukapuwasunmanñachu.
[30] Qankunapas huk tiempopiqa, Diosta mana kasukuqkunan karqankichis. Kunantaqmi ichaqa, paykunaq mana kasukusqankurayku, Diospa yanapaykuyninman ayparqankichis.
[31] Qankunaman yanapaykuyninta qosqasunkichisraykun, paykunamanpas yanapaykuyninqa qosqa kanqa. Chaypaqmi paykunaqa, kunan tiempopi mana kasukuqman tukuchisqa kallankutaq.
[32] Diosqa, llapallan runakunata yanapaykunanpaqmi, llapan runakunataqa mana kasukuqman tukuchirqan.
[33] ¡Diospa qhapaq kayninpas, hinallataq yachayninpas, tukuy reqsiyninpas, may hatunpunin! ¡Manapunin chaninchaynin chawpimanqa haykuyta atisunmanchu, nitaq ñanninkunatapas entiendiytaqa atisunmanchu!
[34] Qelqaqa ninmi: ‘¿Señorpa yuyaykusqantari, pitaq entiendirqan? ¿Pitaq yuyaychaqnin kaymanri ayparqan?’ nispa. (Isa. 40:13)
[35] Nillantaqmi: ‘¿Pitaq Diosmanta premiota chaskinanpaqri, ñawpaqmantaraq payman pagota qorqan?’ nispa. (Job 41:11)
[36] Chay hinaqa, tukuy imaymanakunapas paypan, paypa chawpintan, payllapaqtaqmi kanpas. Chayrayku, wiñaywiñaypaq, yupaychaypas payllamanpuni kachun. Ahinapuni kachun.