[1] Paykunatan nillarqantaq: —Cheqaqtan niykichis: ‘Kaypi kaqkunamanta wakin runakunaqa, Diospa qhapaq suyun atiywan hamusqanta rikunankukaman, mana wañunqakuraqchu,’ nispay, nispan.
[2] Soqta p'unchay qhepatataq Jesusqa, Pedrota, Jakobota, Juantawan payta riysinankupaq sapaqman pusarqan. Hinan paykunallawan alto orqo pataman wicharqan. Chaypitaqmi, paykunaq ñawpaqenkupi huk niray rikch'ayniyoqman tukurqan.
[3] Jesuspa p'achanqa, ancha k'ancharishaq rit'iman hinaraqmi yuraqman tukurqan. Kay pachantinpi p'acha t'aqsaqpas, manapunin chay hinataqa yuraqyachiyta atinmanchu.
[4] Chayllamanmi Eliasqa, Moiseswan kuska, paykunaman rikhurirqan. Paykunataqmi Jesuswan rimasharqanku.
[5] Hinan Pedroqa, Jesusta nirqan: —Rabí, ñoqaykuq kaypi kashasqaykuqa allinmi. Kinsa ch'ukllakunata ruwanaykupaq niwayku. Hukta qanpaq, huktataq Moisespaq, huktañataq Eliaspaq ruwasaqku, nispa.
[6] Sinchi mancharisqa kashasqankuraykun, Pedroqa mana imatapas niyta atirqanchu.
[7] Hinan huk phuyu hamuspa, paykunata llanthuykurqan. Chay phuyumantataqmi, huk kunka nimurqan: —Munakusqay Churiyqa paymi. Payta uyariychis, nispa.
[8] Chayllamanmi paykunaqa, muyuriqninkuta qhawarispanku manaña pitapas paykunawan kashaqta rikurqankuchu. Aswanpas sapallantaña Jesusta rikurqanku.
[9] Orqomanta uraykamushaqtinkutaq, Jesusqa paykunata kamachirqan: —Chay rikusqaykichistaqa, aman pimanpas willankichischu. Aswanpas Runaq Churin wañusqakunamanta kawsarimpuqtinña willankichis, nispa.
[10] Paykunataq chay simita sonqollankupi hap'irqanku. Paykunapuran, imachus chay wañusqakunamanta kawsarimpuy kasqanta tapunakurqanku.
[11] Hinan Jesusta tapurqanku: —¿Imanaqtintaq kamachikuy simita yachachiqkunari, Eliasraqmi ñawpaqtaqa hamunan ninku? nispanku.
[12] Jesustaq paykunaman kutichispa nirqan: —Cheqaqtapunin Eliasqa, ñawpaqta hamuspa, tukuy imaymanakunata imankaqta churapunqa. ¿Imaynataq Runaq Churin ancha ñak'arinanmanta, hinallataq pisinchasqa kananmantawan qelqasqari kashan?
[13] Ichaqa niykichismi: ‘Eliasqa hamurqanñan. Imaynan paymanta qelqasqa kashan, chayman hinan tukuy ima munasqankuta paytaqa ruwarqanku,’ nispay, nispa.
[14] Yachachisqankunaq kasqanman chayaspantaq, paykunaq muyuriqninkupi ancha askha runakunata rikurqan. Kamachikuy simita yachachiqkunataq, paykunawan tapunakusharqanku.
[15] Kasqan ratutaqmi, llapallan chay askha runakuna Jesusta rikurqanku. Hinan yuyayninkupi mana kabesqa kasharqanku. Payman phawarispankutaq napaykurqanku.
[16] Jesustaq kamachikuy simi yachachiqkunata tapurqan: —¿Imatan yachachisqaykunawan churanakushankichis? nispa.
[17] Huk runataq, askha runa-runamanta kutichispa nimurqan: —Yachachikuq, wawaymi upa supayniyoq kashan. Chaymi qanman pusamurqani.
[18] Maypichus chay supay hap'in, chaypin payta wikapan. Hinan payqa phosoqota aqtupakun. Kirunkunatapas k'arkakichin. Hinaspan aycha kuerponpas chuchuyan. Yachachisqaykikunatataqmi chay supayta qarqonankupaq balikurqani. Manataqmi ichaqa atirqankuchu, nispa.
[19] Paykunaman kutichispantaq Jesusqa nirqan: —¡Yaw mana iñiq miraykuna! ¿Hayk'aqkamataq qankunawanri kashasaq? ¿Hayk'aqkamataq qankunari pasiensiayta tukuwankichis? Chay waynata ñoqaman pusamuwaychis, nispa.
[20] Hinan payman pusamurqanku. Kasqan ratutaq supayqa, Jesusta rikuruspan, waynata sinchita chhaphchikacharqan. Waynataq pampaman wikapakurqan. Qhospaspantaq phosoqotaraq aqtupakurqan.
[21] Jesustaqmi chay waynaq taytanta tapurqan: —¿Hayk'a unayñataq chay hinari kashan? nispa. Paytaq nirqan: —Wawa kasqanmantapacharaqmi.
[22] Askha kutitan, ñak'arichispa wañuchinanpaq, ninaman, otaq unuman wikch'uykun. Sichus imallatapas ruwayta atiwaq chayqa, khuyapayawaspaykiku yanapaykuwayku, nispa.
[23] Jesustaq payta nirqan: —Sichus kreeyta atiwaq chayqa, tukuymi kreeqpaqqa atikun, nispa.
[24] Hinan kasqan ratupacha, weqenwanraq waynaq taytanqa qaparispa nirqan: —¡Señor kreenin! Aswantaraq kreenaypaq yanapaykuway, nispa.
[25] Askha runakunaq huñukamusqanta rikuspantaqmi, Jesusqa qhelli supayta phiñarikurqan. Nirqantaq: —Upayachiq, hinallataq roqt'oyachiq supay, ñoqan kamachiyki: ‘Paymanta lloqsiy. Amañataq hayk'aqpas paymanqa haykuyñachu,’ nispay, nispa.
[26] Hinaqtinmi qhelli supayqa, qaparispan, hinallataq waynata sinchita wat'akichispan lloqsirqan. Waynañataq wañusqa hina kasharqan. Chay hina kaqtinmi, askha runakunaqa nirqanku: —¡Wañusqan kashan! nispanku.
[27] Jesustaq ichaqa, makinmanta hap'iykuspa sayarichirqan. Hinan waynaqa sayarirqan.
[28] Wasiman Jesús haykuqtintaq, yachachisqankunaqa sapaqllapi payta tapurqanku: —¿Imanaqtintaq ñoqaykuri, chay qhelli supayta mana qarqoyta atirqaykuchu? nispanku.
[29] Jesustaq paykunata nirqan: —Chay hina supayqa, manan imawanpas lloqsiyta atinmanchu. Aswanpas Diosman parlaywan, ayunuwan imallan lloqsiytaqa atinman, nispa.
[30] Chaymanta lloqsispankutaq, Galilea probinsianta purisharqanku. Manataqmi piqpa yachanantapas Jesusqa munarqanchu.
[31] Yachachisqankunamantaq yachachispa nirqan: —Runaq Churintan runakunaq makinman hap'ichinqaku. Hinan wañuchinqaku. Wañusqan qhepatataqmi ichaqa, kinsa p'unchaymanta kawsarimpunqa, nispa.
[32] Paykunataq ichaqa, chay nisqanta mana entiendirqankuchu. Hinan tapuykuytapas manchakurqanku.
[33] Kapernaum llaqtamanmi Jesusqa chayarqan. Wasipiña kashaspataq, yachachisqankunata tapurqan: —¿Imamantataq ñanpiri qankunapura churanakusharqankichis? nispa.
[34] Ñanpiqa, mayqenninkuchus hatunpaq qhawarisqa kanankumantan paykunapura churanakusqaku karqan. Chaymi paykunaqa, upallalla kapurqanku.
[35] Hinaqtinmi Jesusqa, tiyaykuspan chunka iskayniyoq yachachisqankunata waqyarqan. Hinan paykunata nirqan: —Sichus pipas ñawpaq kaq kayta munan chayqa, llapamantapas qhepapi, hinallataq llapata serbiqmi kanan, nispa.
[36] Hinan huk wawata hap'iykuspa, paykunaq chawpinkupi sayaykuchirqan. Marq'ariykukuspataqmi, paykunata rimaykurqan.
[37] Nirqantaq: —Pipas kay hinata, ñoqaq sutiypi huk wawata chaskiqqa, ñoqatan chaskiwan. Ñoqata chaskiwaqtaqmi, mana ñoqatachu chaskiwan. Aswanpas kachamuwaqniyta chaskin, nispa.
[38] Juantaq Jesusta nirqan: —Yachachikuq, huk runatan sutiykipi supaykunata qarqoshaqta rikumuyku. Payqa manan ñoqaykuwan kuskachu qanta qatikusunki. Mana ñoqaykuwan kuska qanta qatikusqasunkiraykun, payta hark'amurqayku, nispa.
[39] Jesustaq ichaqa nirqan: —Ama hark'amuychischu. Manan pipas sutiypi atiywan ruwaykuna ruwasqan qhepamanqa, ñoqamanta mana allin rimaytaqa atinmanchu.
[40] Pipas mana ñoqanchis kontra kaqqa, ñoqanchiswanmi kashan.
[41] Cristoq kasqaykichisrayku, pillapas huk basopi unuta sutiypi haywarisunkichismanmi. Sichus chay hina kanman chayqa, cheqaqtan niykichis: ‘Manapunin hayk'aqpas premiontaqa chinkachinqachu,’ nispay, nispa.
[42] Jesusqa nillarqantaqmi: ―Pillapas ñoqapi iñiq kay wawakunaq hukninta misk'achiqqa kanmanmi. Sichus chay hina kanman chayqa, hatun molino rumita kunkanman wataykuspa, mama-qochaman wikch'uykuyninkun aswan allinqa kanman.
[43] Sichus makiyki huchaman urmachisunkiman chayqa, wit'upuy. Iskay makiyoq kashaspayki infiernoman haykunaykimantaqa, ch'ulla makillayoq kawsayman haykuyniykin aswan allinqa kasunki. Chay ninaqa, mana hayk'aq wañuqmi.
[44] Chaypiqa manan kurunpas wañunchu. Ninapas, manataqmi hayk'aqpas wañunchu. (Isa. 66:24)
[45] Sichus chakiyki huchaman urmachisunkiman chayqa, wit'upuy. Iskay chakiyoq kashaspayki infiernoman wikch'uykusqa kanaykimantaqa, ch'ulla chakillayoq kawsayman haykuyniykin aswan allinqa kasunki. Chay ninaqa, mana hayk'aq wañuqmi.
[46] Chaypiqa manan kurunpas wañunchu. Ninapas, manataqmi hayk'aqpas wañunchu. (Isa. 66:24)
[47] Sichus ñawiyki huchaman urmachisunkiman chayqa, horqoruy. Iskay ñawiyoq kashaspayki infiernoman wikch'uykusqa kanaykimantaqa, ch'ulla ñawillayoq Diospa qhapaq suyunman haykuyniykin aswan allinqa kasunki.
[48] Chaypiqa manan kurunpas wañunchu. Ninapas, manataqmi hayk'aqpas wañunchu. (Isa. 66:24)
[49] Llapa runakunan ninawan kachichasqa kanqaku. Hinallataq llapa sakrifisiokunapas kachiwan kachichasqan kanqaku.
[50] Kachiqa allinmi. Ichaqa kachitaqchus q'aymayapunman chayqa, ¿imawantaq kachichasqa kanqa? Qankuna kikiykichis kachiyoq kaychis. Hinallataq thak kaypi hukkuna-hukkunawan kawsaychis, nispa.