[1] Wawqe-panaykuna, qankunaman Diosmanta willaq hamuspayqa, manan ancha rimakuy yachaq kaywanchu, nitaq yachaysapa kaywanpaschu hamurqani.
[2] Qankunamanta mana imatapas yachanaypaqmi yuyaykukurqani. Aswanpas Jesucristomanta yachayllatan yuyaykurqani. Paymi chakatasqa karqan.
[3] Qankuna ukhupitaqmi, ñoqaqa pisi-kallpayoq kaywan, sinchi manchakuywan, hinallataq khatatataywan kasharqani.
[4] Manan rimasqaypas, nitaq willasqaypas runakuna uyachiq yachaysapa rimayninkunallawanchu karqan. Aswanpas Espirituwan, atiypiwanmi willasqaypiqa rikuchikurqan.
[5] Chay hinapin, iñiyniykichisqa mana runakunaq yachayninpichu teqsichasqa kashanqa. Aswanpas Diospa atiyninpin teqsichasqa kashanqa.
[6] Chaywanpas, iñiypi takyasqa kayman aypaqpuran yachaymantaqa rimayku. Ichaqa manan chaytaqa, kunan tiempopi yachaytachu, nitaqmi kunan tiempopi umalliqkunaq chinkaripuq yachayninkutapaschu rimayku.
[7] Aswanpas Diospa pakasqa yachayninmantan rimashayku. Chay pakasqa yachaytan Diosqa, wiñay-wiñaymantapacharaq ñoqanchis hatunchasqa kananchispaq waqaycharqan.
[8] Sichus kay tiempopi umalliqkuna chay pakasqa yachayta reqsinkuman karqan chayqa, k'anchariyniyoq Señortaqa manan hayk'aqpas chakatankumanchu karqan. Chaymi, mana mayqenninkupas chay yachaytaqa reqsirqankuchu.
[9] Ichaqa qelqasqan kashan: ‘Ñawiq mana rikusqanta, nitaq ninriq uyarisqanta, nillataq runaq sonqonpi yuyaykusqa kaqkunatan, Diosqa munakuqninkunapaq wakichirqan,’ nispa. (Isa. 64:4)
[10] Santo Espirituqa llapantan t'aqwin. Diospa llapan yuyaykusqankunatawanraqmi t'aqwin. Chayraykun Diosqa, ñoqaykuman Espiritunpa chawpinta chaykunata reqsichiwarqanku.
[11] Hinaqa, ¿runakunaq yuyaykusqantari, pitaq reqsinman? Chaytaqa, ¿manachu paypi kashaq espiritullan reqsin? Chay hinallataqmi, Diospa yuyaykusqankunatapas mana pipas reqsinchu. Aswanpas Diospa sapan Espiritullanmi reqsin.
[12] Ñoqaykuqa, manan kay pachapi kaq espiritutachu chaskirqayku. Aswanpas imatachus Diosqa yanqallanmanta qowasqankuta yachanaykupaqmi, Diosmanta hamuq Espiritutaqa chaskirqayku.
[13] Chay imaymanakunamanta rimaspaykuqa, manan runaq yachayninwan yachachisqa simikunatachu rimashayku. Aswanpas Santo Espírituq yachachisqan simikunatan rimashayku. Chaymi espiritual kaqkunataqa, espiritual kaqkunaq chawpinta sut'inchakun.
[14] Diospa Espiritunpa kaqninkunataqa espiritual kaqkunallawanmi chaninchakunan. Chayraykun huchapakuq runaqa, Diospa Espiritunpa kaqninkunataqa mana chaskiyta atinchu, nitaq entiendiytapas atinchu. Hinan paypaqqa mana yuyayniyoqpa rimasqan hina kanku.
[15] Espiritual kaq runataqa, manan pipas chaninchanchu. Paytaqmi ichaqa, tukuyta chaninchan.
[16] Chay hinaqa, ¿pitaq Señorpa yuyaynintari reqsinman? ¿Pitaq paytari yuyaychanman? (Isa. 40:13) Ñoqanchispan ichaqa, Cristoq yuyaynin kapuwanchis.