[1] Jerusalén llaqtaman qayllaykushaspankutaqmi, Olibos orqoq chimpanpi, Betfagé llaqtaq, hinallataq Betania llaqtaq qayllankunaman chayarqanku. Hinan Jesusqa, iskay yachachisqankunata kacharqan.
[2] Paykunatataq nirqan: —Haqay chimpa llaqta kantuman rirqoychis. Chayman haykuspaykichismi, malta asnochata watasqata tarinkichis. Chay asnochapiqa manan pipas sillakurqanraqchu. Paskarqamuspataq aysaramunkichis.
[3] Sichus pipas nisunkichis: ‘¿Imanaqtinmi chayta ruwashankichis?’ nispa chayqa, ninkichismi: ‘Señormi sillakunanpaq nesesitashan. Kasqan ratutaqmi kayman kutichimpunqa,’ nispaykichis, nispa.
[4] Paykunataqmi rirqanku. Hinan punku hawa kallepi, malta asnochataqa watasqata tarirqanku. Hinan paykunaqa asnochata paskarqanku.
[5] Wakin chaypi kaqkunataqmi, yachachisqankunata nirqanku: —¿Imapaqmi chay malta asnochata paskashankichis? nispanku.
[6] Yachachisqankunataqmi, Jesusqa imaynatachus kamachirqan, chay hinatapuni nirqanku. Hinaqtinmi aysachimullarqanku.
[7] Hinan Jesuspa kasqanman malta asnochata aysamurqanku. P'achankuwan karunaykuqtinkutaq, Jesusqa sillaykukurqan.
[8] Hinan askha runakuna p'achankuta ñanman mast'arqanku. Wakinkunataqmi, mallkikunaq k'allmankunata wit'uspanku ñanman mast'allarqankutaq.
[9] Hinan ñawpaqenta riqkunaqa, hinallataq qhepanta riqkunapas qaparirqanku: ¡Hosanna! ¡Señorpa sutinpi hamuqqa saminchasqapuni kachun!
[10] ¡Taytanchis Davidpa qhapaq suyun, Señorpa sutinpi hamuqqa, saminchasqa kachun! ¡Hanaq pachakunapi Hosanna! nispanku. (Sal. 118:26)
[11] Hinan Jesusqa, Jerusalén llaqtaman, hinallataq Dios yupaychana wasiman haykurqan. Hinaspataq, llapa muyuriqninta qhawarirqan. Rasphiyaykushaqtinñataq Jesusqa, chunka iskayniyoq yachachisqankunapiwan Betania llaqtaman rirqanku.
[12] Qhepantin p'unchaytataq, Betania llaqtamanta lloqsimuqtinku, Jesusqa yarqachikurqan.
[13] Hinan karullamantaraq rap'isapa igos sach'ata rikururqan. Hinaqtinmi imallatapas tarinanpaq qhawaykuq asuykurqan. Sach'aq kasqanmanmi chayarqan. Igospa mana rurunan tiempo kasqanraykutaqmi, mana ima rurutapas tarirqanchu. Aswanpas rap'ikunallatan tarirqan.
[14] Hinaqtinmi Jesusqa, chay igos sach'ata nirqan: —Amaña hayk'aqpas pipas ruruykita mikhuchunchu, nispa. Hinan yachachisqankunaqa chay nisqanta uyarirqanku.
[15] Hinan Jerusalén llaqtaman chayarqanku. Jesustaq Dios yupaychana wasiman haykuspa, chaypi qhatuqkunatapas, rantiqkunatapas hawaman qarqoyta qallarirqan. Hinallataq qolqe kambiaqkunaq mesankunatapas, palomata bendiqkunaq tiyanankunatapas wikaparqan.
[16] Manataqmi Jesusqa Dios yupaychana wasiq ukhunta pitapas ima serbisiokunatapas apanankuta munarqanchu.
[17] Hinan paykunaman yachachispa nirqan: —Qelqaqa ninmi: ‘Ñoqaq wasiyqa, llapan suyukunaq Diosman parlananku wasi, nispa sutichasqan kanqa. (Isa. 56:7) Qankunataq ichaqa, q'aru suwakunaq mach'ayninman tukurachipusqankichis,’ nispa. (Jer. 7:11)
[18] Hinaqtinmi, llaqtantin runakunaqa, paypa yachachikuyninmanta utirayarqanku. Hinallataq kamachikuy simita yachachiqkunapas, umalliq saserdotekunapiwan Jesuspa nisqanta uyarispa, payta manchakurqanku. Chayraykun imaynallanmantapas wañuchinankupaq maskhasharqanku.
[19] Rasphiyaykushaqtinñataqmi, Jesusqa llaqtamanta lloqsipurqan.
[20] Qhepantin p'unchaytaq tutallamanta, chayninta rishaspanku, chay igos sach'ata saphinmantapacha ch'akisqata rikurqanku.
[21] Hinan Pedroqa yuyariruspan, Jesusta nirqan: —¡Rabí, qhawariy! Ñakasqayki igos sach'aqa ch'akirqapusqan, nispa.
[22] Jesustaq paykunaman kutichispa nirqan: —Diospi iñiychis.
[23] Cheqaqtan niykichis: ‘Pipas kay orqota sonqonpi mana iskayaspa, aswanpas iñillaspanpuni ninman: “Achhuriy, hinaspa mama-qochaman wikch'uykukuy,” nispan, chayqa, chay nisqanqa ruwasqan kanqa,’ nispay.
[24] Chay hinaqa, nillaykichistaqmi: ‘Diosman parlasqaykichispi, tukuy mañakusqaykichista chaskisqaykichistaña hina iñinkichis chayqa, chaskinkichismi,’ nispay.
[25] Sayaykuspa Diosman parlashaqtiykichis, sichus runamasiykiq kontranpi sonqoykichispi imallapas kashanraq chayqa, pampachaychis. Chay hinapin, qankunaq hanaq pachapi kashaq Yayaykichispas, huchaykichiskunata pampachallasunkichistaq.
[26] Ichaqa, manachus qankuna pampachankichis chayqa, hanaq pachapi kashaq Yayaykichispas huchaykichiskunata manallataqmi pampachasunkichischu, nispa.
[27] Hinan wakmanta Jerusalén llaqtaman kutimurqanku. Dios yupaychana wasipi Jesús purishaqtintaqmi, umalliq saserdotekuna, kamachikuy simita yachachiqkuna, hinallataq kurak runakuna payman chayamurqanku.
[28] Hinan Jesusta nirqanku: —¿Ima kamachikuyniyoq kaywantaq kaykunatari ruwanki? ¿Pitaq kaykunata ruwanaykipaq kamachikuyniyoq kaytari qorqasunki? nispanku.
[29] Hinaqtinmi Jesusqa, paykunaman kutichispa nirqan: —Ñoqapas huk tapukuyta qankunata tapullasqaykichistaq. Ichaqa sichus kutichiwankichis chayqa, ñoqapas, ima kamachikuyniyoq kaywanchus kaykunata ruwani, chayta nillasqaykichistaq.
[30] ¿Juanpa bautismonri, hanaq pachamantachu, icha runakunamantachu karqan? Kutichiwaychis, nispa.
[31] Hinaqtinmi paykunaqa paykunapurallapi rimanakurqanku: —Sichus nisunchis: ‘Hanaq pachamantan,’ nispa chayqa, payqa ninqan: ‘¿Imanaqtintaq mana paytari kreerqankichischu?’ nispanku.
[32] Ichaqa sichus nisunchis: ‘Runakunallamantan,’ nispa chayqa, ¡imaraqchá kanman! nispanku. Juanqa cheqaqmantapuni Diospa rantinpi rimaq kasqantan llaqtantin runakuna kreerqanku. Chaymi paykunaqa, llaqtantin runakunata manchakurqanku.
[33] Hinaqtinmi paykunaqa, Jesusman kutichispa nirqanku: —Manan yachaykuchu, nispanku. Hinan Jesusqa paykunaman kutichispa nirqan: —Ñoqapas, manallataqmi ima kamachikuyniyoq kaywanchus kaykunata ruwani, chayta nisqaykichischu, nispa.