[1] Wakmantan qocha kantupi Jesusqa yachachiyta qallarirqan. Hinan paypa kasqanman ancha askha runakuna huñukurqanku. Chay hina kaqtinmi, Jesusqa qochapi kashaq barkaman haykuspa, tiyaykurqan. Llapa runakunataqmi, qocha kantupi kasharqanku.
[2] Hinan paykunaman rikch'anachiykunapi imaymanakunata yachachirqan.
[3] Yachachiyninpitaq paykunata nirqan: —¡Uyariychis! hinallataq qhawariychis. Muhu t'akaqmi t'akaq rirqan.
[4] T'akashaqtintaq, wakin muhu ñan pataman chayarqan. Phalaq animalkunataq hamuspan, llapanta pallarqapurqanku.
[5] Wakin muhun, pisi hallp'ayoq rumi t'aqraman chayarqan. Hallp'ataqmi mana ukhukamachu karqan. Chaymi usqhayllaman ch'ikchiramurqan.
[6] Inti lloqsimuspantaqmi ichaqa, rupharapurqan. Mana saphiyoq kasqanraykutaq ch'akipurqan.
[7] Wakin muhutaq, kiska-kiskaman chayarqan. Kiskakunataq wiñaruspa p'ampapurqan. Hinaspan mana rururqanchu.
[8] Wakin muhuñataq, allin hallp'aman chayaspan allinta rururqan. Wiñaspa poqospantaq ch'ulla muhullamanta, kinsa chunkata, wakinmi soqta chunkata, wakintaq pachakta rururqan, nispa.
[9] Hinan nillarqantaq: —Pillapas uyariq ninriyoq kan chayqa, uyarichun, nispa.
[10] Jesusqa sapallan kashaqtintaq, muyuriqninpi kashaqkuna, chunka iskayniyoq yachachisqankunapiwan chay rikch'anachiymanta tapukurqanku.
[11] Hinan paykunata nirqan: ―Qankunamanmi, Diospa qhapaq suyunmanta pakasqa yachaykunata qoykichis. Hawapi kaqkunapaqmi ichaqa, tukuy imaymana yachachikuykunataqa rikch'anachiykunallapi qoni.
[12] Ñawinkuwan rikushaspapas mana reparanankupaq, ninrinkuwan uyarishaspapas mana entiendinankupaqmi, chaytaqa ruwani. Mana hina kaqtinqa, kawsayninkutan t'ikrankuman, hinaspan paykunaq huchanku pampachasqa kanman, nispa. (Isa. 6:9-10)
[13] Hinan, paykunata nillarqantaq: —¿Manachu chay rikch'anachiyta entiendinkichis? ¿Chay hina kaqtinri, imaynatataq llapan rikch'anachiykunata reparawaqchis?
[14] Muhu t'akaqqa, Diospa siminta t'akaqmi.
[15] Chay ñan pataman chayaq muhukunaqa, Diospa simin t'akasqa chayaqkunan kanku. Diospa siminta uyarisqanku qhepatataq, usqhayllaman Satanasqa hamun. Hamuspantaq, paykunaq sonqonkupi t'akasqa Diospa siminta qechupun.
[16] Chay hinallataqmi, rumi t'aqrapi muhu t'akasqakunaqa kanku. Paykunaqa Diospa siminta uyarispanku, kusikuywan chaskikun kupacha.
[17] Ichaqa kikinkupi mana saphiyoqmi kanku. Chayraykun mana unaytachu takyanku. Chay hina kaqtinmi, Diospa siminrayku ñak'ariykuna, hinallataq qatiykachakuykuna hamuqtin, usqhayllaman misk'akapunku.
[18] Kiska-kiskakunapi t'akasqa muhukunaqa, kaykunan kanku. Paykunan, Diospa siminta uyarinku.
[19] Ichaqa, kay tiempopi llakipakuykuna, q'otukuq qhapaq kaykuna, hinallataq imaymana munapakuykunapas, winapakuspanku Diospa siminta p'ampapunku. Hinaspataq manaña rurunñachu.
[20] Allin hallp'api t'akasqa muhukunataqmi, simita uyariqkuna kanku. Paykunan, simita chaskikunku. Hinan huk muhullamanta kinsa chunkata, wakintaq soqta chunkata, hukkunataq pachakta rurunku, nispa.
[21] Paykunatan nillarqantaq: —¿Lamparatari, raki ukhuman, otaq puñunaq pachanman churanapaqchu apakamun? Manapunin, aswanpas lámpara churana pataman churanapaqmi apakamun.
[22] Llapan pakasqa kaqkunaqa, sut'inchasqapunin kanqa. Hinallataq, llapan pakapi kaqkunapas sut'iman horqomusqapunin kanqa.
[23] Pillapas uyariq ninriyoq kan chayqa, uyarichun, nispa.
[24] Paykunatan nillarqantaq: —Qhawariychis, kayta uyarinaykichispaq allinta yuyayniykichista churaychis. Tupusqaykichis tupunawanmi, hukkuna qankunata tupusunkichis. Hinan qankuna uyariqniykunaman, aswantaraq yapasunkichis.
[25] Uyarisqanta yuyayninpi hap'iqmanqa aswantaraqmi qosqa kanqa. Uyarisqanta mana yuyayninpi hap'iqmantataqmi ichaqa, pisi hap'isqantawanraq qechusqa kanqa. nispa.
[26] Nillarqantaqmi: —Diospa qhapaq suyunqa, imaynan huk runa hallp'aman muhuta t'akan, chay hinan.
[27] Muhu t'akaqqa tutan puñun, p'unchaytataq sayarin. Chay hina kashanankamataq, mana paypa yachasqallan, muhuqa ch'ikchimuspan wiñamun.
[28] Hallp'aqa kikillanmi ruruchin. Ñawpaqtan q'achunta, chaymanta espiganta, chaymantataq rurutapas espiganpi hunt'ata ruruchin.
[29] Rurun poqoruqtintaqmi ichaqa, ichhuy tiempo chayamun. Chayrayku muhu t'akaqqa ichhunawan ichhupun, nispa.
[30] Nillarqantaqmi: —¿Imawantaq Diospa qhapaq suyuntari wakichachisun? ¿Ima rikch'anachiywantaq wakichachisunri?
[31] Huk mostasa ruru hinan. Hallp'aman t'akasqaqa, llapan kay hallp'a pachapi muhukunamantapas aswan huch'uyllan.
[32] T'akasqa kasqanmantañataqmi ichaqa, wiñan. Hinaspan llapan berdurakunamantapas aswan hatunraq tukupun. K'allmankunapas hatuchachaqtan wiñan. Chay hina kaqtinmi, phalaq animalkunapas k'allmanpa llanthunpi q'esachakuyta atinku, nispa.
[33] Entiendiyta atinankupaq hinallan, Jesusqa askha rikch'anachiykunawan Diospa siminta willarqan.
[34] Manataqmi imatapas runakunamanqa mana rikch'anachiywanqa rimaykuqchu. Yachachisqankunamanmi ichaqa, sapaqllapi llapanta sut'incharqan.
[35] Chay p'unchay rasphiyaykushaqtintaq, yachachisqankunata nirqan: —Hakuchis, qocha chimpaman chimpasunchis, nispa.
[36] Hinan chay askha runakunata kacharparipurqan. Yachachisqankunataq iman kaqllata Jesusta barkapi aparqanku. Huk barkakunataqmi paywan risharqanku.
[37] Hinaqtinmi ancha hatun tutuka wayra hatarirqan. Hinan unuq phuqchiyninraq barkata waqtamusharqan. Chay hina kaqtinmi, yaqaña barkaman unu hunt'apusharqan.
[38] Jesustaqmi, barkaq qhepa kantunpi sawna patapi puñusharqan. Hinan yachachisqankunaqa rikch'achispanku nirqanku: —¡Yachachikuq! Chinkaykapushanchisñan, ¿manachu imapas qokusunki? nispanku.
[39] Rikch'arispantaq, Jesusqa wayrata phiñarikurqan. Qochatataq nirqan: —¡Upallay! ¡Thak kay! nispa. Hinan wayraqa thanipurqan. Hinallataq ancha hatun thak kay karqan.
[40] Yachachisqankunata nillarqantaq: —¿Imanaqtinmi chay hina mancharisqa kashankichis? ¿Manaraqchu iñiyniykichis kan? nispa.
[41] Yachachisqankunataqmi ancha mancharisqapuni kasharqanku. Hinan paykunapura ninakurqanku: —Wayrapas, qochapas kasunankupaq, ¿pitaq kay runari? nispanku.