[1] Cristoq serbiqninta hina, hinallataq Diospa pakasqa yachayninkuna qhawaqta hina, llapa runapas ñoqaykuta qhawariwachunku.
[2] Hinaspapas, Diospa pakasqa yachayninkunata qhawaqkunaqa, sapanka hukninkun hunt'aqllapuni tarisqa kananku.
[3] Qankunaq, otaq mayqen runaq chaninchananpi chaninchawanankupas ñoqapaqqa manan imapaschu. Ñoqa kikiytapas manataqmi chaninchakunichu.
[4] Hinaña konsiensiaypi, mana ima mana allin kashanchu chaypas, manan chaywanchu, mana huchayoqqa kani. Chaninchawaqniyqa Señortaqmi.
[5] Chay hinaqa, Señorpa hamunankama manaraq tiemponpi ama chaninchaychischu. Señorpunin tutayaqpi pakasqa kaqkunataqa sut'iman horqomunqa. Hinallataq sonqoq yuyaykusqankunatapas rikuchinqa. Hinaqtinmi Diospa hatunchasqan sapanka hukpas kanqa.
[6] Wawqe-panaykuna, qankunaraykun tukuy kaykunata nini. Ñoqatawan, Apolostawanmi yachaqakunaykichispaq hina churarqani. Qelqaq nisqanmanta ñoqaykuq chawpiykuta ama sinchitachu yuyaymananaykichispaqmi chaytaqa ruwarqani. Wakinpa kontranpi hukman sayapakuspa, ama hatunchakuywan hunt'aykusqa kashanaykichispaq iman chaytaqa ruwarqani.
[7] ¿Pitaq huk runamanta aswan allinpaqri qhawarishasunki? ¿Imataq mana chaskisqaykiri kapusunki? Sichus chaskirqankiña chaypas, ¿imanaqtintaq manapas chaskishawaqchu hinari rimaykachanki?
[8] Qankunaqa saksaykusqañan kashankichis. Qhapaqñataqmi kankichispas. Mana ñoqaykuwanpas kamachikushankichisñan. ¡Ñoqaykupas qankunawan kamachikunaykupaq, kamachikushasqaykichisqa allinmi kanman!
[9] Ñoqaykun, kay pachapaqpas, angelkunapaqpas, runakunapaqpas asipayawanankupaq hina churasqa karqayku. Chayraykun, yuyaykusqayman hinaqa, ñoqayku apostolkunata qhepallataña Diosqa paykunaman rikhurichiwarqanku. Wañuyman huchachasqa runakunata hinaraqmi paykunamanqa rikhurichiwarqanku.
[10] Ñoqaykuqa, Cristoraykun mana yuyayniyoq kayku. Qankunataqmi ichaqa, Cristopi yuyaysapakuna kankichis. Ñoqaykuqa pisi-kallpayoqmi kayku. Qankunataqmi ichaqa, kallpasapakuna kankichis. Runakunapas, qankunataqa allinpaqmi hap'isunkichis. Ñoqaykutataqmi ichaqa, pisipaq hap'iwanku.
[11] Kunan kay oraskaman yarqasqalla, hinallataq ch'akisqalla kashayku. Mana p'achayoq, hinallataq runakunaq saqmaykusqanmi kashayku. Manataqmi tiyanaykupaq wasiykupas kanchu.
[12] Kikin makiykuwanmi sayk'usqallaña llank'ashayku. K'amiwaqtinkupas saminchaykun. Qatiykachawaqtinkupas hinallatan muchukuyku.
[13] Ñoqaykuq kontraykupi mana allin simikunata rimaqtinkupas, sumaq simikunawanmi kutichiyku. Kunantaqmi, kay pachapi qhelli hina, llapa runaq wikch'usqan q'opa hina qhawarparisqa kayku.
[14] Manan kaytaqa p'enqachinaypaqchu, aswanpas ñoqaq munakusqay wawaykunata hina, anyaykunaypaqmi qelqamuykichis.
[15] Ñoqaqa Cristo Jesuspin allin willakuypa chawpinta churiyarqaykichis. Chayrayku chunka waranqaña Cristopi pusaqniykichiskuna kaqtinpas, manan askha taytaykichiskunaqa kanmanchu.
[16] Chay hinaqa, ñoqata qatichikuwanaykichispaqmi balikuykichis.
[17] Chayraykun Señorpi hunt'aqllapuni munakusqay churiy Timoteota kachamurqaykichis. Paymi Cristopi imaynatachus purisqaykunatapas yuyarichisunkichis. Chaykunallatataqmi tukuy cheqaspi, hinallataq tukuy iñiq t'aqakunapipas yachachishani.
[18] Wakinniykichistaqmi ichaqa, manañapas ñoqaqa hayk'aqpas qankunaman hamuymanñachu hinaraq, hatunchakuywan hunt'aykusqa kashankichis.
[19] Ichaqa, Señor munaqtinqa, usqhayllamanmi qankunaman hamusaq. Hinaspan, manapuni hatunchakuywan hunt'aykusqa kashaqkunaq rimasqallankutachu reqsimusaq. Aswanpas atiyninkutawanmi reqsimusaq.
[20] Diospa qhapaq suyunqa, manan rimaykunallapichu kashan, aswanpas atiypin kashan.
[21] ¿Qankunaman imayna hamunaytataq munashankichisri? ¿Qankunaman k'aspintin hamunaytachu munashankichis? ¿Ichari munakuywan, hinallataq llamp'u kay espirituwan hamunaytachu munashankichis?