[1] T'aqasqakunapaq ofrendamantan qelqamuykichis. Imaynan Galasia probinsiapi iñiq t'aqakunaman kamachirqani, chay hinallatataq qankunapas ruwaychis.
[2] Sapa semana qallariy p'unchaypi, sapanka hukniykichis, tarisqaykichisman hina, imallatapas sapaqman t'aqaspa waqaychaychis. Hinan ñoqa chayamuqtiy, manaña ofrendakuna hoqarikushanqañachu.
[3] Chayamuspaytaqmi, qankunaq rimanakusqaykichisman hina, kartantinta apachisaq. Hinan chay ofrendaykichistaqa, Jerusalén llaqtaman apanqaku.
[4] Sitaqchus ñoqa rinaypaqpas allin kanman chayqa, ñoqawanmi paykunaqa rinqaku.
[5] Masedonia probinsiantapunin pasanay kanqa. Chaymi Masedonianta pasashaspayña qankunamanpas chayamusaykichis.
[6] Qankunawanpaschá qhepakusaq, otaq paray tiempota chaypi kashasaq. Chaymantataq maymanchus rinay ñanman churaykuwankichis.
[7] Kunanqa manan pasashaspallaychu qhawaykuyta munashaykichis. Aswanqa, sichus Señor munanqa chayqa, huk tiempo qankunawan qhepakuytan suyakushani.
[8] Ichaqa, Éfeso llaqtapin Pentekostés p'unchaykama qhepakusaq.
[9] Chaypi askha awqakunaña kashanku chaypas, llank'anaypaqmi ancha kusapuni huk hatun punku, kicharisqa kashan.
[10] Timoteoqa Señorpa llank'ananpin ñoqa hina llank'an. Chayrayku, sichus chayamusunkichis chayqa, qankunawan mana manchaykachakuspa kashananpaq qhawariychis.
[11] Amataq pipas Timoteota pisipaqqa hap'ichunchu. Wawqe-panakunapiwanmi paytaqa suyashani. Chayrayku, ñoqaman hamunanpaq, thak kaypi ñanman churaykamunkichis.
[12] Wawqe Apolostan, wawqe-panakunapiwan qankunaman hamunanpaq anchatapuni rimapayarqani. Ichaqa, manapunin imaynanmantapas kunan hamuyta munarqanraqchu. Chaywanpas hayk'aqchá atinqa, chayñan qankunamanqa hamunqa.
[13] Rikch'ashallaychispuni. Iñiypipas allin takyasqallapuni kashaychis. Qhari hinapuni sayashaychis. Hinallataq kallpachakuspallapuni kashaychis.
[14] Tukuy ima ruwakuyniykichistapas, munakuywanpuni ruwashaychis.
[15] Wawqe-panaykuna, Estefanaspa familianqa Akaya probinsiapi ñawpaq kaq rurun. Paykunaqa t'aqasqakunata serbinankupaqmi yuyaykukurqanku. Chaytaqa ñan yachankichisña.
[16] Paykunaman, hinallataq llapan mana thanispa llank'aypi yanapakuqkunaman, kasukunaykichispaqmi balikuykichis.
[17] Estefanaspiwan, Fortunatopiwan, Akaikopiwanmi qankunaq mana yanapawasqaykichista, yanapawarqanku. Chaymi paykunaq chayamusqankumanta kusikuni.
[18] Paykunan espirituyta, hinallataq espirituykichistapas thak kayman churarqanku. Chayrayku paykunataqa allintapuni qhawariychis.
[19] Asia probinsiapi kashaq iñiq t'aqakunan napaykamusunkichis. Aquilapas, Prisilapas, hinallataq wasinpi kashaq iñiq t'aqapas, Señorpi tukuy sonqomantapunin napaykamusunkichis.
[20] Llapallan wawqe-panakunan napaykamusunkichis. Qankunapas ch'uya much'aykuywan hukkuna-hukkunawan napaykunakuychis.
[21] Ñoqa Pablon, kay napaykukuyta kikin makiywanpuni qelqamuykichis.
[22] Sichus pipas Señor Jesucristota mana munakunchu chayqa, ñakasqa kachun. ¡Señorqa hamushanmi!
[23] Señor Jesucristoq allinpaq qokuynin qankunawanpuni kachun.
[24] Cristo Jesuspi munakuyniyqa llapallaykichiswanpuni kachun. Ahinapuni kachun.