[1] Jesusqa Dios yupaychana wasimanta lloqsimpushaqtintaq, huknin yachachisqanqa payta nirqan: —¡Yachachikuq, kay hina niraq rumikunatapas, hinallataq kay hina niraq wasikunatapas, qhawariy! nispa.
[2] Jesustaq payman kutichispa nirqan: —¿Kay hatuchachaq wasikunata rikushankichu? Kaypiqa, manan rumipas rumi patapi qhepanqachu. Aswanpas llapallanmi thunisqa kanqa, nispa.
[3] Dios yupaychana wasiq chimpan Olibos orqopin Jesusqa tiyasharqan. Hinan Pedro, Jakobo, Juan, hinallataq Andrespiwan sapaqllapi payta tapurqanku.
[4] Nirqankutaq: —¿Hayk'aqtaq chay imaymanakunari hunt'akunqa? ¿Tukuy chay imaymanakuna hunt'akunanpaqña kashaqtinri, ima señaltaq kanqa? Chayta niwayku, nispanku.
[5] Jesustaq paykunaman kutichiyta qallarirqan: —Kuidakuychis. Ama piwanpas q'otuchikuychischu.
[6] Askha runakunan ñoqaq sutiypi hamunqaku. Ninqakutaq: ‘Ñoqan Cristoqa kani,’ nispanku. Chay hinapin, askha runakunata q'otunqaku.
[7] Ichaqa, maypachachus awqa tinkuykunamanta, hinallataq awqa tinkuy rimaykunamanta uyarinkichis chayqa, aman mancharikunkichischu. Chaykunaq pasananqa chay hinapunin kanan. Chaywanpas ichaqa, manaraqmi p'uchukayqa chayamunraqchu.
[8] Huk suyun, wak suyuq kontranpi hatarinqa. Hinallataq, huk qhapaq suyupas, wak qhapaq suyuq kontranpi hatarillanqataq. Hinallataq tukuy hinantinpi pacha chhaphchikuykunapas, yarqaykunapas, ch'aqwaykunapas kanqa. Chaykunaqa nanaykunaq qallariyllanraqmi.
[9] Hinaqtinmi Konsilio Sanedrín nisqa t'aqaq huñukuyninkunaman qankunata hap'ichisunkichis. Hinan, judío runakunaq huñukunanku wasikunapi soq'aykusunkichis. Ñoqaraykun, kamachikuqkunaq ñawpaqenman, hinallataq reykunaq ñawpaqenkuman apasqa kankichis. Chaytaqa paykuna rikuspa yachanankupaqmi apasunkichis. Chayrayku, qankuna kikiykichista kuidakuychis.
[10] Ñawpaqtaqa allin willakuyraqmi, llapan suyukunaman willasqapuni kanan.
[11] Kamachikuqkunaman hap'ichinasunkichispaq apasuqtiykichisqa, manan qankunachu rimaqkunaqa kankichis. Aswanpas Santo Espíritun qankunaq chawpinta rimanqa. Chayrayku, imatachus rimanaykichismantaqa ama llakikuychischu. Nitaq ñawpaqmantapaschu yuyaykuychis. Aswanpas, chay ratupiqa, Diospa imatachus yuyaychasqanta rimaychis.
[12] Wawqenmi, wawqellantataq wañunanpaq hap'ichinqa. Hinallataq taytapas, wawanta hap'ichinqa. Wawakunan, taytankuq kontranpi hatarinqaku. Wañuchinankupaqtaq hap'ichinqaku.
[13] Sutiyraykutaqmi, llapallan runakuna cheqnikusunkichis. Ichaqa, pichus p'uchukaykama takyaqmi, qespisqa kanqa, nispa.
[14] Jesusqa nillarqantaqmi: —Diospa rantinpi rimaq Danielmi, Diospa millakusqan wañuy ñak'ariyman churaq runaq hamunanmanta rimarqan. Hinallataqmi, paypa mana kanan cheqaspi sayaykunanmanta rimarqan. (Dan. 9:27; 11:31; 12:11) Pipas chayta ñawinchaqqa, entiendichun. Chay hinaqa, maypachachus chay runata rikunkichis chayqa, Judea probinsiapi kashaqkuna orqokunaman ayqekuchunku.
[15] Pipas wasi patapi kashaqqa, amaña uraykuchunñachu. Nitaq wasinmanta imallatapas horqonanpaq wasintaqa haykuchunñachu.
[16] Hinallataq chakrapi kashaqpas, kapanta apananpaq amaña qhepamanqa kutichunñachu.
[17] Ichaqa, ¡ay, chay p'unchaykunapi wiksallikuq warmikunamantapas, hinallataq ñuñuq wawayoq warmikunamantapas, imaynaraq kanqaku!
[18] Ayqekuyniykichisqa, ama paray tiempopi kananpaq Diosman parlaychis.
[19] Haqay p'unchaykunapin, mana hayk'aq hatun ñak'ariy kasqan kanqa. Diospa kay pachata kamasqanmantapachan kunankama, chay hina hatun ñak'ariyqa mana karqanchu. Nitaqmi hayk'aqpas kanqañachu.
[20] Señorqa manachus haqay p'unchaykunata huch'uyachinman karqan chayqa, manan pipas kawsanmanñachu karqan. Ichaqa pikunatachus payqa akllakurqan, paykunaraykun haqay p'unchaykunataqa huch'uyachirqan.
[21] Chay hinaqa, sichus pipas nisunkichis: ‘Qhawariychis, Cristoqa kaypin kashan,’ nispa, otaq nisunkichis: ‘Qhawariychis, haqaypin kashan,’ nispa chayqa, aman kreenkichischu.
[22] Falso cristokuna, hinallataq falso profetakunan hatarimunqaku. Atikunmanchus chayqa, Señorpa akllasqankunatawanraq pantachinankupaqmi señalkunatawan, musphana ruwaykunatawan ruwanqaku.
[23] Ñawpaqmantañan qankunamanqa llapanta nirqaykichis. Chayrayku, ¡makilla kuidakuychis! nispa.
[24] Nillarqantaqmi: —Ichaqa, chay p'unchaykunapin, haqay hatun ñak'ariypa qhepantaqa, inti tutayanqa. Hinallataq killapas manaña k'anchanqañachu.
[25] Ch'askakunapas hanaq pachamantan urmaykamunqaku. Hinan, hanaq pachapi atiykunapas chhaphchisqa kanqa. (Isa. 13:10)
[26] Hinaqtinmi, Runaq Churinta, phuyupi hatun atiywan, hinallataq hatun k'anchariywan hamushaqta, runakunaqa rikunqaku.
[27] Chaymantataqmi, angelninkunata kachamunqa. Hinan, teqsimuyuq tawantin k'uchunkunamanta akllakusqankunata huñumunqaku. Hallp'a pachaq k'uchunmanta, hanaq pachaq k'uchunkamaraq huñumunqaku.
[28] Igos sach'amanta rikch'anachiyta yachaychis. Maypachachus k'allmankuna q'omeryamuqtin, hinallataq rap'inkunapas ch'ikchimuqtinmi, poqoy tiempo sispaykamushasqantaña yachan kichis.
[29] Chay hinaqa, qankunapas chay imaymanakunaq pasasqanta rikuspaykichisqa, punkuq qayllanpiña kashasqayta yachaychis.
[30] Cheqaqtan niykichis: ‘Manaraq llapan chaykuna hunt'akunankamaqa, manapunin kay p'unchay miray runakuna tukukunqachu,’ nispay.
[31] Hanaq pachapas, hallp'a pachapas tukukunqan. Simiykunan ichaqa, manapuni tukukunqachu, nispa.
[32] Hinan nillarqantaq: —Haqay p'unchaymantawan, oramantawanmi ichaqa, mana pipas yachanchu. Manan hanaq pachapi angelkunapas yachankuchu. Nitaq Churipas yachanchu. Aswanpas sapan Yayallan yachan.
[33] Hayk'aqchus chay p'unchay kanantaqa, manan yachankichischu. Chayrayku, makilla qhawakuychis, rikch'ashaychis, hinallataq Diosman parlashaychis.
[34] Imaynan huk runa karuta purinanpaq wasinta saqen. Saqespantaq kamachinkunaman imachus ruwanankuta sapankata kamachin. Hinallataq punku qhawaqtapas qhawananpaq kamachillantaq. Chay hinapunin kanqa.
[35] Hayk'aqchus wasiyoq wiraqochaq hamunantaqa manan yachankichischu. Rasphiyaykuytapas, kuska tutatapas, gallo waqaytapas, otaq tutamantantapas hamunmanmi. Chay hinaqa, rikch'ashaychis.
[36] Qonqaylla hamuspa, ama puñushaqtachu tarinasunkichispaq rikch'ashallaychispuni.
[37] Qankunaman nisqaytaqa, llapamanmi nini: ‘¡Rikch'ashaychis!’ nispay, nispa.