[1] Hinaqtinmi, tutallamanta, umalliq saserdotekuna, kurak runakuna, kamachikuy simita yachachiqkuna, hinallataq llapan Konsilio Sanedrinpi kaqkunapas, rimanakurqanku. Jesusta t'eqespankutaq, Pilatoman hap'ichinankupaq aparqanku.
[2] Hinan Pilatoqa Jesusta tapurqan: —¿Qanchu judío runakunaq Reynin kanki? nispa. Jesustaq kutichispa nirqan: —Qanmi ninki, nispa.
[3] Hinan umalliq saserdotekunaqa, Jesusta askha imaymanamanta yanqa huchacharqanku.
[4] Pilatotaqmi ichaqa, wakmanta Jesusta tapullarqantaq: —¿Manachu imatapas kutichinki? Qhawariy. Imaymanamantaraqmi qanpa kontraykipi rimashanku, nispa.
[5] Chaywanpas Jesusqa, manan imatapas kutichirqanchu. Jesuspa chay mana kutichisqanmantan Pilatoqa muspharisqaraq kasharqan.
[6] Paskua fiestapin, Pilatoqa mayqentachus runakunaq mañakusqankuman hina, presokunamanta hukninta kacharillaqpuni.
[7] Chaypitaqmi, Barrabás sutiyoq huk runa kasharqan. Paymi, maqanakuqmasinkunawan reypa kontranpi hatarirqan. Hinan huk runata t'eqespa, wañuchisqaku karqan.
[8] Hinan imaynatachus Pilatoqa paykunapaq ruwallaqpuni, chay hinata ruwananpaq, chay askha runakuna qaparispa mañakuyta qallarirqanku.
[9] Pilatotaq paykunaman kutichirqan: —¿Judío runakunaq Reynintachu kacharipunayta munankichis? nispa.
[10] Umalliq saserdotekunaq enbidiamanta Jesusta hap'ichisqankutan Pilatoqa yacharqanña.
[11] Umalliq saserdotekunataqmi ichaqa, chay askha runakunata tanqaspa nirqanku: —Aswanpas Barrabasta kacharipunanpaq Pilatota mañakuychis, nispanku.
[12] Paykunaman wakmanta kutichispantaq Pilatoqa nirqan: —¿Imatataq kay judío runakunaq Reynin nispa sutiyasqaykichis runatari ruwanayta munankichis? nispa.
[13] Hinan paykunaqa wakmanta qaparirqanku: —¡Chakatay! nispanku.
[14] Hinaqtinmi Pilatoqa paykunata nirqan: —¿Ima mana allintataq payri ruwarqan? nispa. Paykunataq ichaqa, aswan kallpawanraq qaparirqanku: —¡Chakatay! nispanku.
[15] Hinaqtinmi Pilatoqa, chay askha runakunaq munasqanta ruwayta munaspan, Barrabasta kacharipurqan. Jesustataq soq'aykuchispan, chakatasqa kananpaq hap'ichirqan.
[16] Hinaqtinmi soldadokunaqa, Pretorio nisqa patio ukhuman Jesusta apaykurqanku. Hinan llapan tropantin soldadokunata waqyachimurqanku.
[17] Jesustataqmi sanipuka p'achawan p'achachirqanku. Kiskamanta simp'arusqa pilluwantaq umanman churaykurqanku.
[18] Hinan napaykuyta qallarirqanku: —¡Judío runakunaq Reynin, kawsachun! nispanku.
[19] Umantapas soqoswan p'anaykuspankun, thoqaykurqanku. Qonqoriykukuspankutaq, payta yupaychaq tukurqanku.
[20] Jesusta asipayaspankutaq, sanipuka p'achata ch'ustipurqanku. Hinan pay kikinpa p'achanwan churapurqanku. Hinaqtinmi payta chakatanankupaq hawaman horqorqanku.
[21] Sirene llaqtamanta, Simón sutiyoq runan, chakramanta hampusharqan. Payqa Alejandroq, hinallataq Rufoq taytankun karqan. Hinan Jesuspa krusninta q'epinanpaq payta kamachirqanku.
[22] Hinan, Gólgota nispa sutiyasqa cheqasman Jesusta aparqanku. Gólgota simiqa, uman tullu cheqas ninantan nin.
[23] Mirrawan chhaqrusqa binota, ukyananpaqtaqmi Jesusman qorqanku. Paytaqmi ichaqa, mana ukyarqanchu.
[24] Chakataspankutaqmi, imatachus sapanka hukninku apakunankupaq sortiarqanku. Chayman hinataq p'achanta rakinakurqanku.
[25] Jesusta chakatasqanku orasqa, kinsa kaq orasmi karqan.
[26] Hinan imamantachus huchachasqa karqan, chay qelqaqa qelqasqa karqan: JUDÍO RUNAKUNAQ REYNIN, nispa.
[27] Jesuswan kuskatataq, iskay q'aro suwakunata chakatarqanku. Hukninta paña ladonman, huknintataq lloq'e ladonman chakatarqanku.
[28] Chay hinapin, Qelqaq nisqanqa hunt'akurqan. Qelqataqmi nin: Kamachikuy simita mana kasukuq hina puriqkunatawanmi yupasqa karqan, nispan. (Isa. 53:12)
[29] Hinan chayninta pasaqkuna payta k'arakta k'amirqanku. Umankuta maywikuspankutaq, nirqanku: —¡Yaw! ¿Dios yupaychana wasita thunispa, kinsa p'unchaypi hatarirachiqchu qan kanki?
[30] ¡Qan kikiykita qespichikuy! ¡Krusmantataq uraykamuy! nispanku.
[31] Umalliq saserdotekunan, kamachikuy simita yachachiqkunawan kuska, paykunapurapi kikillantataq asipayarqanku. Nirqankutaq: —Hukkunatan qespichirqan. Pay kikintataqmi ichaqa, mana qespichikuyta atinchu.
[32] ¡Israel suyuq Reynin Cristo, ñoqayku rikuspa iñinaykupaq, krusmanta kunan urayamuy! nispanku. Hinan Jesuswan kuska chakatasqakunapas, payta k'amillarqankutaq.
[33] Soqta kaq oras chayamuqtintaq, isqon kaq oraskama tukuy hallp'a pachantinpi laqha-tutayay karqan.
[34] Hinan, isqon kaq oraspi, Jesusqa kunkayoqta qaparirqan: —¡Eloi, Eloi! ¿Lama sabaktani? nispa. Chayqa: ‘Diosniy, Diosniy, ¿imanaqtinmi saqerpariwanki?’ ninantan nin. (Sal. 22:1)
[35] Chaypi wakin sayashaqkunataq, chayta uyarispa nirqanku: —Qhawariychis. Eliastan waqyakushan, nispanku.
[36] Huk runataqmi phawarispan, esponhata binagreman challpurqan. Hinan soqosman churaspa, ch'onqananpaq haywarqan. Nirqantaq: —Hinalla kachun. Sichus uraykachinanpaq Elías hamunqa chayqa, chayta qhawasunchis, nispa.
[37] Jesustaq ichaqa, kunkayoqta qaparispan, wañukapurqan.
[38] Hinan Dios yupaychana wasiq kortinanqa, wichaymanta uraykama, iskayman llik'ikurqan.
[39] Senturión runataqmi, Jesuspa ñawpaqenpi sayasharqan. Paymi, imaynatachus Jesusqa qaparispa wañukapurqan chayta rikurqan. Hinan nirqan: —¡Kay runaqa cheqaqtapunin Diospa Churin kasqa! nispa.
[40] Hinallataqmi wakin warmikuna karullamanta qhawaspanku, chaypi kasharqanku. Paykunapurapitaqmi, Magdala llaqtayoq María kasharqan. Sullk'a kaq Jakoboq, hinallataq Josepa mamitanku Mariapas, Salomepas chaypin kashallarqankutaq.
[41] Maypachachus Jesusqa Galilea probinsiapi kashaqtinmi, chay warmikunaqa payta qatikuspa, serbirqanku. Hinallataqmi Jerusalén llaqtaman, Jesuswan kuska wichaq askha warmikunapas, chaypi kashallarqankutaq.
[42] Sábado p'unchaypaq wakichikuy p'unchaymi karqan.
[43] Chay p'unchay tardeyaykushaqtinñataq, Arimatea llaqtamanta Joseqa chayamurqan. Paymi Konsilio Sanedrinpi allinpaq qhawarisqa miembro karqan. Diospa qhapaq suyuntapas suyakusharqan. Hinan payqa, mana manchakuspan Pilatoq kasqanman haykuspa, Jesuspa ayanta Pilatomanta mañarqan.
[44] Jesuspa usqhaylla wañukapusqanmantan Pilatoqa muspharirqan. Chaymi senturión runata waqyaspa, unayñachus wañupurqan chayta tapurqan.
[45] Senturión runaq willasqanta uyarispantaq, Pilatoqa Jesuspa ayanta Joseman qochirqan.
[46] Hinaqtinmi Joseqa, sabanata rantirqan. Krusmanta uraykuchispantaq, Jesuspa ayanta sabanawan k'uyuykurqan. Hinan qaqapi t'oqosqa aya p'ampana t'oqoman chay ayata churaykurqan. Aya p'ampana t'oqoq punkuntataqmi hatun rumiwan wisq'aykurqan.
[47] Magdala llaqtayoq Mariataq, Josepa mamitan Mariapiwan, maymanchus Jesuspa ayanta churasqankuta qhawasharqanku.