[1] P'unchaykuna pasaqtintaqmi, wakmanta Jesusqa Kapernaum llaqtaman haykurqan. Hinan huk wasipi kashasqanta runakuna uyarirqanku.
[2] Hinaqtinmi, ancha askha runakuna huñukurqankupacha. Chaymi wasipunku qayllapas manaña sayaykunankupaq ayparqanñachu. Hinaqtinmi Jesusqa Diospa siminta paykunaman willarqan.
[3] Hinan tawa runakuna, huk mana kuyuriq such'uta wantuyukuspanku, Jesusman hamurqanku.
[4] Ancha askha runakuna kashasqankuraykutaqmi, mana Jesuspa kasqanman qayllaykuchiyta atirqankuchu. Chaymi, maypichus pay kasharqan, chay wasi patata q'alaraspanku, t'oqorqanku. T'oqoruspanku hinataq, mana kuyuriq such'uta siriykusqan kamillanpi urayachirqanku.
[5] Jesustaq paykunaq iñiyninkuta rikuspan, mana kuyuriq such'uta nirqan: —Waway, huchaykikunataqa pampachaykin, nispa.
[6] Wakin kamachikuy simita yachachiqkunataq ichaqa, chaypi tiyasharqanku. Paykunaqa, sonqonkupin yuyaymanasharqanku.
[7] Nirqankutaq: —¿Imanaqtintaq kay runari chay hinata riman? ¡Diostan k'arakta k'amishan! ¿Pitaq hucha pampachaytari atinman? Aswanpas sapan Diosllan riki, nispanku.
[8] Hinaqtinmi Jesusqa, kikinkupi yuyaymanasqankuta espiritunpi yachaspa, paykunata nirqan: —¿Imanaqtintaq sonqoykichispi chay hinata yuyaymanashankichis?
[9] ¿Imataq mana kuyuriq such'uman aswan fasilchalla niyri: ‘Huchaykikunataqa pampachaykin,’ niychu ichari, ‘sayarispa, kamillaykita hoqariy, hinaspa ripuy,’ niytaqchu?
[10] Runaq Churinqa, kay pachapi hucha pampachananpaq kamachikuyniyoqmi. Chaykunatan yachanaykichista munani, nispa.
[11] Hinan, mana kuyuriq such'uta nirqan: ―¡Qantan niyki: ‘Hatarispa, kamillaykita hoqariy, hinaspa wasiykiman ripuy!’ nispay, nispa.
[12] Hinan chay such'u runaqa sayarirqan. Chaymantataq kamillanta hoqarispa, llapa runakunaq rikushasqan, lloqsipurqan. Chay hina kaqtinmi, llapa runakuna utirayarqanku. Hinan Diosta hatunchaspanku nirqanku: —¡Manapunin hayk'aqpas chay hinataqa rikurqanchischu! nispanku.
[13] Jesustaq, wakmanta qocha kantuman lloqsirqan. Hinan payman llapa runakuna rirqanku. Hinaqtinmi, Jesusqa chay runakunaman yachachisharqan.
[14] Rishaspantaq, Alfeoq churin Levita, llaqtaq tributo qolqe chaskinan wasipi tiyashaqta rikurqan. Hinan payta nirqan: —Qatikamuway, nispa. Hinan Leviqa sayarispa, payta qatikurqan.
[15] Jesusqa, Levipa wasinpin mesaman k'iraykuspa tiyaykurqan. Askha qatikuqkunataqmi, Jesusta qatikurqanku. Chayraykun askha tributo qolqe kobraqkunapas, huchasapakunapas, hinallataq Jesuspa yachachisqankunapas paywan kuska tiyaykurqanku.
[16] Kamachikuy simita yachachiqkunataq, fariseokunapiwan, Jesusqa huchasapakunawan, hinallataq tributo qolqe kobraqkunawan kuska mikhushaqta rikurqanku. Hinan yachachisqankunata nirqanku: —¿Imanaqtintaq tributo qolqe kobraqkunawan, hinallataq huchasapakunawanpas, mikhushanpas, ukyashanpasri? nispanku.
[17] Jesustaq chayta uyarispan, paykunata nirqan: —Qhali kaqkunaqa, manan hampiqta nesesitankuchu. Aswanpas onqosqakunallan nesesitanku. Manan chanin runakunata waqyaqchu hamurqani. Aswanpas huchasapakuna yuyayman kutirikunankupaq waqyaqmi hamurqani, nispa.
[18] Juanpa, hinallataq fariseokunaq yachachisqankunan ayuna sharqanku. Hinan paykunaqa Jesusman rispa nirqanku: —¿Imanaqtintaq Juanpa, hinallataq fariseokunaq yachachisqankunari ayunayku, qanpa yachachisqaykikunataq ichaqa, mana ayunankuchu? nispanku.
[19] Jesustaq paykunata nirqan: —¿Kasarakuq qharita kompañaqninkunari, paykunawan kasarakuq kashanankama, ayunayta atinkumanchu? Manapunin. Hayk'aqkamachá kasarakuq qhari paykunawan kanqa, chaykaman mana ayunayta atinqakuchu.
[20] Ichaqa p'unchaykunan chayamunqa, chaypitaqmi kasarakuq qhariqa qechusqa kanqa. Hinan, chay p'unchaykunapiña ayunanqaku.
[21] Manan pipas thanta p'achata mosoq telawanqa remiendanmanchu. Sichus chay hina kanman chayqa, mosoq telan thanta kaqta chutarapunman, hinan ñawpaqmanta aswantaraq qhasurqapunman.
[22] Nitaqmi pipas upi binotaqa mawk'a odrekunaman hillp'unmanchu. Sichus chay hina kanman chayqa, upi binon odrekunata phatachipunman. Hinan binopas usupunman, odrekunapas wikch'ukapunman. Aswanmi upi binotaqa mosoq odrekunaman hillp'ukun, nispa.
[23] Sábado p'unchaypin Jesusqa, chakra-chakranta risharqan. Hinan yachachisqankunaqa, chayninta rishaspa, trigoq umanta k'aphtayta qallarirqanku.
[24] Fariseokunataq Jesusta nirqanku: —Qhawariy, ¿imanaqtintaq sábado p'unchaypi, Kamachikuy Simiman hina mana ruwanakunatari ruwashanku? nispanku.
[25] Jesustaq kutichirqan: —David, hinallataq paywan kaqkunapiwan, pisichikuypi, yarqaypi ima tarikuspanku imachus ruwasqanta, ¿manachu hayk'aqpas ñawincharqankichis?
[26] Abiatar hatun umalliq saserdote kashaqtinmi, Davidqa Diospa wasinta haykurqan. Hinan Diospa rikunanpaq haywasqa t'antata mikhurqan, hinallataq paywan kaqkunamanpas qorqan. Kamachikuy Simiman hina, chay t'antata mana saserdote kaqkunaqa, manan mikhuyta atiqkuchu, nispa.
[27] Hinan paykunata nillarqantaq: —Diosqa sábado p'unchayta runaraykun ruwarqan. Manan runatachu sábado p'unchayrayku ruwarqan.
[28] Chay hinaqa, Runaq Churinqa, sábado p'unchaypapas Señorninmi, nispa.