[1] Kunantaq ichaqa, idolokunaman haywasqa mikhunamanta rimasaq. Chay mikhuna reqsisqanchistaqa llapanchismi yachanchis. Chay reqsisqanchistaqmi, umata hoqarichiwanchis. Munakuytaqmi ichaqa, wiñachiwanchis.
[2] Sichus pillapas tukuy yachaq kasqanta yuyaykun chayqa, manaraqmi imatapas iman kaq yachananta hinaraqchu yachan.
[3] Ichaqa mayqellanpas Diosta munakun chayqa, Diosmi paytaqa reqsin.
[4] Chay hinaqa, idolokunaman haywasqa mikhunaqa, manan imapaschu. Hinallataq chay idolokunapas, kay pachapiqa manan imapaschu. Chaytaqa yachanchismi. Manataqmi wak diosqa kanchu, aswanpas sapan Diosnillanchis kasqantan yachanchis.
[5] Wakinkunaqa ninkun: ‘Hanaq pachapipas, hallp'a pachapipas, dioskunaqa kashanmi. Hinallataq askhapunin dioskunapas, wiraqochakunapas kanku,’ nispanku.
[6] Ñoqanchispaqmi ichaqa, sapan Dios Yayalla kapuwanchis. Paymantataqmi lliw imaymanakunapas hamun, ñoqanchispas paypaqmi kawsashanchis. Sapan Señor Jesucristollan kapuwanchis. Paypa chawpintan tukuy imaymanakunapas kashan. Hinallataqmi ñoqanchispas paypa chawpinta kawsashanchis.
[7] Ichaqa, chay imaymanakunataqa, manan llapa runakunachu yachanku. Wakinkunaqa chay idolokunaman haywasqa mikhuna kasqanta yachashaspa, mikhunkuraqmi. Paykunaq konsiensianku, pisi-kallpa kasqanraykutaqmi, chaywan qhellichakunku.
[8] Ichaqa, manan mikhunata mana mikhusqanchisraykuchu pisichasqaqa kasunchis. Nitaqmi mikhunata mikhusqanchisraykupaschu aswan allinqa kasunchis. Chayrayku, manan mikhunachu Diospa chaskinanpaq hinamanqa tukuchiwasunchis.
[9] Ichaqa, chay mikhuyta atisqaykichis, pisi-kallpayoqkunata ama urmachiq kananpaq kasqanta qhawariychis.
[10] Qanqa, imaynachus kasqanta yachankin. Idolokunaman haywasqa mesapi qanqa tiyashawaqmi. Hinan konsiensianpi pisi-kallpayoq mayqenpas rikusunkimanmi. Hinaspataq, mikhushaqta rikuspasunki, ¿chay idoloman haywasqa mikhunata paypas manachu mikhuytaqa munallanmantaq?
[11] Yachashasqaykiraykun, pipaqchus Cristoqa wañurqan, chay pisi-kallpa wawqeyki, wañuy ñak'ariyman chayanqa.
[12] Chay hinapin, wawqe-panakunaq kontranpi huchallikuspaqa, pisi-kallpayoq konsiensiankuta k'irispa, Cristoq kontranpi huchallikushankichis.
[13] Chay hinaqa, sichus wawqeyta mikhuna urmachinman chayqa, ñoqaqa manapunin hayk'aqpas aychata mikhusaqchu. Wawqeyman misk'anata mana churanayraykun, ñoqaqa manapuni mikhusaqchu.