[1] Wawqe-panaykuna, llapallankun machulanchiskunaqa phuyuwan pakaykusqa karqanku. Llapallankutaqmi qochaq chawpinta pasarqanku. Chaytan yachanaykichista munani.
[2] Phuyuq chawpinta, hinallataq qochaq chawpintan, Moisespi llapallanku bautisasqa karqanku.
[3] Kasqan espiritual mikhunallatataqmi llapanku mikhurqanku.
[4] Llapallankutaqmi, kasqan espiritual ukyanallata ukyarqanku. Hinallataq qhepanku hamuq espiritual qaqamanta ukyarqanku. Chay qaqataqmi, Cristo karqan.
[5] Diosmi ichaqa, yaqapas llapallankumanta mana kusisqachu karqan. Chaymi paykunaqa, ch'inniqpi wañuchisqa karqanku.
[6] Chaykunaqa ñoqanchispa yachaqakunanchispaqmi pasarqan. Imaynan paykunaqa mana allin kaqkunata munapayarqanku, chay hinata ñoqanchispas amaña mana allin kaqkunata munapayashananchispaqmi chaykunaqa pasarqan.
[7] Wakinninkuqa, idolota yupaychaqkunan karqanku. Chay hinaqa, amaña qankunapas wakinninku hina idolota yupaychaqkunachu kaychis. Qelqaqa ninmi: ‘Mikhunanpaqwan, ukyananpaqwanmi llaqtaqa tiyaykurqan. Hinamantataqmi, q'ochukunanpaq sayarirqan,’ nispan. (Exo. 32:6)
[8] Wakinninkuqa, qhelli puriypin kasharqanku. Chay hinaqa, amaña ñoqanchispas wakinninku hina qhelli puriypichu purisunchis. Paykunamantataq, ch'ulla p'unchayllapi, iskay chunka kinsayoq waranqa runakuna wañupurqanku.
[9] Wakinninkuqa, Cristotan wateqarqanku, hinan mach'aqwaykuna paykunata wañuchirqan. Chay hinaqa, amaña ñoqanchispas wakinninku hina, Cristota wateqasunchu.
[10] Wakinninkuqa, chhuchupakurqankun. Hinan wañuchiqqa paykunata wañuchirqan. Chay hinaqa, amallataq qankunapas wakinninku hina chhuchupakuychischu.
[11] Llapan chay imaynakunaqa, ñoqanchispa yachaqakunanchispaqmi pasarqan. Ñoqanchis, p'uchukay tiempopi kashaqkunata anyaykuwananchispaqmi chaykunaqa qelqasqa karqan.
[12] Chay hinaqa, pipas allin takyasqapuni kashasqanta yuyaykun chayqa, ama urmananpaq kuidakuchun.
[13] Qankunamanqa, manan runakunaq mana atipay atinan huk niray wateqaychu hamurqasunkichis. Diosmi ichaqa, hunt'aqpuni. Payqa, manan ima mana atipanaykichis wateqay hamunasunkichistapas munanqachu. Aswanpas Diosqa, qaqata sayaspallapuni kashanaykichispaqmi, wateqaytawan kuskata, chay wateqaymanta lloqsinaykichispaq kallpata qosunkichis.
[14] Chay hinaqa munakusqaykuna, idolokuna yupaychaymanta ayqekuychis.
[15] Yuyaysapakunaman hinapunin rimapayashaykichis. Chay nisqaytaqa qankuna chaninchaychis.
[16] Ñoqaykuqa samincha kopatan saminchayku. Chay kopaqa, ¿manachu Cristoq yawarninpi huk sonqolla kawsay? Hinallataq phakmisqayku t'antapas, ¿manachu Cristoq kuerponpi huk sonqolla kawsaypuni?
[17] Llapanchismi ch'ulla t'antallamanta mikhuysikunchis. Chayraykun, ch'ulla t'antallaña kaqtinpas, ñoqanchisqa askha kashaspanchispas, ch'ulla kuerpolla kanchis.
[18] Aycha mirayman hina, Israelmanta kaqkunata qhawariychis. Sakrifikasqa kaqkunamanta mikhuqkunaqa, ¿manachu altarmanta mikhuysikuqkuna kanku?
[19] ¿Chayri imaninaytataq nishani? ¿Idolokunaman haywasqankuri balenmi nisaqchu, icha idolokunaqa baleqmi nisaqchu? ¡Manapunin!
[20] Aswanmi nini: ‘Mana-judío runakuna, sakrifisiota haywaspankuqa, supaykunamanmi haywashanku. Manataqmi Diosmanchu haywashanku,’ nispay. Hinan supaykunawan kuska kashanaykichista, mana ñoqaqa munanichu.
[21] Manan Señorpa kopanmantawan, supaykunaq basonmantawan ukyaytaqa atiwaqchischu. Nitaq Señorpa mesanmantawan, supaykunaq mesanmantawan mikhuysikuy tapas atillawaqchistaqchu.
[22] ¿Señortaqa phiñachisunchischu? ¿Paymantari aswan kallpayoqchu kanchis?
[23] Tukuy imaymanakunatapas ruwaytaqa atinin, ichaqa manan llapanchu allinniypaqqa kanman. Tukuy imaymanakunatapas ruwaytaqa atinin, ichaqa manan llapanchu wiñachiwanqa.
[24] Ama pipas kikinpa allinllantaqa maskhachunchu. Aswanpas hukpa allinnintapas maskhallachuntaq.
[25] Llapan qhatunapi bendesqa aychataqa konsiensiahawa, ama imatapas tapuspalla mikhuychis.
[26] Hallp'a pachapas, tukuy chaypi kaqkunapas Señorpapunin. (Sal. 24:1)
[27] Sichus mayqen mana iñiqpas mikhunaykichispaq waqyasunkichis, qankunataq riyta munashankichis chayqa, llapan ñawpaqeykichisman churamusqankuta mikhuychis. Konsiensiahawataq, ama imatapas tapuspalla mikhuychis.
[28] Ichaqa, hallp'a pachapas, tukuy chaypi kaqkunapas Señorpapunin. (Sal. 24:1) Chayrayku, sichus pipas nisunkichis: ‘Kay aychaqa idoloman haywasqan karqan,’ nispa chayqa, chay willasqasunkichisrayku, hinallataq konsiensiahawa, ama chaytaqa mikhuychischu.
[29] Ichaqa, manan qanpa konsiensiaykimantachu nishani. Aswanpas willaqniykiq konsiensianmantan nishani. Ñoqaqa kacharichisqan kani. Chay hinaqa, ¿imanaqtintaq kacharichisqa kayniyri hukpa konsiensianwan chaninchasqa kanman?
[30] Sichus ñoqa grasiasta qospa mikhuysikuni chayqa, ¿imanaqtintaq chay grasiasta qospay mikhusqaymantari, mana allinta rimakuwanku?
[31] Chay hinaqa, mikhushankichisña, otaq ukyashankichisña, otaq imataña ruwashankichis chaypas, llapallantapuni Diosqa hatunchasqa kananpaq ruwaychis.
[32] Judío runakunapaqpas, griego runakunapaqpas, hinallataq Diospa iñiq t'aqanpaqpas ama misk'achiqqa kaychischu.
[33] Manan ñoqaq allinnillaytachu maskhani, aswanpas askha runakunaq allinnintan qespikunankupaq maskhani. Chayraykun, ñoqaqa tukuy imaymanapi llapa runakunata kusichini.