[1] Chaymanta lloqsispantaqmi Jesusqa, llaqtanman ripurqan. Hinan yachachisqankunaqa payta qatikurqanku.
[2] Sábado p'unchay chayamuqtintaq, Jesusqa judío runakunaq huñukunanku wasipi yachachiyta qallarirqan. Askha uyariqninkunataqmi anchata utirayaspa nirqanku: —¿Maymantataq kay imaymanakunari payman hamun? ¿Kay yachayta qosqaqa ima yachaytaq kanpasri? ¡Askha atiywan ruwanakunatan makinwan ruwan!
[3] ¿Manachu kayqa Maríaq wawan karpintero kashan? ¿Manachu kayqa Jakoboq, Josepa, Judaspa, hinallataq Simonpa wawqenku kashan? ¿Manachu panankunapas ñoqanchiswan kashallankutaq? nispanku. Hinan payhawa phiñasqa kasharqanku.
[4] Jesustaq ichaqa, paykunata nirqan: —Tukuy hinantinpipas Diospa rantinpi rimaqqa allinpaq hap'isqan. Aswanpas llaqtanpi, ayllunpi, wasinpi imallan, mana allinpaq hap'isqaqa, nispa.
[5] Hinan llaqtanpiqa, mana ima atiywan ruwaykunatapas ruwayta atirqanchu. Aswanmi pisillata onqosqakunataqa, paykunaman makinta churaykuspa qhaliyachirqan.
[6] Runakunaq mana iñisqankuraykun, Jesusqa yuyayninpi mana kabesqa kasharqan. Hinan muyuriqnintin llaqta kantukunapi yachachispan purimurqan.
[7] Chaymantataqmi, chunka iskayniyoq yachachisqankunata waqyarqan. Paykunatan iskay-iskaymanta kamachiyta qallarirqan. Hinallataq qhelli supaykunata qarqonankupaqpas kamachikuyniyoq kayta qorqan.
[8] Paykunatan ama ñanninkupaq imatapas apakunankupaq kamachirqan. Ama wayaqatapas, nitaq t'antatapas, nillataq chumpinkupi qolqetapas, aswanpas tawnallankuta apakunankupaqmi kamachirqan.
[9] Hinallataq husut'ankuwanpas churakunankupaq kamachirqan. Ichaqa amataq iskay p'achawanpas p'achakunankupaq kamachillarqantaq.
[10] Paykunatan nillarqantaq: —May wasimanchus haykunkichis chayqa, chay llaqtamanta lloqsinaykichiskaman chayllapipuni qorpachakunkichis.
[11] Maypipas qankunata mana chaskiqkuna, nitaq uyariqkunapas kanmanmi. Sichus chay hina kanman chayqa, chaymanta lloqsispaykichismi chakiykichispa pachanpi hallp'ata chhaphchikunkichis. Paykuna rikuspa yachanankupaqmi, chaytaqa ruwankichis. Cheqaqtan niykichis: ‘Taripay p'unchaypiqa, Sodoma llaqtamantapas, Gomorra llaqtamantapas chay llaqtaqa aswantaraqmi kastigota chaskinqa,’ nispay, nispa.
[12] Paykunataq lloqsispanku, runakuna yuyayman kutirikunankupaq willamurqanku.
[13] Hinan askha supaykunata qarqorqanku. Hinallataq askha onqosqakunatapas aseitewan hawispa qhaliyachirqanku.
[14] Jesuspa sutinmi ancha reqsisqapuniña kasqa karqan. Chayraykun, rey Herodespas Jesusmanta rimayta uyarirqan. Paymi nirqan: —Bautisaq Juanmi wañusqakunamanta kawsariramusqa. Chaymi paypa atiyninkunawan Jesusqa chayta ruwan, nispa.
[15] Wakin runakunan nirqanku: —Eliasmi, nispanku. Wakintaqmi nirqanku: —Diospa rantinpi rimaqmi. Otaq Diospa rantinpi rimaqkunaq hukninkun, nispanku.
[16] Herodestaq ichaqa, chayta uyarispa nirqan: —¡Uman qhoruchisqay Juanmi wañusqakunamanta kawsarirampusqa! nispa.
[17] Herodesmi, wawqen Felipeq warmin Herodiaswan kasarakusqa karqan. Chaymi Herodiasrayku, kikin Herodes kamachispa, Juantaqa hap'ichimuspan, karselpi kadenachimusqa karqan.
[18] Juanmi Herodesta nisqa karqan: —Kamachikuy Simiman hinaqa, manan wawqeykiq warminwan kasarakuytaqa atinkichu, nispa.
[19] Herodiastaqmi ichaqa, Juanta sinchitapuni cheqnikuspa, wañuchiyta munarqan. Manataqmi atirqanchu.
[20] Herodesqa Juanpa chanin, hinallataq ch'uya runa kasqanta yachaspanmi manchakurqan. Chayraykun Herodesqa Juanta waqaycharqan. Payta uyarispataq, anchata iskayrayarqan, ichaqa tukuy sonqopunin paytaqa uyarirqan.
[21] Chaypaq hinan, Herodespa wata hunt'akuynin fiesta p'unchay chayamurqan. Hinan hatun kamachikuqninkunaman, tribunokunaman, Galilea probinsiapi umalliq runakunamanwan hatun senata qorqan.
[22] Hinan Herodiaspa ususinqa, haykuspa tusurqan. Tususpantaqmi Herodesta, mesapi paywan mikhushaqkunatawan kusichirqan. Hinan reyqa sipasta nirqan: —Imachus munasqaykita mañakuway. Hinan ñoqaqa qosayki, nispa.
[23] Payqa, sipasmanmi hurarqan: —Tukuy mañakuwasqaykitan, qhapaq suyuypa kuskannintawanraq qosayki, nispa.
[24] Sipastaq lloqsispan, mamanta nirqan: —¿Imatataq mañakusaqri? nispa. Mamantaq kutichispa nirqan: —Bautisaq Juanpa umanta mañakuy, nispa.
[25] Hinan sipasqa, usqhayllaman reypa kasqanman haykuspa mañakurqan: —Kunanpacha Bautisaq Juanpa umanta, huk platopi qowanaykitan munani, nispa.
[26] Reytaq sinchita llakikurqan. Ichaqa hurasqanrayku, hinallataq mesapi mikhushaqkunarayku, manaña manan niyta atirqanchu.
[27] Kasqan ratupachataq reyqa, Juanpa umanta apamunanpaq huknin guardiata kamachirqan.
[28] Chay guardiataq, karselta rispan, Juanpa umanta qhorumurqan. Hinan Juanpa umanta platopi apaspan, sipasman qorqan. Sipasñataq, mamanman qorqan.
[29] Juanpa yachachisqankunataq chayta uyarispa, rirqanku. Hinan Juanpa ayanta apaspa, p'ampampurqanku.
[30] Jesuspa apostolninkunataq paywan huñukurqanku. Hinan tukuy ruwamusqankuta, hinallataq yachachimusqankutapas, willarqanku.
[31] Hinan Jesusqa paykunata nirqan: —Ch'inniqman rispaykichis, sapaqllapi pisillatapas samaykamuychis, nispa. Hamuqkunapas, hinallataq ripuqkunapas askhan karqanku. Chayraykun manaña mikhunankupaq tiempopas karqanchu.
[32] Hinan paykunalla barkapi ch'inniq cheqasman rirqanku.
[33] Ripuqtinku hinataq, askha runakuna Jesusta reqsirurqanku. Hinan tukuy llaqtakunamanta chakillapi phawaspanku, paykunamantapas ñawpaqtaraq chayman chayarqanku. Hinaspataq Jesusman huñukamurqanku.
[34] Jesustaq barkamanta lloqsispan, ancha askha runakunata rikurqan. Paykunaqa, mana michiqniyoq obehakuna hinan kasharqanku. Chayraykun Jesusqa, paykunata khuyapayarqan. Hinaqtinmi, payqa imaymanakunata paykunaman yachachiyta qallarirqan.
[35] Inti haykuy kaqtinñataq, yachachisqankunaqa Jesusman asuykuspanku payta nirqanku: —Kay cheqasqa ch'inniqmi. Inti haykuyñataqmi kanpas.
[36] Manan imankupas mikhunankupaq kanchu. Chayrayku kampokunaman, hinallataq muyuriqpi llaqta kantukunaman rispa, mikhunankupaq, imallatapas rantikamunankupaq kacharparipullayña, nispanku.
[37] Jesustaq ichaqa, yachachisqankunaman kutichispa nirqan: —Qankunayá mikhunata qoychis, nispa. Paykunataq kutichirqanku: —¿Rispayku, iskay pachak denario qolqewan t'antata rantimuspa mikhuchinaykutachu munanki? nispanku.
[38] Jesustaq paykunata nirqan: —¿Hayk'a t'antaykichistaq kashan? riychis, hinaspa qhawamuychis, nispa. Yachamuspankuñataqmi nirqanku: —Phisqa t'antakuna, hinallataq iskay challwakunallan kashan, nispanku.
[39] Hinan q'omer q'achu pampapi, t'aqa-t'aqata llapankuta tiyachimunankupaq yachachisqankunata kamachirqan.
[40] Hinan t'aqa-t'aqapi, pachak-pachakmanta, phisqa chunka, phisqa chunkamanta tiyaykurqanku.
[41] Hinan Jesusqa phisqantin t'antakunata, iskaynin challwakunatawan hap'iykuspa, hanaq pachata qhawarispan saminchaykurqan. T'antakunata phakmis- pantaq, runakunaq ñawpaqenkuman churamunankupaq yachachisqankunaman qorqan. Hinallataq iskaynin challwakunatapas llapallankuman rakichirqan.
[42] Llapallankun mikhurqanku, hinaspataq saksaykurqanku.
[43] Hinan t'antamanta, challwamantapas puchuqkunata, chunka iskayniyoq kanastakunapi hunt'ata huñunpurqanku.
[44] T'antata mikhuqkunataqmi, phisqa waranqa qharikuna karqanku.
[45] Hinallamanmi Jesusqa, yachachisqankunata barkaman wichanankupaq qatirirqan. Ñawpaqenta qocha chimpa Betsaida llaqtaman rinankupaqmi qatirirqan. Chay hina kashanankamataq, Jesusqa chay askha runakunata despedipusharqan.
[46] Runakunata despedipuspataq, Diosman parlaq orqota rirqan.
[47] Rasphiyaykuytataq, barkaqa qocha chawpipiña kasharqan. Jesustaqmi sapallan hallp'api kasharqan.
[48] Wayran paykuna kontra wayramusharqan. Chayraykun Jesusqa yachachisqankunata ancha sayk'usqa barkata suchuchishasqankuta rikurqan. Yaqa pacha illarimuytataq, payqa qocha unu patanta paykunaman rirqan. Hinan paykunamantaqa karullanta pasaruyta munarqan.
[49] Paykunataq ichaqa, Jesusta qocha unu patanta purishaqta rikururqanku. Hinan kukuchi kananpaq yuyaykuspanku, qaparirqanku.
[50] Paykunaqa, llapallankun Jesusta rikuruspanku, mancharisqa khatatatarqanku. Ichaqa kasqan ratupachan Jesusqa paykunata rimaykurqan. Hinan nirqan: —¡Kallpachakuychis! ¡Ñoqan kani! ¡Ama mancharikuychischu! nispa.
[51] Hinan paykunaq kasqanku, barkaman Jesusqa wicharqan. Wayrataqmi thanipurqan. Yachachisqankunataq sinchi mana yuyayninkupi kabesqa, hinallataq muspharisqa kasharqanku.
[52] Paykunaq sonqonkuqa rumiyasqan kasharqan. Chaymi, chay t'antakunamanta manaraq entiendisqakuchu karqan.
[53] Qocha chimpaman chimpaspankutaq, Genesaret hap'iyman chayarqanku. Hinan barkata watarqanku.
[54] Ichaqa, paykuna barkamanta lloqsiramuqtinkutaq, runakunaqa Jesusta reqsirurqankupacha.
[55] Tukuy chay suyuntan purimusharqanku. Hinan maypichus Jesuspa kashasqanta uyarispanku, chayman onqosqa kunata kamillakunapi apamuyta qallarirqanku.
[56] Jesusqa, llaqta kantukunaman, hatun llaqtakunaman, kampokunaman iman haykurqan. Hinan maymanña haykuqtinpas, onqosqakunata plasakunapi churarqanku. Hinan p'achanpa kantullantapas llamiykunankupaq balikurqanku. Llapan payta llamiykuqkunataq, qhali kapurqanku.