[1] Chaymantapas wawqe-panaykuna, qankunaman willasqay allin willakuymantan sut'itapuni rimaykuykichis. Allin willakuytan chaskirqankichis, hinan chaypi allin takyasqa kashankichis.
[2] Sichus willasqayta takyachirqankichis chayqa, chay willasqaypa chawpintan Diosqa qespichisunkichis. Mana hinaqa, iñisqaykichismi yanqapaq kanman.
[3] Ñawpaqtaqa imatachus chaskirqani, chayllatataqmi yachachirqaykichispas. Qelqaq nisqanman hinan, Cristoqa huchanchiskunarayku wañurqan.
[4] Hinan payqa p'ampasqa kapurqan. Qelqaq nisqanman hinataqmi, kinsa p'unchaymanta kawsarimpurqan.
[5] Hinan Cefasman rikhurirqan. Chaymantataq chunka iskayniyoq apostolninkunamanpas rikhurillarqantaq.
[6] Chaymantataq phisqa pachakmanta aswan askha wawqe-panakunaman ch'ulla kutillapi rikhurirqan. Paykunamantaqa askharaqmi kunankama kawsashanku. Wakintaqmi ichaqa, wañukapunkuña.
[7] Chaymantataqmi, Jakoboman rikhurirqan. Chaymantataq llapan apostolkunamanpas rikhurillarqantaq.
[8] Llapankumanta qhepallatañan, mana nasenanpi naseqman hina, ñoqamanpas rikhurillawarqantaq.
[9] Diospa iñiq t'aqanta qatiykachaqmi karqani. Chaymi apostolkunamanta aswan huch'uy kaqlla kani. Hinallataq manan apóstol nispa sutichasqa kanaypaq hinapaschu kani.
[10] Ichaqa, Diospa allinpaq qokuyninwanmi, imaynachus kasqayqa kani. Ñoqapi kashaq chay allinpaq qokuynintaqmi, mana yanqapaqchu kawarqan. Aswanmi llapan wakinkunamantapas aswantaraq llank'arqani. Ichaqa, manataqmi ñoqachu chay llak'aqqa karqani. Aswanpas, ñoqawan kashaq Diospa allinpaq qokuyninmi llank'arqan.
[11] Hinaqa, ñoqaña kaspaypas, otaq paykunaña kaspankupas, chay hinatan Diospa simintaqa willaykiku. Chay hinapitaqmi, qankunaqa iñikapurqankichis.
[12] Kunantaqmi ichaqa, wañusqakunapuramanta Cristoq kawsarimpusqanta willayku. ¿Imaynataq qankunamanta wakinniykichisqa, wañuqkunaq kawsarimpuyninqa manan kanchu nispari ninkichis?
[13] Sichus wañusqakuna mana kawsarimpunkumanchu karqan chayqa, manallataqmi Cristopas kawsarimpunmanchu karqan.
[14] Sitaqchus Cristo mana kawsarimpurqanchu chayqa, willakuyniykuqa manan balinchu. Qankunaq iñiyniykichispas manallataqmi balinchu.
[15] Diosqa Cristota kawsarichimpusqanmanta testigokunan kayku. Sichus wañusqakuna mana kawsarimpunchu chayqa, manallataqmi Diosqa Cristotapas kawsarichimpurqanchu. Hinaspachá Diospa falso testigonmanta hap'isqa kaykuman.
[16] Sichus wañusqakuna mana kawsarimpunkuchu chayqa, manallataqmi Cristopas kawsarimpurqanchu.
[17] Sitaqchus Cristo mana kawsarimpurqanchu chayqa, iñisqaykichisqa manan imapaqpas balinchu. Hinallataq qankunapas huchallaykichispiraqmi kashankichis.
[18] Chay hinaqa, Cristopi wañukapuqkunapas, wañuy ñak'ariymanmi ripurqanku.
[19] Sichus Cristopi suyakuyninchis kay pacha kawsayllapaq kanman chayqa, ¡llapa runakunamantapas aswan khuyapayanaraqmi kanchis!
[20] Kunanmi ichaqa, wañusqakunamanta Cristoqa kawsarimpurqan. Hinan Cristoqa wañusqakunamanta ñawpaq kaq kawsarimpuq kapun.
[21] Imaynan huk runaq chawpinta wañuy hamurqan, chay hinallataqmi, huk runaq chawpinta wañusqakunamanta kawsarimpuypas hamullarqantaq.
[22] Imaynan Adanpi llapa runakunaqa wañupunku, chay hinallatataqmi, hayk'an Cristopi kashaqkunapas kawsachisqa kanqaku.
[23] Ichaqa sapankataqmi kantullanmanta kawsarimpunqaku. Nawpaq kaq kawsarimpuqqa Cristopunin. Chaymantataqmi Cristo hamuqtin, paypa kaqkunaqa kawsarimpullanqakutaq.
[24] Maypachachus llapan umalliqkunatapas, llapan kamachikuqkunatapas, llapan atiyniyoqkunatapas Cristo chinkachipunqa, hinallataq Cristoqa, qhapaq suyutapas Dios Yayaman hap'ichipunqa chayñan, p'uchukayqa chayamunqa.
[25] Cristoqa, llapan awqankunata, chakinpa pachanman churanankaman kamachikunanpuni.
[26] Qhepa kaq wañuchinan awqaqa wañuymi.
[27] Tukuy imaymanakunatan Cristoq chakinpa pachanman Diosqa churarqan. Qelqaqa ninmi: ‘Diosmi, tukuy imaymanakunatapas paypa chakinpa pachanman churarqan,’ nispa. (Sal. 8:6) Chayta nispanqa, manapunin tukuy imaymanakunata Cristoq chakinpa pachanman churaqmantachu rimashan.
[28] Ichaqa, maypachachus Diosqa tukuy imaymanakunata Churiq kamachikuyninman kasuchinqa chayñan, kikin Churipas kamachikuqman hina Diosman kasukunqa. Tukuy imaymanakunata Churiq kamachikuyninman churaqqa Diosmi! Tukuypuni kananpaq, hinallataq tukuy imaymanakunapipas kananpaqwanmi, Diosqa chayta ruwanqa.
[29] Chaymantapas, ¿wañusqakunaq rantinpi bautisakuqkunari, imatataq ruwanqaku? Sitaqchus wañusqakuna manapuni kawsarimpunkuchu chayqa, ¿imapaqtaq wañusqakunaq rantinpiri bautisakunku?
[30] ¿Imanaqtintaq ñoqaykuri, tukuy oraslla peligropi kashayku?
[31] Señorninchis Cristo Jesuspi, qankunamanta hatunchakuspaymi, sapa p'unchay ñoqaqa wañushaniraq.
[32] Sichus runa kayniypi phiña animalkunawan Éfeso llaqtapi maqanakurqani chayqa, ¿ima allinniypaqtaq kanman? Hinallataq, sichus wañusqakuna mana kawsarimpunmanchu chayqa, allintan nirqanku: ‘Paqarinmi wañukapusun, chayrayku mikhuykusun, ukyaykusun,’ nispankuqa. (Isa. 22:13)
[33] Ama pantaychischu. Mana allin rimaykunan, allin ruwaykunataqa waqllichinku.
[34] Qankuna p'enqakunaykichispaqmi nini: ‘Wakinkunaqa manan Diosta reqsinkuchu. Chayrayku rikch'ariychis, hinaspa chanin kaqman kutiripuychis, amañataq huchallikuychisñachu.’ nispay.
[35] Ichaqa pillapas ninmanmi: ‘¿Imaynatataq wañusqakunari kawsarimpunqaku? ¿Imayna kuerpoyoqtaq hamunqakuri?’ nispa.
[36] ¡Yaw, mana yuyayniyoq! Tarpusqayki muhu ch'ikchimunanpaq, ñawpaqtaqa wañunanraqmi.
[37] Tarpunki chayqa, manan kasqan kuerpopunichu lloqsimunqa. Aswanpas, trigo muhuqña kaspapas, mayqen muhuqña kaspapas, ullihachanmi lloqsimunqa.
[38] Diosmi ichaqa, munasqanman hina, kuerpota qon. Sapanka muhumantaqmi huk kuerpotaqa qon.
[39] Manan llapa aychaqa kaq kamallachu kanku. Cheqapaq, runakunaq aychanqa, huk niraqmi. Uywakunaq aychanpas, huk niraqmi. Challwakunaq aychanpas, huk niraqmi. Hinallataq phalaq animalkunaq aychanpas, huk niraqllataqmi.
[40] Hanaq pachapi kaqkunaq kuerponkupas kanmi. Hinallataq, hallp'a pachapi kaqkunaq kuerponkupas kallantaqmi. Ichaqa hanaq pachapi kaq kuerpokunaq k'anchariyninqa, huk niraqmi. Hinallataq, hallp'a pachapi kaq kuerpokunaq k'anchariyninpas, huk niraqllataqmi.
[41] Intiq k'anchayninpas, huk niraqmi. Killaq k'anchayninpas, huk niraqmi. Hinallataq ch'askakunaq k'anchayninpas, huk niraqllataqmi. Chaywanpas huk ch'askaq k'anchayninqa, wak ch'askaq k'anchayninmantapas huk niraqmi.
[42] Wañusqakunaq kawsarimpuyninpas chay hinallataqmi. Ismupuqtan p'ampakun. Ichaqa, mana hayk'aq ismuqtaqmi kawsarimpunqa.
[43] Pisipaq qhawarisqatan p'ampakun, ichaqa k'anchariyniyoqtaqmi kawsarimpunqa. Pisi-kallpayoqtan p'ampakun, ichaqa atiyniyoqtaqmi kawsarimpunqa.
[44] Huchapakuq aycha kuerpotan p'ampakun, ichaqa espiritual kuerpoyoqtaqmi kawsarimpunqa. Huchapakuq aycha kuerpoqa kanmi, hinallataq espiritual kaq kuerpopas kallantaqmi.
[45] Chay hinallatataqmi Qelqapas nin: ‘Ñawpaq kaq runa Adanqa, kawsashaq almayoqmi karqan,’ nispan. (Gen. 2:7) Qhepa kaq Adantaqmi ichaqa, kawsay qokuq espíritu karqan.
[46] Ichaqa, manan espiritual kaqchu ñawpaqtaqa karqan. Aswanpas huchapakuq aycha kuerpon ñawpaqtaqa karqan. Chaymantañan espiritual kaqqa karqan.
[47] Ñawpaq kaq runaqa hallp'aq ñut'unmanta ruwasqan karqan. Hinan kay pachallamanta karqan. Iskay kaq runataqmi ichaqa, hanaq pachamanta Señorpuni karqan.
[48] Imaynan hallp'aq ñut'unmanta kaqqa karqan, chay hinallapunin hallp'aq ñut'unmanta kaqkunapas kanku. Hinallataq, imaynan hanaq pachamanta kaqqa karqan, chay hinallapunin hanaq pachamanta kaqkunapas kallankutaq.
[49] Imaynan hallp'aq ñut'unmanta kaqpa rikch'aynin karqanchis, chay hinallataqmi hanaq pachamanta kaqpa rikch'ayninpas kallasunchistaq.
[50] Wawqe-panaykuna, kaytan nini: ‘Aychayoq, yawarniyoq runaqa, manan Diospa qhapaq suyunmanqa haykuyta atinmanchu. Nitaqmi ismuq kaqpas, mana ismuq kaqmanqa haykuyta atinmanchu,’ nispay.
[51] Qhawariychis, huk pakasqa yachaytan niykichis: ‘Manan llapanchischu wañupusunchis. Ichaqa llapanchismi huk niray rikch'ayniyoqman tukuchisqa kasunchis.
[52] Kornetan waqamunqa. Hinan wañusqa kaqkunaqa, mana ismuqña kawsarimpunqaku. Hinan ñoqanchispas huk niraqman tukuchisqa kasunchis. Chayrayku, p'uchukay korneta waqamuqtinqa, huk ratuchallapi, huk ñawi ch'ipiq niychallapin, chayqa kanqa.
[53] Hinan kay ismuq kuerponchispas, mana ismuq kaqwan p'achakunanpuni. Hinallataq kay wañupuqlla kuerponchispas, mana wañuq kaqwan p'achakunanpuni.
[54] Kay ismuq kuerponchis mana ismuq kaywan p'achakuqtinmi, hinallataq kay wañupuq kuerponchispas mana wañuq kaywan p'achakuqtinmi, kay hina qelqasqanku hunt'akunqa. Chay Qelqakunaqa kay hinatan ninku: ‘¡Atipaymi wañuytaqa oqoyarqapunña! (Isa. 25:8)
[55] Yaw wañuy, ¿maypitaq t'urpunaykiri kashan? Yaw ukhu pacha, ¿maypitaq atipaq kayniykiri kashan?’ nispanku. (Ose. 13:14)
[56] Wañuypa t'urpunanqa, huchan. Kamachikuy Simitaqmi huchaq atiynin.
[57] Ichaqa, Señorninchis Jesucristoq chawpintan, Diosqa atipayta qowarqanchis. Payllamanpunitaq grasiaspas qosqa kachun.
[58] Chay hinaqa, munakusqay wawqe-panaykuna, allin takyasqallapuni, ama kuyurispa kashaychis. Hinallataq Señorpa llank'ananpi llank'aspapas wiñashallaychispuni. Señorpaq anchatapuni llank'ayniykichis, mana yanqapaqchu kasqantaqa yachankichisñan.