[1] Imaynan ñoqapas Cristota qatichikuni, chay hinallataq qankunapas ñoqata qatichikuwaychis.
[2] Wawqe-panaykuna, tukuy imakunapin yuyarikuwarqankichis. Hinallataq yachachiwasqanku yachachikuytan, qankunaman iman kaqllatapuni qorqaykichis. Chay yachachikuytataqmi, qankunaqa takyachishankichis. Chaymi qankunata hatunchaykichis.
[3] Ichaqa, llapallan qharikunaq umanqa Cristo kasqantan yachanaykichista munani. Qhariqa, warmiq umanmi. Hinallataqmi Diospas Cristoq uman.
[4] Llapan qharichus, umanta qatakuspa Diosman parlan, otaq profetisan chayqa, umantan p'enqayman churan.
[5] Ichaqa, llapa warmipas, umanta mana qatakuspa Diosman parlan, otaq profetisan chaypas, umantan p'enqayman churan. Chayqa, umantapas k'isuchikunman hinan kanman.
[6] Aswanmi, sichus warmi, mana uman qatakuyta munanchu chayqa, llapan chukchanta rutuchikuchun. Sitaqchus chukchan rutuchikuyta, otaq uman k'isuchikuyta p'enqakun chaytaq ichaqa, umanta qatakuchun.
[7] Qhariqa, Diospa rikch'aynin, hinallataq k'anchariyninmi. Warmitaqmi ichaqa, qosanpa k'anchariynin. Chayraykun qhariqa, mana umanta qatakunanchu.
[8] Qhariqa, manan warmimantachu hamurqan, aswanpas warmin qharimanta hamurqan.
[9] Chaymantapas, Diosqa manan warmihawachu qharitaqa kamarqan. Aswanmi warmita qharihawa kamarqan.
[10] Chaymi warmiqa, angelkunahawa, qosanman kasukuq kasqan señal kananpaq umanta qatakunan.
[11] Señorpin ichaqa, qharipas mana warmi kaqtinqa manan kanmanchu. Hinallataq, warmipas, mana qhari kaqtinqa, manan kallanmantaqchu.
[12] Imaynan warmiqa qharimanta hamun, chay hinallataqmi qharipas warmimanta nasemun. Llapantaqmi ichaqa, Diosmanta hamun.
[13] ¿Warmiq mana umanta qatakuspa Diosman parlayninri chaninchu kanman? Chaytaqa qankuna kikiykichis chaninchaychis.
[14] Qhariq chukchanta wiñachikuyninqa p'enqaymi. ¿Manachu kay pachapi kawsayqa chayta yachachiwanchis?
[15] Aswanpas warmipaqqa, chukchan wiñachikuymi aswan sumaqpuni. Paymanqa Diospunin uma qatakunanpa rantinta chukchata qorqan.
[16] Chaywanpas, sichus chaymanta pipas churanakuyta munan chayqa, manan ñoqaykuqa chay hina ruwayta yachaykuchu. Nitaqmi Diospa iñiq t'aqanpas chay hina ruwaytaqa yachallankutaqchu.
[17] Kunan, kayta nisqaykichis chayqa, manan qankunata hatunchanaypaqchu nisaq. Maypachachus huñukunkichis chayqa, manan allin kaqpaqchu huñukunkichis. Aswanpas mana allin kaqpaqmi huñukunkichis.
[18] Ñawpaqta, iñiq t'aqa hina huñunakuqtiykichisqa, qankunapurapi t'aqanakuykuna kashasqantan uyarini. Wakin uyarisqaytaqa kreenin.
[19] Qankunapurapi t'aqanakuykunaqa kananpunin. Chay hinapin, qankunapurapi Diospa aprobasqankuna kaqkunaqa reqsichikunqaku.
[20] Ch'ulla runa hinalla huñunaykukuspaykichisqa, manan Señorpa senanta mikhunaykichispaq hinachu huñunaykukunkichis.
[21] Sapanka huktaqmi, kikinpa senanta mikhuspa ñawparqon. Wakintaq, yarqasqa kashanku. Wakinñataqmi, machasqaña kashanku.
[22] Maypichus mikhunaykichispaq, ukyanaykichispaqpas, ¿manachu wasiykichisri kapusunkichis? ¿Icha Diospa iñiq t'aqantachu pisipaq hap'inkichis? ¿Ichari mana imayoqkunatachu p'enqachishankichis? ¿Imanisaykichistaqri? ¿Hatunchasaykichischu? Manan chaymantaqa hatunchaykichismanchu.
[23] Ñoqan Señormanta kay hina yachachikuyta chaskirqani, hinan qankunamanpas yachachirqaykichis: Señor Jesusqa, hap'ichisqa kasqan tutan t'antata hap'irqan.
[24] Hinan grasiasta qospan, chay t'antata phakmispa nirqan: ‘Hap'iychis, hinaspa mikhuychis. Kayqa, qankunarayku phakmisqa kuerpoymi. Kaytaqa, ñoqamanta yuyarikuwanaykichispaq ruwaychis,’ nispa.
[25] Chay hinallataqmi, mikhusqan qhepataña, kopatapas hap'ispa nirqan: ‘Kay kopaqa, yawarniypi mosoq rimanakuymi. Kaytaqa, sapa kuti ukyaspaykichis, ñoqamanta yuyarikuwanaykichispaq ruwallaychispuni,’ nispa.
[26] Kay t'antata sapa kuti mikhuspaykichisqa, hinallataq kay kopamantapas sapa kuti ukyaspaykichisqa, Señorpa wañusqantan, paypa hamunankama willankichis.
[27] Chay hinaqa, pipas mana mikhunanpaq, nitaq ukyananpaq hinaqa kashanmanmi. Sichus chay hina kashaspa, chay t'antata mikhun, hinallataq chay kopamantapas ukyan chayqa, Señorpa kuerponmantawan, yawarninmantawanmi huchachasqa kanqa.
[28] Chay hinaqa, sapanka hukyá pay kikinta t'aqwikuchun. Hinaspataq chay t'antata mikhuchun, hinallataq chay kopamantapas ukyachun.
[29] Pipas mana chaypaq hina kashaspa, Señorpa kuerpon kasqanta mana reparaspa mikhun, hinallataq ukyanpas chayqa, pay kikinpaqmi huchachayta mikhun, hinallataq ukyanpas.
[30] Chayraykun, qankunapurapi askha onqosqakuna, hinallataq pisi-kallpayoqkunapas kashanku. Askhañataqmi wañukapunkupas.
[31] Ichaqa, sichus ñoqanchis kikinchista allinta t'aqwikusunman chayqa, manan chaninchasqachu kasunman.
[32] Señormi ichaqa, chaninchawaspanchis kastigawanchis. Kay pacha runakunatawan kuskata mana huchachawananchispaqmi kastigawanchis.
[33] Chay hinaqa wawqe-panaykuna, maypachachus mikhunaykichispaq huñunaykukunkichis chayqa, hukkuna-hukkunawanyá suyaykunakuychis.
[34] Sichus mayqenpas yarqasqa kashan chayqa, huñunakuyniykichis ama chaninchasqa kananpaq, wasinpi mikhuchun. Wakin kaqkunatan ichaqa, chayman hamuspayña allichasaq.