[1] Jerusalén llaqtamanta hamuq fariseokunataqmi, wakin kamachikuy simita yachachiqkunapiwan, Jesuspa kasqanman huñukamurqanku.
[2] Paykunan, Jesuspa wakin yachachisqankunata makinkuwan t'antata mikhushaqta rikurqanku. Huk niypiqa, mana makinkuta mayllikuspan mikhusharqanku. Hinan paykunata huchacharqanku.
[3] Fariseokunapas, llapallan judío runakunapas, ñawpa machulakunaq ruwashasqallankumanmi hap'ipakunku. Chayrayku paykunaqa, manachus makinkuta allintapuni mayllikunku chayqa, manan mikhunkuchu.
[4] Maypachachus plasamanta kutimuspa, mana bañakunkuchu chayqa, manan mikhunkuchu. Hinallataq, ancha askha imaymana ruwaykunatan waqaychanankupaq chaskirqanku. Chaykunaqa kaykunan: Ukyana qerokunata maylliy, p'uyñukunata maylliy, bronsemanta platokunata maylliy, hinallataq tiyanakunatapas maylliykunan karqanku.
[5] Fariseokunawan, kamachikuy simita yachachiqkunapiwanmi Jesusta tapurqanku: —¿Imanaqtintaq yachachisqaykikunari mana ñawpa machulakunaq ruwashallasqankuman hinachu purinku? Aswanpas qhelli makillantinmi t'antata mikhunku, nispanku.
[6] Jesustaq ichaqa, paykunaman kutichispa nirqan: —Iskay-uyakuna, allintan Isaiasqa qankunamanta profetisarqan. Hinan nirqan: ‘Kay llaqtaqa simillanwanmi hatunchawan. Sonqontaq ichaqa, ñoqamanta karupi kashan.
[7] Yanqapaqmi yupaychawanku. Runakunaq kamachikuyninkunatan, Diospa yachachikuyninkunata hina yachachinku,’ nispan. (Isa. 29:13)
[8] Diospa kamachikuyninkunata saqerparispaykichismi, runakunaq ruwashallasqankuman hap'ipakushankichis. Chaykunaqa kaykunan: P'uyñukunata maylliy, ukyana qerokunata maylliykunan kanku. Hinallataq askha chay hina ruwaykunatan ruwashankichis, nispa.
[9] Hinan paykunata nillarqantaq: —Qankunaqa, Diospa kamachikuyninkunatan huk ladoman munayllata churarparinkichis. Hinaspataq qankunaq ruwashallasqaykichis ruwaykunata waqaychashallankichispuni.
[10] Moisesqa nirqanmi: ‘Taytaykita, hinallataq mamaykita allinpaq qhawariy,’ nispa. (Éxo. 20:12; Deut. 5:16) Nillarqantaqmi: ‘Pillapas taytanta, otaq mamanta ñakanqa chayqa, wañuchunpuni,’ nispa. (Éxo. 21:17; Leb. 20:9)
[11] Qankunataqmi ichaqa ninkichis: ‘Pi runapas taytanta otaq mamanta ninman: “Imapas ñoqamanta qanpa allinniykipaq chaskinaykiqa Korbanmi,” nispan’ nispaykichis. Chaytataqmi qankunaqa allinmi,’ nispa ninkichis. Korbán simiqa, Diospaq ofrenda qosqaymi, ninantan nin.
[12] Hinan qankunaqa, manaña chay runata taytanpaq otaq mamanpaq imatapas ruwachinkichisñachu.
[13] Chay hinapin, chaskisqaykichis ruwaykunata ruwashallasqaykichispa chawpinta, Diospa siminta yanqayachinkichis. Hinallataq chay hina askha imaymanakunata ruwankichis, nispa.
[14] Jesusqa, llapan runakunata paypa kasqanman waqyaspataq, nirqan: —Llapallaykichis uyariwaychis, hinallataq entiendiychis.
[15] Manan imapas hawamanta runaman haykuspa, qhellichayta atiqqa kanchu. Aswanpas sonqonmanta lloqsimuqmi, runataqa qhellichan.
[16] Pillapas uyariq ninriyoq kan chayqa, uyarichun, nispa.
[17] Chay askha runakunamanta t'aqarikuspantaq, Jesusqa wasiman haykurqan. Yachachisqankunataq, chay rikch'anachiymanta tapukurqanku.
[18] Hinan paykunata nirqan: —¿Chay hinaqa, qankunapas mana yuyayniyoqchu kankichis? Manan imapas hawamanta runaman haykuqqa qhellichayta atinmanchu. ¿Chayta manachu entiendinkichis?
[19] Hawamanta runaman haykuqqa, manan sonqonmanchu haykun. Aswanpas wiksanmanmi haykun. Hinan hisp'anaman lloqsipun. Chay hinapin, llapan mikhunakunapas ch'uyanchasqa kapun, nispa.
[20] Nillarqantaqmi: —Runaq sonqonmanta lloqsimuqmi, runataqa qhellichan.
[21] Runaq sonqon ukhumanta lloqsimuqkunaqa kaykunan: Mana allin yuyaykuykuna, wasanchaykuna, qhellipi puriykuna, runa wañuchiykuna, iman kanku.
[22] Hinallataq, suwakuykuna, munapayaykuna, mana allin ruwaykuna, q'otukuykuna, aycha kuerpota mana watakuykuna, lerq'opayaykuna, k'arak k'amiykuna, umata hoqariykuna, hinallataq mana yuyayniyoq kaykunan kanku.
[23] Tukuy chay mana allinkunaqa, runaq sonqon ukhumanta lloqsimuspanmi, runata qhellichan, nispa.
[24] Hinan Jesusqa chaymanta hatarispan, Tiro hinallataq Sidón suyuman rirqan. Huk wasiman haykuspantaqmi, mana piqpa yachanantapas munarqanchu. Ichaqa manan pakakuyta atirqanchu.
[25] Aswanmi, chayllaman, huk warmi Jesusmanta uyarirqan. Paypa ususichanmi qhelli supayniyoq kasharqan. Chaymi chay warmiqa, Jesusman hamuspa, chakinman wikch'uykukurqan.
[26] Chay warmiqa, Gresia llaqtayoq, Sirofenicia suyumantan karqan. Paymi ususichanmanta supayta qarqonanpaq Jesusta balikurqan.
[27] Jesustaq ichaqa, chay warmita nirqan: —Wawakunaq t'antanta hap'ispa alqochakunaman wikch'upuyqa manan allinchu. Chayrayku, wawakunaraq ñawpaqtaqa saksaykuchunku, nispa.
[28] Warmitaq Jesusman kutichispa nirqan: —Arí, Señor. Ichaqa, alqochakunapas wawakunaq mikhunanmanta usuqta, mesaq pachanpiqa mikhunkun, nispa.
[29] Jesustaq payta nirqan: —Chay nisqaykirayku ripullayña. Supayqa ususichaykimanta lloqsipunñan, nispa.
[30] Warmitaq wasinman ripuspa, ususichanta puñunapi sirishaqta tarirqan. Hinallataq supaypas lloqsipusqaña karqan.
[31] Hinan Jesusqa wakmanta Tiro, hinallataq Sidón suyumanta lloqsirqan. Lloqsispantaq, Dekápolis suyunta Galilea qochaman rirqan.
[32] Hinaqtinmi, huk roqt'o-akllu runata Jesusman pusamurqanku. Hinan pay pataman makinta churaykunanpaq Jesusta balikurqanku.
[33] Askha runakunamantataq sapaqllaman Jesusqa payta pusarqan. Hinan ninrinkunaman dedonta winaykurqan. Thoqaykuspantaq, qallunta llamiykurqan.
[34] Chaymantataq hanaq pachata qhawarispan, llakipayaspa payta nirqan: —Efata, nispa. Efata simiqa, kicharikuy ninantan nin.
[35] Hinan kasqan ratupacha, ninrinkunaqa kicharikapurqan. Hinallataq qallunpa watakuyninpas paskarparikurqan. Hinan allinta rimapurqan.
[36] Jesustaq ama pimanpas willanankupaq paykunata kamachirqan. Paykunataq ichaqa, anchatapuniña kamachishaqtinpas, aswan-aswantaraq Jesusmanta willarqanku.
[37] Hinan chay runakunaqa, sinchitapuni yuyayninkupi mana kabesqa kaspa nirqanku: —¡Tukuytan allinta ruwan! Roqt'okunatapas uyarichinmi. Hinallataq upakunatapas rimarichinmi, nispanku.