[1] Hinaqtinmi Jesusqa, rikch'anachiykunapi paykunaman rimaykuyta qallarirqan: —Huk runan, ubas chakrata llank'arqan. Kanchawantaqmi muyurqachirqan. Ubas sarunatapas t'oqorqan. Hinallataq chakra qhawana torretapas ruwarqan. Chakra llank'aqkunaman chakranta arrendaspantaq, karu llaqtata ripurqan.
[2] Ubas pallay tiempo chayamuqtintaq, chakrayoqqa chakra llank'aqkunaman huk kamachinta kacharqan. Llank'aqkunamanta ubas chakraq rurusqan tupaqninta chaskimunanpaqmi kacharqan.
[3] Paykunataq ichaqa, chay kamachita hap'ispanku, maqaykurqanku. Hinaspataq mana imallayoqta qatirparipurqanku.
[4] Chakrayoqqa, wakmantan huk kamachinta paykunaman kachallarqantaq. Paykunataq ichaqa, rumiwan ch'aqeykuspanku, umanta k'irirqanku. K'amiykuspataq qatirparipurqanku.
[5] Hinan chakrayoqqa wakmanta huknin kamachintapas kachallarqantaq. Paytañataq wañuchirqanku. Askha hukkunatapas kachallarqantaq. Llank'aqkunataqmi ichaqa, wakinkunata maqaykurqanku. Wakinkunatataq wañuchirqanku.
[6] Chakrayoqpan huk munasqan churillanña kasharqan. Hinan paytapas qhepallataña paykunaman kachallarqantaq. Nirqantaq: ‘Churiytaqa, respetaykunqakupunin,’ nispa.
[7] Chay chakra llank'aqkunataqmi ichaqa, paykunapurapi ninakurqanku: ‘Kayqa erensiata chaskiqmi. Hamuychis, hinaspa wañuchisunchis. Chay erensiantaq, ñoqanchispaq kapunqa,’ nispanku.
[8] Hinan hap'ispanku wañuchirqanku, hinaspataq ubas chakramanta wikch'upurqanku.
[9] ¿Imatataq ubas chakrayoq wiraqochari paykunata ruwanqa? Hamuspanmi, chay chakra llank'aqkunata wañuchinqa. Hinan ubas chakranta hukkunaman qopunqa.
[10] ¿Manachu Qelqata ñawincharqankichis? Qelqaqa ninmi: ‘Perqaqkunaq rumi wikch'upusqankun, eskina hap'iq teqsi-rumi kapurqan.
[11] Kikin Señormi chaytaqa ruwarqan. Ñoqanchis rikuqtinchistaqmi, manaraq yuyayninchismanpas kabenchu,’ nispan, nispa. (Sal. 118:22-23)
[12] Chay rikch'anachiypin Jesusqa paykunamanta rimarqan. Chaytan paykunaqa yacharqanku. Chayraykun, umalliq saserdotekuna, kamachikuy simita yachachiqkuna, hinallataq kurak runakunapiwan, Jesusta imaynanmantapas hap'irqoytapuni munasharqanku. Ichaqa chay askha runakunata manchakuspankutaqmi, Jesusta saqerparispa ripurqanku.
[13] Hinaqtinmi, ima simillapipas hap'irqonankupaq, wakin fariseokunatawan, Herodesta qatikuqkunatawan Jesusman kachamurqanku.
[14] Jesuspa kasqanman chayamuspankutaq, payta nirqanku: —Yachachikuq, cheqaq runa kasqaykitaqa, hinallataq mana pimanpas sayapakuq kasqaykitaqa yachaykun. Manan qanqa runakunaq rikch'aynintachu qhawanki. Aswanpas, cheqaq kaqwanmi Diospa ñanninta yachachinki. Kamachikuy Simiman hinaqa, ¿rey Cesarman tributo qolqe pagayniyku allinchu, icha manachu allin? ¿Pagasaqkuchu, ichari amachu pagasaqku? nispanku.
[15] Hinaqtinmi Jesusqa, paykunaq iskay-uya kasqankuta entiendispa, paykunata nirqan: —¿Imanaqtinmi wateqawankichis? Huk denario qolqeta qhawanaypaq apamuwaychis, nispa.
[16] Paykunataq apamurqanku. Hinan Jesusqa paykunata nirqan: —¿Piqpa rikch'aynintaq, hinallataq piqpa sutintaq kay qolqepiri qelqasqa kashan? nispa. Paykunataq Jesusta nirqanku: —Rey Cesarpan, nispanku.
[17] Hinan Jesusqa paykunata nirqan: —Cesarpa kaqtaqa, Cesarman qopuychis. Diospa kaqtataq, Diosman qopuychis, nispa. Hinan Jesusmanta yuyayninkupi mana kabesqa kasharqanku.
[18] Hinaqtinmi, Jesuspa kasqanman saduseokuna hamurqanku. Paykunaqa ninkun: —Kawsarimpuyqa manan kanchu, nispa. Hinan Jesusta tapurqanku
[19] Nirqankutaq: —Yachachikuq, Moisesmi qelqapuwarqanku: ‘Sichus huk runaq wawqen wañukapuspan, esposanta saqepun, manataq wawanku kanmanchu chayqa, wawqenmi chay warmiwan kasarakapunqa. Hinan wawqenpa mirayninta hatarichinqa,’ nispa.
[20] Qanchis wawqekunan karqanku. Ñawpaq kaqmi esposayoq karqan. Hinan mana wawayoq kashaspallaraq wañukapurqan.
[21] Iskay kaq wawqenñataq chay warmiwan kasarakapurqan. Hinaspan mana wawayoq kashaspallaraq wañukapullarqantaq. Kinsa kaq wawqenwanpas, chay hinallataqmi karqan.
[22] Chay hinan, qanchisnintin wawqekunaqa chay warmiwan kasarakurqanku. Manataq wawankuqa karqanchu. Llapankuq wañukapusqanku qhepatataq, warmipas wañukapullarqantaq.
[23] Chay warmiqa, qanchisnintin wawqekunaq esposankun karqan. Chay hinaqa, ¿kawsarimpuy p'unchaypi kawsarimpuqtinkuri, mayqenninkuq esposantaq kanqa? nispanku.
[24] Jesustaq paykunaman kutichispa nirqan: —Qankunaqa manan Diospa Qelqakunata, nitaq Diospa atiynintapas reqsinkichischu. Chaymi qankunaqa pantasqa kashankichis.
[25] Wañusqakuna kawsarimpuqtinkuqa, manan kasarakunqakuchu, nitaq kasarachinqakuchu. Aswanpas, hanaq pachapi angelkuna hinan kanqaku.
[26] Moisespa qelqasqan qelqapin, Diosqa t'ankar ukhumanta wañusqakunaq kawsarimpunanmanta rimaykurqan. Paymi nirqan: ‘Ñoqan Abrahampa Diosninpas, Isaakpa Diosninpas, hinallataq Jakobpa Diosninpas kani,’ nispa. (Éxo. 3:6) ¿Manachu chayta ñawincharqankichis?
[27] Diosqa manan wañusqakunaq Diosninchu, aswanpas kawsashaqkunaq Diosninmi. Chay hinapin qankunaqa, sinchi pantasqapuni kashankichis, nispa.
[28] Kamachikuy simita yachachiqkunaq hukninmi, churanakusqankuta uyarispa, Jesusman asuykurqan. Hinan Jesuspa allinta kutichisqanta reparaspa, payta tapurqan: —¿Mayqen kamachikuytaq llapanmanta ñawpaq kaqri? nispa.
[29] Jesustaq payman kutichirqan: —Llapan kamachikuymanta ñawpaq kaq kamachikuyqa ninmi: ‘Israel llaqtamanta runakuna, uyariychis. Señor Diosninchisqa ch'ulla Señorllapunin.
[30] Señor Diosniykitan tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima munakunki,’ nispan. (Deut. 6:4-5) Ñawpaq kaq kamachikuyqa chaymi.
[31] Chay ancha chaniyoq iskay kaq kamachikuytaqmi nin: ‘Runamasiykitan qan kikiykita hinapuni munakunki,’ nispa. (Leb. 19:18) Chay iskaynin kamachikuykunamanta, huk aswan chaniyoq kamachikuyqa manan kanchu, nispa.
[32] Hinan kamachikuy simita yachachiqqa, Jesusta nirqan: —Yachachikuq, cheqaqtapunin allinta ninki. Diosqa ch'ullallan. Manataqmi paymanta hukqa kanchu.
[33] Hinallataq, Diosta tukuy sonqowan, tukuy yuyaywan, tukuy almawan, tukuy kallpawan munakuymi aswantaqa balen. Hinallataq pay kikinta hina, runamasinta munakuymi, Diospaq llapallan animalkunata ruphachiykunamantapas, sakrifisiokunamantapas aswantaqa balen, nispa.
[34] Jesustaq chay runaq allin yachaywan kutichisqanta rikuspan, payta nirqan: —Diospa qhapaq suyunmantaqa, manan karupichu kashanki, nispa. Hinan manaña pipas paytaqa tapupayarqanñachu.
[35] Hinan Jesusqa Dios yupaychana wasipi yachachishaspa nirqan: —¿Imaynataq, kamachikuy simita yachachiqkunari, Cristoqa Davidpa Churinmi ninku?
[36] Davidqa, pay kikinmi, Santo Espírituq chawpinta nirqan: ‘Señormi, Señorniyta nirqan: “Awqaykikunata chakiykiq pachanman churanaykama, paña ladoypi tiyaykuy,’ nispan, nispa. (Sal.110:1)
[37] David kikinmi, Señor nispa sutiyan. ¿Chay hinataq chayri, imaynataq paypa churinqa kanman? nispa. Hinan ancha askha runakunaqa makilla uyarirqanku.
[38] Hinan, Jesusqa yachachispa nirqan: —Kamachikuy simita yachachiqkunamanta kuidakuychis. Paykunaqa, pampakama p'achawan p'acharukuspa, puriykachaytan munanku. Hinallataq, plasakunapipas runakunaq napaykunankutan munanku.
[39] Judío runakunaq huñukunanku wasipipas, hinallataq hatun mikhuykunapipas, allin kaq tiyanakunallapin tiyaykuyta munanku.
[40] Paykunaqa, biudakunaq wasinkutapas q'arunkun. Hinallataq unayta Diosman parlaqmi tukunku. Paykunan aswan huchachasqaqa kanqaku, nispa.
[41] Ofrenda churanaq qayllanpin Jesusqa tiyasharqan. Hinan payqa, imaynatachus runakuna ofrenda churanaman qolqeta churashasqankuta qhawasharqan. Askha qhapaq runakunataq, askha qolqeta churasharqanku.
[42] Hinan, huk wakcha biudapas chayamurqan. Paymi, pisi balorniyoq kobremanta iskay qolqechakunata churaykurqan. Chay qolqechakunaqa, huk kuadrante qolqeq balorninmi karqan.
[43] Jesustaq yachachisqankunata waqyaspan nirqan: —Cheqaqtan niykichis: ‘Kay wakcha biudan, llapa runakunaq, ofrenda churasqankumanta aswantaraqqa churaykun,’ nispay.
[44] Llapan runakunaqa, puchuqllanmantañan churanku. Kay warmitaqmi ichaqa, wakcha kayninpi llapan kaqninta, tukuy kawsananpaq kaqta churaykun, nispa.