[1] Chay p'unchaykunapin, ancha askha runakunaqa huñunasqa kasharqanku. Manataqmi imapas paykunaq mikhunankupaq karqanchu. Chaymi Jesusqa yachachisqankunata waqyarqan.
[2] Hinan paykunata nirqan: —Kay askha runakunaqa, kinsa p'unchayñan ñoqawan kashanku. Manataqmi imankupas mikhunankupaq kanchu. Chayraykun paykunataqa, khuyapayani.
[3] Sitaqchus wasinkuman mana mikhusqata kacharparipusaq chayqa, ñanpin pisipankuman. Wakinninkuqa karumantaraqmi hamurqanku, nispa.
[4] Yachachisqankunataq, Jesusman kutichispa nirqanku: —¿Kay ch'inniq cheqaspiqa, maymantataq pipas paykunata t'antawan saksachiytari atinman? nispanku.
[5] Hinan Jesusqa paykunata tapurqan: —¿Hayk'a t'antaykichistaq kashanri? nispa. Paykunataq nirqanku: —Qanchis t'antallan, nispanku.
[6] Hinaqtinmi Jesusqa, chay askha runakunata pampapi tiyaykunankupaq kamachirqan. Qanchisnintin t'antakunata hap'iykuspantaq, grasiasta qospa phakmirqan. Hinan yachachisqankunaman, rakimunankupaq qorqan. Yachachisqankunataq chay askha runakunaman rakimurqanku.
[7] Hinan pisi challwachankupas kashallarqantaq. Saminchaykuspantaq Jesusqa chaytapas runakunaman rakichimullarqantaq.
[8] Chay askha runakunaqa, mikhuykuspankun saksaykurqanku. Hinan puchuqkunata qanchis hatun kanastakunapi huñunpurqanku.
[9] Mikhuqkunaqa, tawa waranqa hinan karqanku. Hinan Jesusqa paykunata kacharparipurqan.
[10] Kasqan ratupachataqmi Jesusqa, yachachisqankunapiwan barkaman haykuspa, Dalmanuta suyuman ripurqan.
[11] Fariseokunataq lloqsimuspanku, Jesusta tapuyta qallarirqanku. Hinan payta wateqanankupaq, hanaq pachamanta huk señalta mañakurqanku.
[12] Hinan Jesusqa espiritunpi anchatapuni llakipayaspa nirqan: —¿Imanaqtintaq kay p'unchay runa-miraykunari señalta mañawanku? Cheqaqtan niykichis: ‘Kay p'unchay runa-miraymanqa, manan ima señaltapas qosaqchu,’ nispay, nispa.
[13] Hinan Jesusqa paykunata saqerparispan, wakmanta barkaman haykuspa, qocha chimpaman chimparqan.
[14] Yachachisqankunataq t'anta apakuyta qonqasqaku karqan. Hinan barkapi mana t'anta karqanchu, aswanmi ch'ulla t'antallanku kasharqan.
[15] Jesustaq paykunata kamachirqan: —Qhawariychis, fariseokunaq lebaduranmanta, hinallataq Herodespa lebaduranmantapas kuidakuychis, nispa.
[16] Paykunapurataqmi rimasharqanku: —Manan t'antanchis kanchu, nispanku.
[17] Jesusqa imamantachus rimashasqankuta yachaspanmi, paykunata nirqan: —¿Imamantataq rimashankichisri? ¿Mana t'antaykichis kasqanraykuchu rimashankichis? ¿Manaraqchu reparankichis? ¿Manaraqchu entiendinkichis? ¿Sonqoykichispas rumiyasqaraqchu kashan?
[18] ¿Ñawiyoq kashaspaykichispas, manachu rikunkichis? Hinallataq, ¿ninriyoq kashaspaykichispas, manachu uyarinkichis? ¿Manaraqchu yuyarinkichispas?
[19] ¿Phisqa waranqa runakunaman, phisqa t'antata phakmisqaymanta hayk'a kanasta hunt'atan puchuqkunata huñunpurqankichis? nispa. Paykunataq nirqanku: —Chunka iskayniyoqtan, nispanku.
[20] Jesusqa nillarqantaqmi: —¿Tawa waranqa runakunaman qanchis t'antata phakmisqaymanta, hayk'a hatun kanasta hunt'atan puchuqkunata huñunpurqankichis? nispa. Paykunataq nirqanku: —Qanchistan, nispanku.
[21] Jesustaq paykunata tapurqan: —¿Imanaqtintaq manaraqri entiendinkichischu? nispa.
[22] Hinan Jesusqa Betsaida llaqtaman rirqan. Paymantaq huk ñawsa runata pusamurqanku. Pusamuqkunataqmi, chay ñawsa runata llamiykunanpaq Jesusta balikurqanku.
[23] Hinan ñawsa runata makinmanta hap'iykuspa, llaqta kantumanta hawaman pusarqan. Ñawinkunaman thoqaykuspataq, Jesusqa makinta pay pataman churaykuspa tapurqan: —¿Imallatapas rikunkichu? nispa.
[24] Paytaq qhawarispan nirqan: —Runakunatan rikushani. Ichaqa purishaq mallkikunapas kashankuman hinatan rikushani, nispa.
[25] Chaymantataq Jesusqa, wakmanta chay runaq ñawinta llamiykurqan. Hinaspanmi chay runata qhawarichirqan. Hinan qhali kapurqan. Llapallan runakunatataqmi, sut'itapuni rikupurqan.
[26] Hinaspanmi, Jesusqa chay runata wasinman kachapurqan. Nirqantaq: —Aman llaqta kantumanqa haykunkichu. Nitaq llaqta kantupiqa imatapas ninkichu, nispa.
[27] Felipeq kamachikushasqan Cesarea llaqta kantukunamanmi Jesusqa yachachisqankunapiwan lloqsirqan. Hinan Jesusqa ñanpi paykunata tapurqan: —¿Pi kasqaytataq runakunari ninku? nispa.
[28] Paykunataq kutichirqanku: —Wakin runakunan, Bautisaq Juanmi, nisunkiku. Wakinkunataq Eliasmi nisunkiku. Wakinkunañataqmi nisunkiku: ‘Diospa rantinpi rimaqkunaq hukninmi,’ nispa, nispanku.
[29] Hinaqtinmi Jesusqa paykunata tapurqan: —¿Qankunari, pi kasqaytataq ninkichis? nispa. Pedrotaq kutichispan payta nirqan: —Qanqa Cristopunin kanki, nispa.
[30] Jesustaqmi ichaqa, paykunata ama pimanpas paymanta rimarinankupaq allin-allintapuni kamachirqan.
[31] Hinan Jesusqa, paykunaman yachachiyta qallarirqan: ―Runaq Churinpa sinchita ñak'arinanqa nesesariopunin. Kurak runakunapas, umalliq saserdotekunapas, hinallataq kamachikuy simita yachachiqkunapas, manapunin chaskiwanqakuchu. Wañuchiwasqanku qhepatataqmi, kinsa p'unchaymanta kawsarimpusaq, nispan.
[32] Chaytan Jesusqa paykunaman sut'itapuni nirqan. Hinaqtinmi Pedroqa, Jesusta sapaqllaman pusaspan, anyaykuyta qallarirqan.
[33] Jesustaq ichaqa kutirispan, yachachisqankunata qhawarirqan. Hinan Pedrota phiñarikurqan: —Manan Diospa kaqninkunapichu yuyaymananki. Aswanpas runakunaq kaqninkunapin yuyaymananki. Chayrayku Satanás, ñawpaqeymanta anchhuriy, nispa.
[34] Hinan Jesusqa askha runakunata, hinallataq yachachisqankunatawan paypa kasqanman waqyarqan. Hinaspan paykunata nirqan: —Sichus pipas qatikamuwayta munan chayqa, pay kikinta mananchakuchun. Krusninta hap'ichun. Hinaspataq qatikamuwachun.
[35] Pipas kawsayninta qespichiyta munaqqa, chinkachipunqan. Pipas ñoqarayku, hinallataq allin willakuyrayku kawsayninta chinkachiqmi ichaqa, kawsayninta qespichinqa.
[36] Pillapas llapan kay pachantintaña tariq ichaqa, almantataq chinkachipuqqa kanmanmi. Sichus chay hina kanman chayqa, ¿ima allintaq chay runapaqri kanman?
[37] ¿Imatataq runari almanta rantipapunanpaq qonqa?
[38] Kay wasanchaq, hinallataq huchallikuq runa-miraypi pipas ñoqamanta, simiykunamanta ima p'enqakuqqa kanmanmi. Sichus chay hina kanman chayqa, Runaq Churinmi, Yayanpa k'ancharishaq hatun kayninpi ch'uya angelninkunapiwan hamunqa. Chay hamuyninpin, chay runamanta paypas p'enqakullanqataq, nispa.