[1] Chaymanta sayarispantaqmi Jesusqa, Jordán mayuq wak ladonpi kashaq, Judea probinsiaman rirqan. Askha runakunataqmi wakmanta payman huñukamurqanku. Hinan, imaynatachus payqa yachachiq, chay hinatapuni wakmanta paykunaman yachachirqan.
[2] Hinaqtinmi, wakin fariseokuna, Jesusta wateqanankupaq payman asuykuspa, tapurqanku: —¿Kamachikuy Simiman hinari, huk qosa, esposanwan t'aqanakuyta atinmanchu? nispanku.
[3] Jesustaq ichaqa, paykunaman kutichispa nirqan: —¿Moisesri, imatataq kamachirqasunkichis? nispa.
[4] Paykunataq nirqanku: —Moisesqa nirqanmi: ‘Huk qosaqa, t'aqanakuy kartata ruwaspa, esposanwan t'aqanakunmanmi,’ nispan, nispanku.
[5] Jesustaq ichaqa, paykunaman kutichispa nirqan: —Rumi-sonqo kasqaykichisraykun chay kamachikuytaqa qelqarqan.
[6] Ichaqa kamariypa qallariyninmantapacharaqmi, Diosqa qharitawan, warmitawan kamarqan. (Gén. 1:27)
[7] Chayraykun qhariqa, taytantapas, mamantapas saqepunqa. Warminmantaq hukllachaykakapunqa.
[8] Hinan iskayninku, ch'ulla aychallaña kapunqaku. (Gén. 2:24) Chay hinaqa, manañan iskayñachu, aswanpas ch'ulla aychallaña kapunku.
[9] Chay hinaqa, Diospa hukllachasqanta, amapuni runaqa t'aqachunchu, nispa.
[10] Wasipitaq, yachachisqankunaqa wakmanta, chayllamantataq Jesusta tapukurqanku.
[11] Jesustaq paykunata nirqan: —Pipas, esposanwan t'aqanakuspa, wak warmiwan kasarakun chayqa, esposanpa kontranpin wasanchan.
[12] Sitaqchus huk esposa, qosanwan t'aqanakuspa wak qhariwan kasarakun chayqa, wasanchanmi, nispa.
[13] Hinan Jesuspa llamiykunanpaq wawakunata pusamurqanku. Yachachisqankunataq ichaqa, wawakuna pusamuqkunata phiñarikurqanku.
[14] Chayta rikuspantaq, Jesusqa phiñakurqan. Hinan paykunata nirqan: —Diospa qhapaq suyunqa, wawakuna hina kaqkunapaqmi. Chayrayku, hinalla wawakunaqa ñoqaman hamuchunku. Amataq paykunataqa hark'aychischu.
[15] Cheqaqtan niykichis: ‘Huk wawa hina, Diospa qhapaq suyunta mana chaskiqqa, manapunin hayk'aqpas chayman haykunqachu,’ nispay, nispa.
[16] Hinaqtinmi Jesusqa wawakunata oqllaykukuspa, makinta paykuna pataman churaykurqan. Hinan saminchaykurqan.
[17] Ñanninta rinanpaq lloqsimushaqtintaq, huk runaqa phawaylla payman hamurqan. Hinan chay runaqa, Jesuspa ñawpaqenpi qonqoriykukuspan tapukurqan: —Allin Yachachikuq, ¿wiñay kawsay erensiata chaskinaypaqri, imatataq ruwasaq? nispa.
[18] Jesustaq payta nirqan: —¿Imanaqtintaq, ‘allin,’ nispari niwanki? Manan pipas allinqa kanchu. Aswanpas sapan Diosllapunin.
[19] Qanqa kamachikuykunataqa yachankin: Aman wasanchankichu, aman runata wañuchinkichu, aman suwakunkichu, aman runamasiykita yanqa qasinmanta tumpankichu, aman q'otuspa suwakunkichu, taytaykitapas, mamaykitapas allinpaq qhawarinki, nispa. (Éxo. 20:12-16; Deut. 5:16-20)
[20] Paytaq ichaqa, kutichispa nirqan: —Yachachikuq, llapan chaykunataqa, wayna kasqaymantapacharaqmi hunt'arqani, nispa.
[21] Hinaqtinmi Jesusqa qhawaykuspan, payta munaykukurqan. Hinan nirqan: —Hukmi ruwanayki kashanraq. Riy, hinaspa llapan kaqniykikunata bendespa, wakchakunaman qomuy. Hinan, hanaq pachapi, qhapaq kay kapusunki. Krusniykita hap'ispataq hamuy, hinaspataq qatikamuway, nispa.
[22] Chay runaqa, askha kaqniyoqmi karqan. Chayraykun, chay simita uyarispa llakikurqan. Hinan khuyay ripurqan.
[23] Muyuriqninta qhawarispantaqmi Jesusqa yachachisqankunata nirqan: —Sinchi sasatapunin qhapaqkunaqa, Diospa qhapaq suyunman haykunqaku, nispa.
[24] Hinan Jesuspa nisqanwan, yachachisqankunaqa yuyayninkupi mana kabesqa kasharqanku. Jesustaq ichaqa, wakmanta kutichispan nirqan: —Wawallaykuna, qhapaq kaykunapi sonqo churaqkunapaq, Diospa qhapaq suyunman haykuyninqa sinchi sasapunin.
[25] Diospa qhapaq suyunman huk qhapaq runaq haykunanmantaqa, yawriq ninrinta huk kamelloq suskhuyninmi aswan atikuq kanman, nispa.
[26] Paykunataq ichaqa, aswantaraq utirayaspanku, paykunapurapi ninakurqanku: —¿Pitaq qespikuytari atinman? nispanku.
[27] Hinan Jesusqa, paykunata qhawarispan, nirqan: —Runakunapaqqa mana atikuqmi. Diospaqmi ichaqa, atikullanpuni. Payqa tukuy imaymanakunatapas atillanpunin, nispa.
[28] Pedrotaq Jesusta niyta qallarirqan: —Qhawariy, ñoqaykuqa tukuy imaymanakunatan saqemurqayku. Hinan qanta qatikamurqaykiku, nispa.
[29] Jesustaq kutichispan nirqan: —Cheqaqtan niykichis: ‘Pipas wasinta, otaq wawqenkunata, otaq panankunata, otaq taytanta, otaq mamanta, otaq esposanta, otaq wawankunata, otaq chakrankunata, ñoqarayku, hinallataq allin willakuyrayku saqemuqkunaqa kankun.
[30] Chay saqemuqkunaqa, kunan tiempopin pachak kutita chaskinqaku. Wasikunatapas, wawqekunatapas, panakunatapas, mamakunatapas, wawakunatapas, hinallataq chakrakunatapas qatiykachaykunawanmi chaskinqaku. Hamuq p'unchaykunapitaqmi, wiñay kawsayta chaskinqaku.
[31] Ichaqa, askha ñawpaqpi kaqkunan, qhepapi kanqaku. Qhepapi kaqkunataqmi, ñawpaqpi kanqaku,’ nispay, nispa.
[32] Ñanninta purishaspankun, Jerusalén llaqtaman wichasharqanku. Jesustaqmi paykunaq ñawpaqenkuta risharqan. Hinan paykunaqa, yuyayninkupi mana kabesqa kasharqanku. Hinallataq Jesusta mancharisqa qatikusharqanku. Jesustaqmi wakmanta chunka iskayniyoq yachachisqankunata sapaqman pusarqan. Hinan imakunatachus payta ruwanqaku, chaymanta paykunaman willayta qallarirqan.
[33] Nirqantaq: —Qhawariychis, Jerusalén llaqtamanmi wichashanchis. Hinan Runaq Churinta umalliq saserdotekunaman, kamachikuy simita yachachiqkunamanwan hap'ichinqaku. Wañunanpaqmi huchachanqaku. Mana-judío runakunaq makinkumanwanmi hap'ichinqaku.
[34] Paytan asipayanqaku, soq'aykunqaku, thoqaykunqaku, hinallataq wañuchinqaku. Kinsa p'unchaymantataqmi ichaqa, kawsarimpunqa, nispa.
[35] Hinaqtinmi, Zebedeoq churinkuna Jakobo, Juanpiwan, Jesusman asuykuspa nirqanku: —Yachachikuq, imatachus mañakusqaykiku, chaytan qowanaykikuta munayku, nispanku.
[36] Jesustaq paykunata nirqan: —¿Imatan qankunapaq ruwapunayta munankichis? nispa.
[37] Paykunataq nirqanku: —K'ancharishaq qhapaq kayniykipi, hukniykuta paña ladoykipi, hukniykutataq lloq'e ladoykipi tiyaykuchiwanaykikutan munayku, nispanku.
[38] Hinaqtinmi Jesusqa, paykunata nirqan: —Qankunaqa manan imachus mañakuwasqaykichista yachankichischu. ¿Ñoqaq ukyasqay basomanta ukyayta atiwaqchischu? Otaq, ¿ñoqaq chaskisqay bautismota chaskiyta atiwaqchischu? nispa.
[39] Paykunataqmi nirqanku: —Atiykumanmi, nispanku. Jesustaq paykunata nirqan: —Cheqaqtapunin qankunaqa, ñoqaq ukyasqay basomantapas ukyankichis. Hinallataq ñoqaq bautisakusqay bautismowanpas bautisasqa kankichis.
[40] Ichaqa paña ladoypi, hinallataq lloq'e ladoypi tiyaykunaykichismanta niyqa, manan ñoqamanchu tupawan. Aswanpas, pikunapaqchus wakichisqa kashan, paykunamanmi qosqa kanqa, nispa.
[41] Chunkantin yachachisqankunataq chayta uyarispanku, Jakobopaqwan, Juanpaqwan phiñakuyta qallarirqanku.
[42] Jesustaq ichaqa, paykunata waqyaspan nirqan: —Mana-judío runakunaq allin reqsisqa kamachikuqninkun paykunapi munaychakunku. Hinallataq paykunaq allinpaq qhawarisqankunapas paykunapurapi kamachikuyniyoq kanku. Chaykunataqa yachankichismi.
[43] Qankunapurapin ichaqa, mana chay hinachu kanqa. Aswanmi pillapas allinpaq qhawarisqa kayta munan chayqa, qankunapurapi serbiqniykichis kanqa.
[44] Hinallataq, pillapas qankunapurapi ñawpaq kaq kayta munan chayqa, llapaq kamachinmi kanqa.
[45] Runaq Churinqa, manan serbichikunanpaqchu hamurqan. Aswanpas serbinanpaq, hinallataq kawsayninta qospa, askha runakunata rantipapunanpaqmi hamurqan, nispa.
[46] Hinan Jerikó llaqtaman chayamurqanku. Hinaspataq Jesusqa yachachisqankunawan, hinallataq ancha askha runakunapiwan kuska, Jerikó llaqtamanta lloqsisharqanku. Hinaqtinmi Timeoq churin ñawsa Bartimeoqa ñan patapi mañapakuspa tiyasharqan.
[47] Nazaret llaqtayoq Jesuspa pasashasqanta uyarispantaqmi, Bartimeoqa qapariyta qallarirqan. Nirqantaq: —¡Davidpa Churin Jesús, yanapaykuway! nispa.
[48] Askha runakunan upallananpaq phiñarikurqanku. Paytaq ichaqa, aswan-aswantaraq qaparirqan: —¡Davidpa Churin, yanapaykuway! nispa.
[49] Hinaqtinmi Jesusqa sayaykuspan, chay ñawsa runata waqyamunankupaq kamachikurqan. Waqyamuspataq, nirqanku: —Kallpachakuy, hinallataq sayariy. Jesusmi waqyashasunki, nispanku.
[50] Hinaqtinmi payqa, kapanta wikch'uspa, sayarirqan. Hinan Jesusman hamurqan.
[51] Kutichispantaq, Jesusqa payta nirqan: —¿Ima ruwapunaytan munanki? nispa. Ñawsa runataq nirqan: —Raboní, qhawarichiwanaykitan munani, nispa.
[52] Jesustaq payta nirqan: —Ripuy. Iñiyniykin qhaliyachisunki, nispa. Kasqan ratutaq, payqa qhawarispan, rikupurqanpacha. Hinan ñanninta, Jesusta qatikurqan.