[1] Qocha chimpa, Gadarenokunaq suyunmantaqmi chayarqanku.
[2] Hinan Jesús barkamanta uraykuqtin, aya p'ampana t'oqokunamanta qonqaylla qhelli supayniyoq runaqa paywan tupananpaq lloqsimurqan.
[3] Chay runaqa, aya p'ampana t'oqokunapin tiyarqan. Manañan pipas kadenakunawanpas t'eqeyta atirqankuchu.
[4] Chay hina kaqtinmi, askha kutitaña fierro thunkunakunawanpas, kadenakunawanpas t'eqesqaku karqan. Paytaq ichaqa, kadenakunatapas p'itipurqan. Hinallataq fierro thunkunakunatapas ñut'upurqan. Manataqmi pipas payta atipayta atirqanchu.
[5] Sapa kutitaqmi, tuta-p'unchay aya p'ampana t'oqokunapi purirqan. Orqokunapipas qaparqachaspa, hinallataq rumikunawan pay kikinta k'irikuspa purirqan.
[6] Jesusta karullamantaraq rikuruspanmi, phawarirqan. Hinan ñawpaqenpi qonqoriykukuspa hatuncharqan.
[7] Kunkayoqta qaparispantaqmi nirqan: —Ancha Hatunchasqa Diospa Churin Jesús, ¿iman qanwan ñoqawan ruwananchis? Amaña ñak'arichiwanaykipaq Diospa sutinpi huraway, nispa.
[8] Jesusmi payta nisqa karqan: —Qhelli supay, kay runamanta lloqsiy, nispa.
[9] Chaymantataq Jesusqa payta tapurqan: —¿Iman sutiyki? nispa. Paytaq kutichirqan: —Askhan kayku, chayraykun sutiyqa Legión, nispa.
[10] Legiontaq Jesusta anchatapuni balikurqan: —Kay suyumanta ama qarqowaykuchu, nispa.
[11] Chay orqo qayllapitaq, ancha askha khuchikuna mikhusharqanku.
[12] Llapan supaykunataq Jesusta balikurqanku: —Chay khuchikunaman haykunaykupaq kachawayku, nispanku.
[13] Jesustaq balikusqankuta uyakurqan: —Riychisyá, nispa. Qhelli supaykunataq runamanta lloqsispanku, khuchikunaman haykurqanku. Hinan khuchikunaqa qochaman qaqapaspanku, chaypi heq'epaspa wañupurqanku. Iskay waranqa hinan chay khuchikunaqa karqanku.
[14] Khuchi michiqkunataq ayqekuspanku, llaqtapi, hinallataq llaqta kampokunapipas willamurqanku. Runakunataq, imachus pasasqanta yachaq lloqsirqanku.
[15] Jesuspa kasqanmanmi paykuna chayarqanku. Hinan legión supayniyoq kasqa karqan chay runata rikurqanku. Paymi p'achasqa, allin yuyayninpiña tiyasharqan. Runakunataqmi, mancharikurqanku.
[16] Hinan rikuqkunaqa chayamuqkunaman, imatachus Jesusqa supayniyoq runata ruwarqan, chayta willarqanku. Hinallataqmi khuchikunamantapas willallarqankutaq.
[17] Runakunataq suyunkumanta ripunanpaq Jesusta balikuyta qallarirqanku.
[18] Jesusqa barkaman haykushaqtintaq, supayniyoq kasqa karqan chay runa, paywan rinanpaq balikurqan.
[19] Jesustaq ichaqa, mana munarqanchu. Aswanmi nirqan: —Wasiykipi familiaykikunaman ripuy. Hinaspa paykunaman Señorpa qanpaq imaynaniraq ruwapusqasunkikunata willamuy. Hinallataq imaynatachus qanta yanapaykurqasunki, chayta willamuy, nispa.
[20] Hinan chay runaqa, Dekápolis probinsiaman ripurqan. Chaypitaq Jesuspa imaymananiraq paypaq ruwasqanta willayta qallarirqan. Hinan tukuy runakunaq yuyayninkuman chaykunaqa mana kaberqanchu.
[21] Wakmantan Jesusqa, qocha chimpaman barkapi chimparqan. Ancha askha runakunataqmi, paypa kasqanman huñukamurqanku. Paytaq qocha-kantupi kasharqan.
[22] Hinan judío runakunaq huñukunanku wasipi huknin umalliq, Jairo sutiyoq runa rirqan. Paymi Jesusta rikuspan chakinman qonqoriykukurqan.
[23] Hinan anchatapuni balikurqan. Nirqantaq: —Ususichaymi wañurapushanña. Hamuy, hinaspa qhali kawsananpaq llamiykampuway, nispa.
[24] Hinan Jesusqa Jairowan rirqan. Rishaqtinkutaq, ancha askha runakuna qatikuspanku, Jesusman mat'inaykakamurqanku.
[25] Chaypitaqmi huk warmi kasharqan. Paymi, chunka iskayniyoq wataña yawar-apay onqoywan ñak'arisqa karqan.
[26] Anchatapuniñan hampiqkunawanpas hampichikuspa, ñak'arisqa karqan. Hinallataq tukuy kaqninkunatapas yanqapaq tukupusqa karqan. Ichaqa, manataqmi imapas qhaliyachisqañachu, aswanmi aswantaraq onqoykapusqa karqan.
[27] Jesusmanta rimaqta uyarispataq, chay warmiqa Jesuspa qhepanta askha runakunaq chawpinta rirqan. Hinan Jesuspa p'achanta tupaykurqan.
[28] Paymi yuyaykusqa karqan: —P'achallantapas tupaykusaq chayqa, qhaliyasaqmi, nispa.
[29] Kasqan ratupachataq, yawar-apay onqoyninqa thanirapurqan. Hinan warmiqa, kuerponpi chay sinchi ñak'ariynin Jesuspa qhaliyachisqanta yachakurqan.
[30] Hinan kasqan ratupacha, Jesusqa paymanta atiynin lloqsisqanta reparakurqan. Chaymi runakunaman kutirispa nirqan: —¿Pin p'achayta llamiyaramuwan? nispa.
[31] Yachachisqankunataq kutichirqanku: —Askha runakunaq mat'inakamusqasunkikutaqa rikushankin. Ninkitaq: ‘¿Pin llamiyaramuwan?’ nispayki, nispanku.
[32] Jesustaqmi, pichus llamiykurqan payta rikunanpaq, muyuriqninta qhawarirqan.
[33] Hinaqtinmi chay warmiqa mancharisqa, khatatataspa, ima kasharqan. Paypi Jesuspa ruwasqanta yachaspanmi, ñawpaqenman rispa qonqoriykukurqan. Hinan llapan cheqaq kaqta Jesusman willakapurqan.
[34] Jesustaq payta nirqan: —Ususiy, iñiyniykin qhaliyachisunki. Thak kaypi ripuy. Chay sinchi ñak'ariyniykimantapas qhali kapuy, nispa.
[35] Jesús rimashallaqtinraqmi, judío runakunaq huñukunanku wasipi umalliqpa wasinmanta hukkuna chayamurqanku. Paykunataq Jairota nirqanku: —Ususiykiqa wañukapunñan. ¿Imapaqñataq Yachachikuqtari rimapayashanki? nispanku.
[36] Ichaqa kasqan ratutaq, Jesusqa chay rimasqankuta uyarispan, judío runakunaq huñukunanku wasipi umalliqta nirqan: —Ama manchakuychu. Iñillay, nispa.
[37] Hinan Jesusqa, mana pitapas paywan rinanta munarqanchu. Aswanqa Pedrota, Jakobota, Jakoboq wawqen Juanllatawanmi rinankuta munarqan.
[38] Judío runakunaq huñukunanku wasipi umalliqpa wasinmanmi chayarqanku. Hinan Jesusqa ch'aqwarayta, waqaqkunata, waqapakuqkunata ima rikurqan.
[39] Haykuspankutaq, paykunata nirqan: —¿Imanaqtintaq ch'aqwashankichis, waqashankichispasri? Sipaschaqa manan wañusqachu kashan, aswanpas puñushallanmi, nispa.
[40] Runakunataq payta asipayarqanku. Jesustaqmi ichaqa, llapankuta hawaman qarqorqan. Hinan payqa, sipaschaq taytamamanwan, yachachisqankunapiwan, wañusqa sipaschaq kasqanman haykurqanku.
[41] Hinan Jesusqa chay sipaschaq makinta hap'iykuspa nirqan: —Talita kumi, nispa. Chay simiqa: ‘Sipascha, qantan niyki: “Sayariy,” nispa,’ ninantan nin.
[42] Hinallamanmi sipaschaqa sayarispa puririrqanpacha. Payqa, chunka iskayniyoq watayoqmi kasqa karqan. Hinan llapallan runakunaqa anchatapuni utirayarqanku.
[43] Jesustaq, amapuni pimanpas chaykunata willanankupaq paykunata kamachirqan. Hinan sipaschamanpas mikhunata qonankupaq kamachirqan.