[1] Iskay p'unchay qhepatataq Paskua fiesta, hinallataq mana lebadurayoq t'anta fiesta karqan. Hinan, umalliq saserdotekuna, kamachikuy simita yachachiqkunapiwan Jesusta imaynanmantapas q'otullawan hap'irqonankupaq, hinallataq wañuchinankupaq maskhasharqanku.
[2] Ichaqa nirqankun: —Llaqta runakuna ama ch'aqwanankupaq, fiesta p'unchaypiqa, ama kayta ruwasunchu, nispanku.
[3] Betania llaqtapi lepra onqoyniyoq Simonpa wasinpin, Jesusqa mesaman k'iraykuspa kasharqan. Hinan huk warmi, alabastromanta tuminchapi, ancha balorniyoq mana imawan chhaqrusqa nardomanta q'apashaq hawinata apaykukuspa, hamurqan. Tuminchata p'akispantaq chay warmiqa, q'apashaq hawinata Jesuspa umanman hich'aykuyta qallarirqan.
[4] Wakin chaypi kashaqkunataq ichaqa, phiñakuspanku paykunapura ninakurqanku: —¿Imapaqtaq chay q'apashaq hawinata usuchin?
[5] Aswanchá chay q'apashaq hawinataqa, kinsa pachak kurak denario qolqeman bendekunman karqan, hinaspataq wakchakunaman qonkuman karqan, nispanku. Hinan chay warmipaq sinchita phiñakurqanku.
[6] Jesustaq ichaqa, paykunata nirqan: —¿Imapaqtaq payta rimapayankichis? Payqa allin ruwaytan ñoqapaq ruwan. Chayrayku ama paytaqa hark'aychischu.
[7] Wakchakunaqa qankunawanpunin kashanqaku. Hinan hayk'aqchus munawaqchis chayqa, paykunapaq allinta ruwapuyta atiwaqchismi. Ñoqan ichaqa, mana pasaqllachu qankunawan kashasaq.
[8] Kay warmiqa, atisqantan ruwan. P'ampasqa kanaypaqmi kuerpoyta ñawpaqmantaña hawirqon.
[9] Cheqaqtapunin niykichis: ‘Kay allin willakuyqa, maypipas kay pachantinpi willasqa kanqa chayqa, kay warmiq ruwasqanpas willasqallataqmi kanqa. Paymanta yuyarinankupaqmi willasqa kanqa,’ nispay, nispa.
[10] Hinaqtinmi, chunka iskayniyoq yachachisqanmanta huknin Judas Iskarioteqa, umalliq saserdotekunaq makinman Jesusta hap'ichinanpaq paykunaman rirqan.
[11] Umalliq saserdotekunataqmi, chayta uyarispanku, kusikurqanku. Hinan Judasman qolqeta qonankupaq rimanakurqanku. Hinaqtinmi, Judasqa, imaynallanmantapas hap'ichinanpaq maskhasharqan.
[12] Mana lebadurayoq t'anta fiestaq ñawpaq kaq p'unchayninmi karqan. Chay p'unchaypin Paskua borregota nak'aspa haywaqku. Yachachisqankunataq Jesusta nirqanku: —¿Paskua mikhunata mikhunaykipaqri, maypi wakichimunaykutataq munanki? nispanku.
[13] Jesustaq iskay yachachisqankunata kachaspa nirqan: —Llaqtata riychis. Hinan p'uyñupi unuta apashaq huk runawan tupankichis. Paytataq qatikunkichis.
[14] Maymanchus chay runa haykuqtinmi, wasiyoq wiraqochata ninkichis: ‘Yachachikuqmi nin: “¿Mayqen wasitaq yachachisqaykunawan Paskua mikhuna mikhunaypaqri kashan?” nispan,’ nispaykichis.
[15] Paymi hatun altos wasita allichasqataña rikuchisunkichis. Chaypi ñoqanchispaq wakichimunkichis, nispa.
[16] Yachachisqankunataqmi, lloqsispanku llaqtaman haykurqanku. Imaynatachus Jesusqa nirqan, chay hinatapunitaq tarirqanku. Hinan Paskua mikhunata wakichirqanku.
[17] Rasphiyaykushaqtinñataq, Jesusqa chunka iskayniyoq yachachisqankunapiwan rirqanku.
[18] Mesapi tiyaykuspanku mikhushaqtinkutaq, Jesusqa nirqan: —Cheqaqtapunin niykichis: ‘Qankunamanta hukniykichismi hap'ichiwanqa. Payqa, ñoqawan kuskan mikhushan,’ nispay, nispa.
[19] Hinaqtinmi, llakikuywan sapanka hukninku niyta qallarirqanku: —¿Ñoqachu kasaq? nispanku. Hukpas nillarqantaq: —¿Ñoqachu kasaq? nispa.
[20] Jesustaqmi paykunaman kutichispa nirqan: —Chunka iskayniyoq yachachisqaykunamanta mayqenchus ñoqawan kuska p'ukuman t'antata challpuqmi, hap'ichiwanqa.
[21] Cheqaqtapunin, Runaq Churinqa, imaynan paymanta qelqasqa kashan, chayman hinapuni rishan. Ichaqa, ¡Ay haqay Runaq Churinta hap'ichiqnin runamanta, imaynaraq kanqa! Sichus haqay runa mana nasenmanchu karqan chayqa, aswan allinmi paypaq kanman karqan, nispa.
[22] Mikhushaspankutaq, Jesusqa t'antata hap'iykuspa samincharqan. Hinan t'antata phakmispan paykunaman rakirqan. Nirqantaq: —Hap'iychis, hinaspa mikhuychis. Kayqa kuerpoymi, nispa.
[23] Hinan, kopatapas hap'illarqantaq. Grasiasta qospantaq, paykunaman qorqan. Llapankutaqmi chay kopamanta ukyarqanku.
[24] Hinan Jesusqa yachachisqankunata nirqan: —Kayqa mosoq rimanakuy yawarniymi. Kay yawarniymi askha runakunarayku hich'akun.
[25] Cheqaqtan niykichis: ‘Haqay p'unchay Diospa qhapaq suyunpi mosoq ubaspa rurunmanta ukyanaykaman, manapuniña aswantaqa ukyasaqñachu,’ nispay, nispa.
[26] Dios yupaychana takita takispankutaq, Olibos orqoman lloqsirqanku.
[27] Hinaqtinmi, Jesusqa paykunata nirqan: —Ñoqaraykun, kunan tuta llapallaykichis misk'akunkichis. Qelqasqan kashan: ‘Michiqtan k'irisaq, hinan obehakunaqa ch'eqerichisqa kanqaku,’ nispan. (Zak. 13:7)
[28] Kawsarimpusqay qhepatataqmi ichaqa, qankunaq ñawpaqeykichista Galilea probinsiaman risaq, nispa.
[29] Hinaqtinmi Pedroqa, Jesusta nirqan: —Llapankuña misk'akunqaku chaypas, ñoqaqa manapunin misk'akusaqchu, nispa.
[30] Jesustaqmi payta nirqan: —Cheqaqtan niyki: ‘Kunanmi kay tuta, manaraq iskay kutita gallo waqamushaqtin, qanqa kinsa kutita mananchawanki,’ nispay, nispa.
[31] Pedrotaqmi ichaqa, aswantaraq nirqan: —Qanwan wañunayña kanman chaypas, manapunin hayk'aqpas mananchasqaykichu, nispa. Chay hinallatataqmi llapankupas nillarqankutaq.
[32] Hinan Getsemaní nisqa cheqasman chayarqanku. Jesustaq yachachisqankunata nirqan: —Diosman parlamushanaykama, kaypi tiyashaychis, nispa.
[33] Hinan Jesusqa, Pedrota, Jakobota, hinallataq Juantawan pusarikurqan. Hinaspan manchapakuyta, llakipakuyta ima Jesusqa qallarirqan.
[34] Hinan paykunata nirqan: —Almaymi sinchi llakisqa wañunayashaqraq kashan. Kaypi qhepakuychis, hinaspa rikch'ashallaychispuni, nispa.
[35] Aswanta ñawpaqman rispataq, pampapi qonqoriykukurqan. Hinan atikunmanchus chayqa, tukuy chay imaymanakuna paypi ama pasananpaq Diosman parlarqan.
[36] Nirqantaq: —¡Abba, Yayay, tukuypas qanpaqqa atikunmi! ¡Kay kopata ñoqamanta karunchay! ¡Ichaqa ama ñoqaq munasqaychu, aswanpas qanpa munasqayki kachun! nispa.
[37] Kutimuspantaq paykunata puñushaqta tarirqan. Hinan Pedrota nirqan: —¿Simón, puñushankiraqchu? ¿Manachu huk orallatapas makilla rikch'ayta atirqanki?
[38] Wateqayman ama urmanaykichispaq makilla rikch'aspa Diosman parlashaychis. Cheqaqtapunin espirituqa chaykunata munashan. Aycha kuerpotaqmi ichaqa, pisi-kallpayoq kashan, nispa.
[39] Paykunamantan ñawpaqman puririllarqantaq. Hinan kasqan simikunawan Diosman parlarqan.
[40] Ancha puñuywan atipasqan paykunaqa kasharqanku. Chayraykun Jesusqa kutimuspa, wakmanta puñushaqta paykunata tarillarqantaq. Hinan paykunaqa, mana imatapas kutichiyta atirqankuchu.
[41] Kinsa kutinpin kutimullarqantaq. Hinan paykunata nirqan: —Puñuykuychisraq, hinallataq samaykuychisraq. Oraqa chayamunñan. Qhawariychis, Runaq Churinmi huchasapakunaq makinman hap'ichisqa kanqa.
[42] ¡Sayariychis, hinaspa hakuchis! Qhawariychis. Ñoqata hap'ichiwaqniymi hamushanña, nispa.
[43] Jesús rimashallaqtinraqmi, chunka iskayniyoq yachachisqankunamanta huknin, Judas sutiyoq hamurqan. Paywan kuskataq ancha askha runakuna espadakunayoq, k'aspikunayoq ima hamullarqankutaq. Paykunaqa, umalliq saserdotekunaq, kamachikuy simita yachachiqkunaq, hinallataq kurak runakunaq kamachisqanmi hamurqanku.
[44] Jesusta hap'ichiq Judasmi, señalta paykunaman qosqa karqan: —Pitachus ñoqa much'aykusaq, paymi kanqa. Paytan hap'inkichis. Hinaspataq allinta kuidaspa apankichis, nispa.
[45] Judasqa chayaspan hinataqmi, Jesusman asuykuspan, payta nirqan: —¡Rabí! ¡Rabí! nispa. Hinan payta much'aykurqan.
[46] Hinaqtinmi paykunaqa, Jesusta hap'irqankupacha.
[47] Chaypi kashaqkunamanta huknintaqmi ichaqa, espadanta horqokurqan. Hinan, hatun umalliq saserdoteq kamachinta espadawan waqtaspa, ninrinta qhororurqan.
[48] Jesustaq paykunaman kutichispa nirqan: —¿Huk q'aro suwaman hinachu, espadakunayoq, hinallataq k'aspikunayoq ñoqata hap'iwanaykichispaq lloqsimurqankichis?
[49] Sapa p'unchaymi ñoqaqa qankunawan Dios yupaychana wasipi yachachispay kasharqani. Manataqmi hap'iwarqankichischu. Ichaqa Qelqakunaq hunt'akunanpaqmi, kay hinapuni kanan, nispa.
[50] Hinaqtinmi llapan yachachisqankunaqa, Jesusta saqerparispanku, ayqekurqanku.
[51] Ichaqa, huk waynan, q'alalla kuerponta sabanawan p'isturukuspan, Jesusta qatikurqan. Hinan chay waynata hap'irqanku.
[52] Paytaqmi ichaqa, sabananta wikch'uspa, hap'iqninkunamanta q'alalla ayqekurqan.
[53] Hatun umalliq saserdotemanmi Jesusta aparqanku. Hinan paywan llapan umalliq saserdotekunapas, kurak runakunapas, kamachikuy simita yachachiqkunapas huñunakurqanku.
[54] Hinan Pedroqa, hatun umalliq saserdoteq pationkamaraq karullanta Jesusta qatikurqan. Kamachikunawan kuskataq tiyasharqan. Hinan ninapi q'oñikusharqan.
[55] Umalliq saserdotekuna, hinallataq llapan Konsilio Sanedrinpi kaqkunan, Jesuspa kontranpi imallatapas huchachaspa wañuchinankupaq maskhasharqanku. Manataqmi tarirqankuchu.
[56] Askha runakunan Jesuspa kontranpi yanqa qasinmanta tumpaspa rimarqanku. Manataqmi ichaqa, chay rimasqanku tuparqanchu.
[57] Hinaqtinmi wakin runakunaqa sayarispanku, Jesuspa kontranpi yanqa qasinmanta tumpaspa rimarqanku.
[58] Nirqankutaq: —Payqa nirqanmi: ‘Makiwan ruwasqa kay Dios yupaychana wasitan ñoqa thunisaq. Kinsa p'unchaypitaqmi, mana makiwan ruwasqa Dios yupaychana huk wasita hatarichisaq,’ nispa niqtan ñoqayku uyarirqayku, nispanku.
[59] Ichaqa chay hina kaqtinpas, manapunin rimasqankuqa tuparqanchu.
[60] Hinaqtinmi hatun umalliq saserdoteqa, paykuna chawpipi sayarispan Jesusta tapurqan: —¿Imatataq kay runakunari, qanpa kontraykipi willakushanku? ¿Manachu imallatapas kutichinki? nispa.
[61] Jesustaq ichaqa, ch'inlla karqan. Manataqmi imallatapas kutichirqanchu. Wakmanta tapuspantaqmi, hatun umalliq saserdoteqa payta nirqan: —¿Cristochu qanri kanki? ¿Saminchasqaykuq Churinchu kanki? nispa.
[62] Jesustaq payta nirqan: —Ñoqan kani. Hinan Runaq Churintapas, Atiyniyoqpa paña ladonpi tiyashaqta rikunkichis. Hinallataqmi, phuyu chawpipi hanaq pachamanta hamushaqtapas rikullankichistaq, nispa.
[63] Hinaqtinmi hatun umalliq saserdoteqa, p'achanta llik'ikuspa nirqan: —¿Ima testigokunatañataq nesesitanchisri?
[64] Qankunaqa, Diospa kontranpi k'arak k'amiy simikunata rimasqantaqa uyarinkichisñan. ¿Chayri, imaynataq qankunaman rikch'akusunkichis? nispa. Hinan llapallanku, Jesusqa wañuchisqapuni kananpaq huchacharqanku.
[65] Wakinkunataqmi payman thoqaykuyta, hinallataq uyantapas pakaspanku saqmayta qallarirqanku. Nirqankutaq: —¿Pin chayta ruwasunki? ¡Watuy! nispanku. Hinallataq kamachikunapas payta ch'aqlaspa, maqarqanku.
[66] Pedroqa, uray kaq patiopin kasharqan. Hinan hatun umalliq saserdoteq uywasqan huk kamachi warmi asuykurqan.
[67] Chay warmitaqmi, Pedrota q'oñikushaqta rikurqan. Payta allinta qhawaykuspantaq nirqan: —Qanpas Nazaret llaqtayoq Jesuswanmi kasharqanki, nispa.
[68] Pedrotaq ichaqa, mananchaspa nirqan: —Manan paytaqa reqsinichu. Nitaqmi imatachus rimasqaykitapas yachanichu, nispa. Hinan payqa, hawa patioman lloqsirqan. Chayllamanmi galloqa waqamurqan.
[69] Uywasqa kamachi warmi wakmanta payta rikuruspantaqmi, chaypi sayashaqkunaman, niyta qallarirqan: —Payqa, paykunaq hukninmi, nispa.
[70] Pedrotaq ichaqa, wakmanta mananchallarqantaq. As ratullanmanmi, chaypi sayashaqkunaqa Pedrota wakmanta nirqanku: —Qanqa, Galilea probinsiamantan kanki. Rimayniykipas paykunaq hinapunitaqmi kanpas. Chayrayku, cheqaqtapunin qanqa paykunaq hukninku kanki. nispanku.
[71] Pedrotaqmi ichaqa, ñakayta, hinallataq hurayta qallarirqan. Nirqantaq: —¡Pimantachus rimashasqaykichis chay runataqa, manapunin reqsinichu! nispa.
[72] Hinallamanmi, galloqa iskay kutinpi waqamurqan. Pedrotaqmi, imatachus Jesuspa nisqanta yuyarirurqan. Jesusqa nisqan karqan: —Manaraq iskay kutita gallo waqamushaqtinmi, qanqa kinsa kutita mananchawanki, nispa. Chayta yuyariruspantaqmi, Pedroqa waqayta qallarirqan.