[1] Ichaqa wawqe-panaykuna, espiritual kaqkunamantan yachanaykichistaqa munani.
[2] Mana iñiqraq kashaspaykichis, upa idolokunaq qhepanta aysasqa hinaraq, risqaykichistaqa yachankichismi.
[3] Manan pipas, Diospa Espiritunpa chawpinta rimashaspaqa: ‘Jesusqa ñakasqa kachun,’ nispaqa ninmanchu. Aswanpas, Santo Espírituq chawpinta rimashaspallanmi: ‘Jesusqa Señormi,’ nispa niytaqa atinman.
[4] Kunantaq ichaqa, Diospa ruwana qokuyninkunaqa imaymananiraq kashan. Espiritutaqmi ichaqa, kasqallanpuni.
[5] Señorpaq llank'anakunapas imaymananiraqmi kashan. Señortaqmi ichaqa, kasqallanpuni.
[6] Hinallataqmi ruwaykunaq ruruyninqa imaymananiraq kashan. Lliw runakunapi tukuy imaymanakunata ruwaq Diostaqmi ichaqa, kasqallanpuni.
[7] Espirituqa, sapanka runaq allinninpaqmi rikuchikun.
[8] Hukmanmi Espírituq chawpinta yachaywan rimananpaq qosqa kashan. Huk kaqmantaqmi ichaqa, kasqan Espírituq chawpillantataq yuyaywan rimananpaq qosqa kashan.
[9] Huk kaqmantaq, kasqan Espírituq chawpillantataq iñiy qosqa kashan. Huk kaqmantaqmi, kikin Espírituq chawpillantataq qhaliyachiy ruwaykuna qosqa kashan.
[10] Wakinmantaq ichaqa, atiywan ruwaykuna qosqa kashan. Wakinmantaq, Diospa rantinpi rimaq kanankupaq qosqa kashan. Wakinmantaq, espiritukunata reparanankupaq qosqa kashan. Wakinmanñataq, imaymana wak simikunata rimanankupaq qosqa kashan. Wakinmanñataqmi, wak simi rimaykunata sut'inchanankupaq qosqallataq kashan.
[11] Ichaqa tukuy chay imaymana kaqkunataqa, ch'ullallan ruwan. Payqa, kasqan Espiritullapunin. Paytaqmi, munasqanman hina, sapanka hukman, sapaq-sapaqta rakin.
[12] Kuerpoqa ch'ullallan. Ichaqa askha miembrokunayoqtaqmi. Kuerpoq llapan miembronkunataqmi, askhaña kashaspapas, ch'ulla kuerpollapi kashanku. Cristopas chay hinallataqmi.
[13] Judío runakunaña, otaq griego runakunaña, kamachikunaña, otaq mana kamachikunaña kashaspapas, huk kuerpollaña kananchispaqmi, ch'ulla Espiritullapi llapallanchis bautisasqa karqanchis. Huk Espiritullatataqmi llapanchisman ukyachiwarqanchispas.
[14] Chaymantapas kuerpoqa, manan ch'ulla miembrollayoqchu, aswanpas askha miembrokunayoqmi kashan.
[15] Chakichus ninman: ‘Manan makichu kani, chayraykun mana kuerpomantachu kani,’ nispa chaypas, ¿manachu kuerpopi miembrollapuni kashan?
[16] Sitaqchus ninri ninman: ‘Manan ñawichu kani, chayraykun mana kuerpomantachu kani,’ nispa chaypas, ¿manachu kuerpopi miembrollapuni kashan?
[17] Llapan kuerpochus ñawi kanman chayqa, ¿maypitaq ninriri kashanman? Llapan kuerpochus ninri kanman chayqa, ¿maypitaq senqari kashanman?
[18] Kunantaq ichaqa, miembrokunata, sapanka hukta, Diosqa munasqanman hina, aycha kuerpopi churarqan.
[19] Llapan miembrokunachus ch'ulla miembrolla kanman chayqa, ¿maypitaq kuerpori kashanman?
[20] Kunantaqmi ichaqa, askha miembrokunaña kashanku chaypas, kuerpoqa ch'ullallapuni.
[21] Ñawiqa manan makita niyta atinmanchu: ‘Manan qantaqa nesesitaykichu,’ nispaqa. Nitaqmi umapas chakikunata ninmanchu: ‘Manan qankunataqa nesesitaykichischu,’ nispaqa.
[22] Aswanqa, aycha kuerpopi pisi-kallpa qhawarisqa miembrokunan, aswan allintaraqqa balinku.
[23] Kuerponchispi pisi munakusqanchis kaqkunatan, aswan balorniyoqwanraq p'achachinchis. Hinallataq, mana munaykukuna kaq miembronchiskunatapas aswan sumaqtaraq qhawarinchis.
[24] Ancha allinpaq qhawarisqanchis miembronchiskunaqa, manan imatapas nesesitankuchu. Diosmi ichaqa, pisilla kaqman, aswan sumaqta qhawarisqa kananpaq, kuerpopi tupachirqan.
[25] Kuerpopi mana t'aqanakuy kashananpaq, aswanpas llapan miembrokuna, hukkuna-hukkunamanta llakipayanakunankupaqmi, chay hinataqa tupachirqan.
[26] Chay hinaqa, sichus huknin miembro nanaypi tarikun chayqa, llapan miembrokunan paywan kuska nanachikunku. Hinallataq, sichus huknin miembro hatunchayta chaskin chaypas, llapan miembrokunan paywan kuska kusikunku.
[27] Kunantaqmi, qankunaqa Cristoq kuerpon kankichis. Sapankaykichistaq, sapaq-sapaq miembronkuna kankichis.
[28] Hukkunatan iñiq t'aqapi Diosqa churarqan. Ñawpaq kaqpi, apostolkunata churarqan. Iskay kaqpitaq, Diospa rantinpi rimaqkunata churarqan. Kinsa kaqpitaq yachachiqkunata churarqan. Chaymantataq, atiywan ruwaykuna ruwaqkunata churarqan. Chaymantataqmi, qhaliyachiqkunatawan, yanapaykuqkunatawan, pusaqkunatawan, hinallataq imaymana wak simikunapi rimaqkunatawan churallarqantaq.
[29] ¿Llapankuchu apostolkuna kanku? Manan. ¿Llapankuchu Diospa rantinpi rimaqkuna kanku? Manan. ¿Llapankuchu yachachiqkuna kanku? Manan. ¿Llapankuchu atiywan ruwaykunata ruwaqkuna kanku? Manan.
[30] Hinallataq, ¿llapankuchu qhaliyachinankupaq qokuytaqa chaskirqanku? Manan. ¿Llapankuchu imaymana wak simikunataqa rimanku? Manan. ¿Llapankuchu sut'inchaqkunaqa kanku? Manapunin.
[31] Chaywanpas, Diospa ruwana qokuyninkunamantaqa allin kaqninkunatayá maskhaychis. Kunantaqmi ichaqa, aswan allin kaq ñantaraq rikuchisaykichis.