[1] Hinan Jesusqa, wakmanta judío runakunaq huñukunanku wasiman haykurqan. Chaypitaq ch'akisqa makiyoq huk runa kasharqan.
[2] Sábado p'unchaypitaqmi, Jesusqa qhaliyachinmanchus chayta, makilla fariseokunaqa qhamiyasharqanku. Chayman hina huchachanankupaqmi qhamiyasharqanku.
[3] Jesustaq ch'akisqa makiyoq runata nirqan: —Sayariy, hinaspa chawpipi sayaykuy, nispa.
[4] Hinaspataq chay runakunata nirqan: —¿Imataq sábado p'unchaykunapi Kamachikuy Simiman hinari atikun? ¿Allin ruwaychu, ichari mana allin ruwaychu? Hinallataq, ¿kawsachiyraqchu, ichari wañuchiychu? nispa. Paykunataq ichaqa, upallalla karqanku.
[5] Jesustaqmi muyuriqninpi kaqkunata phiñakuywan qhawarirqan. Rumi-sonqo kasqankuraykun, Jesusqa anchatapuni llakikurqan. Hinan chay runata nirqan: —Makiykita haywarimuway, nispa. Paytaq haywarirqan. Chay hinapin, hukkaq makin hina, imankaq qhali kapurqan.
[6] Chayllamanmi fariseokunaqa, Herodespa qatikuqninkunapiwan lloqsirqanku. Hinan paykunaqa, imaynanmanta wañuchinankupaq Jesuspa kontranpi rimanakurqanku.
[7] Hinan Jesusqa, yachachisqankunapiwan qocha ladoman ripurqanku. Galilea probinsiamantataq, ancha askha runakuna payta qatikurqanku.
[8] Tukuy imaymananiraq ruwasqankunata uyarispankutaq, Judea probinsiamanta, Jerusalén llaqtamanta, Idumea probinsiamanta, Jordán mayuq wak ladonkunamanta, Tiro, hinallataq Sidón llaqtakunaq muyuriqninkunamanta ima, ancha askha runakuna payman rirqanku.
[9] Chay askha runakuna payman ama mat'inaykukunankupaqtaqmi, Jesusqa yachachisqankunata nirqan: ―Barkaqa listullapuni kashachun, nispa.
[10] Askha onqosqakunatan Jesusqa qhaliyachisqa karqan. Chaymi payta llamiykunankupaq, tukuy sinchi plagawan ñak'ariqkunaqa pay pataman wikch'uykukurqanku.
[11] Qhelli supaykunataq payta rikuspanku, ñawpaqenman wikch'uykukuspa qonqorikurqanku. Qaparispankutaq nirqanku: —¡Qanqa Diospa Churinmi kanki! nispanku.
[12] Jesustaq ichaqa, ama pimanpas payqa Diospa Churin kasqanta sut'inchanankupaq, chay supaykunata allin-allintapuni kamachirqan.
[13] Hinan orqo pataman Jesusqa wicharqan. Hinaspataq pikunatachus munarqan, paykunata waqyarqan. Paykunataqmi Jesusman rirqanku.
[14] Paywan kuska kanankupaqwan, Diospa simin willaqta kachananpaqwanmi, chunka iskayniyoqta akllarqan.
[15] Hinallataq onqosqakunatapas qhaliyachinankupaq, supaykunatapas qarqonankupaq kamachikuyniyoq kayta qorqan.
[16] Hinan Simonta akllarqan. Paytan Pedro sutiwan suticharqan.
[17] Zebedeoq churin Jakobotawan, Jakoboq wawqen Juantawan akllarqan. Paykunatataq Boanerges sutiwan suticharqan. Chayqa, pacha t'oqyaypa Churinkuna ninantan nin.
[18] Hinallataq Andresta, Felipeta, Bartolometa, Mateota, Tomasta, Alfeoq churin Jakobota, Tadeota, Zelote nisqa t'aqamanta Simontawan akllarqan.
[19] Hinallataq Judas Iskariotetapas akllallarqantaq. Paymi Jesusta hap'ichiqqa karqan.
[20] Hinan huk wasiman haykurqanku. Askha runakunataq wakmanta huñukurqanku. Chayraykun Jesusqa, yachachisqankunapiwan, manaña t'antata mikhuykuytapas atirqankuñachu.
[21] Familiankunataqmi, Jesusmanta rimayta uyarispa nirqanku: —Manan yuyayninpichu kashan, nispanku. Chayraykun paykunaqa, payta hap'inankupaq, lloqsimurqanku.
[22] Jerusalén llaqtamanta uraykamuq kamachikuy simita yachachiqkunan, nirqanku: —Beelsebulniyoqmi kashan, nispanku. Nillarqankutaq: —Supaykunaq umalliqninpa yanapasqanwanmi supaykunatapas qarqon, nispanku.
[23] Hinan Jesusqa, ladonman paykunata waqyaspa, rikch'anachiykunapi rimaykurqan: —¿Imaynataq Satanasri pay kikinta qarqokuyta atinman?
[24] Sichus huk qhapaq suyu kikinpa kontranpi hatarispa, t'aqa- kunman chayqa, chay qhapaq suyuqa manan takyayta atinmanchu.
[25] Huk familiataqchus kikinpa kontranpi t'aqakunman chayqa, chay familiaqa manan takyayta atinmanchu.
[26] Chay hinallataqmi, sichus Satanaspas, kikinpa kontranpi hatarispa, t'aqakunman chayqa, manan takyayta atinmanchu. Aswanpas, p'uchukayninmi chayamun.
[27] Chay hinaqa, manan pipas huk kallpasapa runaq wasinman haykuspa, manaraq ñawpaqta payta t'eqespanqa, kaqninkunata suwayta atinmanchu. T'eqespanmi ichaqa, chay runaq wasinta suwanqa.
[28] Cheqaqtan niykichis: ‘Kay pachantin runakunaq tukuy huchankutan Diosqa pampachanqa. Hinallataq, payta k'arak k'amisqankutapas, imaynaniraqña kaqtinpas pampachallanqataqmi.
[29] Pillapas Santo Espírituq kontranpi k'arak k'amiqtan ichaqa, Diosqa manapuni hayk'aqpas pampachanqachu. Aswanpas wiñaypaqmi huchachanqa,’ nispay, nispa.
[30] Kamachikuy simita yachachiqkunan nisqaku karqan: —Qhelli supayniyoqmi kashan, nispanku. Chayraykun Jesusqa, chaykunata nisqa karqan.
[31] Chayllamanmi Jesuspa mamitan, hinallataq wawqenkunapas chayamurqanku. Hawallapi qhepakuspankutaq payta waqyachimurqanku.
[32] Askha runakunan Jesuspa muyuriqninpi tiyasharqanku. Hinan nirqanku: —Qhawariy, mamitayki, wawqeykikuna, hinallataq panaykikunapas, hawapi maskhashasunkiku, nispanku.
[33] Paytaq kutichispa nirqan: —¿Pitaq mamitayri, wawqeykunapasri? nispa.
[34] Muyuriqninpi tiyashaqkunata qhawarispantaq nirqan: —Qhawariychis, mamitaypas, hinallataq wawqeykunapas qankunan kankichis.
[35] Pikunachus Diospa munayninta ruwaqmi, wawqeypas, panaypas, hinallataq mamitaypas kanku, nispa.