[1] Munakuyllapipuni kashaychis. Espiritual kaqkunatapas, munallaychispuni. Llapanmantapas aswantaraqqa, profetisayta munashallaychispuni.
[2] Wak simi rimaypi rimaqqa, manan runakunamanchu riman, aswanqa Diosllamanmi riman. Manataqmi pipas paytaqa entiendinchu. Espírituq chawpintataqmi ichaqa, pakasqa yachaykunata riman.
[3] Diospa rantinpi rimaqmi ichaqa, runakunata wiñachinanpaq, kallpanchaykunanpaq, hinallataq sonqochananpaq riman.
[4] Pipas wak simi rimaypi rimaqqa, pay kikillantan wiñachikun. Diospa rantinpi rimaqmi ichaqa, iñiq t'aqata wiñachin.
[5] Chay hinaqa, wak simikunata rimaqmantaqa, profetisaymi aswan balorniyoqqa. Iñiq t'aqata wiñachinanpaq, chay rimasqanta sut'inchanman chayllan allinqa kanman. Chaymi ñoqaqa llapaykichis wak simita rimanaykichista munayman. Chaymantapas, aswantaraqqa profetisanaykichistan munayman.
[6] Kunantaqmi ichaqa, wawqe-panaykuna, sichus wak simi rimaykunata rimaspay, qankunaman hamuyman chayqa, ¿ima allinniykichispaqtaq kanman? Hinallataq, manachus Diospa rikuchisqanta hina rimaywan, otaq, allin yuyaywan, otaq Diospa rantinpi rimaq hina rimaywan, otaq yachaywan hinapuni rimaykuykichisman chayqa, ¿ima allinniykichispaqtaq kanman?
[7] Qenapas, hinallataq arpapas, manan kawsayniyoqchu kanku, ichaqa waqankun. Manachus waqasqankuq tononta sut'ita reqsikunman chayqa, ¿imaynapitaq qenachus otaq arpachus waqashasqantari reparakunman?
[8] Hinallataqmi, sichus awqa tinkuypaq kornetata waqachiq, mana sut'itachu waqachinman chayqa, ¿pitaq awqa tinkuypaqri wakichikunman?
[9] Chay hinallataqmi qankunapas, sichus wak simita mana sut'itachu rimawaqchis chayqa, ¿imaynatataq rimasqaykichisri entiendisqa kanman? Aswanpas chay rimasqaykichisqa, wayramanpas rimashawaqchis hinan kanman.
[10] Kay pachapiqa may askha rimaykunan kan. Manataqmi mayqenpas mana entiendinapaq hinaqa kanchu.
[11] Chayrayku, sichus ñoqa chay wak rimaykuna, imaninantachus nisqanta mana entiendinichu chayqa, chay rimaqpaqqa wak suyumanta runa hinan kani. Hinallataq, paypas ñoqapaq wak suyumanta runa hinan kallantaq.
[12] Chay hinallataqyá qankunapas, espiritual kaqkunatataq yuyaykushankichis chayqa, iñiq t'aqaq wiñananpaq anchatapuni chaytaqa maskhaychis.
[13] Chayrayku, wak simi rimaypi rimaqqa, nisqanta sut'inchananpaq, Diosmanta mañakuchun.
[14] Sichus ñoqa wak simi rimaypi Diosman parlayman chayqa, espirituymi Diosman parlanqa. Yuyayniypitaq ichaqa, mana ima ruruypas qhepanqachu.
[15] Chay hinaqa, ¿imatataq ruwasaqri? Espirituywan Diosman parlaspayqa, yuyayniywanpas, Diosman parlallasaqtaqmi. Hinallataq espirituywan takispayqa, yuyayniywanpas takillasaqtaqmi.
[16] Sichus espiritullaykiwan grasiasta qoshanki chayqa, huk pisi yuyayllayoq runa chaypi kashanmanmi. ¿Imaynatataq payri, grasias qosqaykimanta mana entiendishaspa: ‘Ahinapuni kachun,’ nispa ninman?
[17] Cheqapaq, qanqa allintan grasiasta qonki. Huk kaqtataqmi ichaqa, mana wiñachinkichu.
[18] Ñoqaqa, wak simi rimaykunapin, llapaykichismanta aswantaraq rimani. Chaymantan, Diosmanqa grasiasta qoni.
[19] Ñoqaqa, wak simi rimaypi, chunka waranqa simikunata rimaymanmi. Chaywanpas, iñiq t'aqapi kaqkuna entiendinankupaqmi, aswanpas phisqa simikunallata yuyayniywan rimaykuytaqa munani. Chay hinapitaqmi wakinkunamanpas yachachiytaqa atini.
[20] Wawqe-panaykuna, ama yuyaykukuyniykichispiqa wawallaraqchu kaychis. Aswanpas mana allin kaqkunapaqyá wawallaraqqa kaychis. Yuyaykukuyniykichispitaq ichaqa, wiñasqaña kaychis.
[21] Kamachikuy Simipin qelqasqa kashan: ‘Señormi nin: “Wak simi rimaykunapin, hinallataq wak runakunaq chawpintan kay llaqtataqa rimaykusaq. Hinan chaywanpas manapuni uyariwanqakuchu,” nispan,’ nispa. (Isa. 28:11-12)
[22] Wak simi rimaykunaqa, manan iñiqkunapaq señalchu, aswanpas mana iñiqkunallapaq señalmi. Diospa rantinpi rimasqan ichaqa, manapuni mana iñiqkunapaqchu, aswanpas iñiqkunallapaqmi.
[23] Llapan iñiq t'aqa, huk cheqasllapi huñuykusqa, hinallataq llapanku wak simi rimaykunapi rimaspa kashankumanmi. Chay cheqasmantaq, pisi yuyayllayoq runakunaqa, otaq mana iñiq runakunapas haykumunmanmi. Sichus chay hina kanman chayqa, ¿manachu paykunaqa ninkuman: ‘Llapankupas waq'ayasqamá kashanku,’ nispanku?
[24] Llapankupas, Diospa rantinpi rimay simikunata rimankumanmi. Hinaspataq huk mana iñiq runa, otaq pisi yuyayllayoq runa chayman haykumunmanmi. Sichus chay hina kanman chayqa, llapanku rimaykuspankun payta uyachinqaku. Hinallataqmi, llapanku payta chaninchanqaku.
[25] Chay hinapitaqmi Diosqa chay runaq sonqonpi pakasqa kaqkunata rikuchinqa. Chay hinapitaq, pampakama k'umuykukuspa, Diosta yupaychaspan sut'inchanqa. Ninqataq: ‘¡Cheqaqtapunin Diosqa qankunawan kashan!’ nispa.
[26] Chay hinaqa, wawqe-panaykuna, ¿imanisunchistaq? Huñuykunakuqtiykichisqa, sapanka hukniykichispan salmo takin kan, otaq yachachikuyninpas kan, otaq wak simi rimayninpas kan, otaq rikuchiyninpas kan, otaq wak simita sut'inchayninpas kallantaq. Tukuy chaykunataqa, iñiq t'aqata wiñachinanpaqpuni ruwaychis.
[27] Sichus pipas wak simi rimaypi riman chayqa, iskaylla, otaq kinsalla, ch'ulla-ch'ullallamanta rimachunku. Huktaq, chay rimasqanta sut'inchachun.
[28] Sitaqchus sut'inchaq mana kanchu chayqa, iñiq t'aqapi ch'inlla kachun. Hinaspataq pay kikillanpaq, hinallataq Diosllapaq sonqonpi rimachun.
[29] Chay hinallataq, Diospa rantinpi rimaqkunapas kan chayqa, iskaylla otaq kinsalla rimachunku. Wakinkunataq rimasqankuta chaninchachunku.
[30] Sitaqchus chaypi tiyashaqman Diosqa imatapas rikhuriypi rikuchin chayqa, ñawpaq kaq rimaqqa upallachun.
[31] Llapanku yachanankupaq, hinallataq llapanku kallpanchasqa kanankupaq, ch'ulla-ch'ullallamanta profetisaytaqa llapankupas atinkun.
[32] Diospa rantinpi rimaqkunaq espiritunkuqa, Diospa rantinpi rimaqkunaman kasukuspan kashanku.
[33] Diosqa manan pantanachiq Dioschu, aswanpas thak kay Diosmi. Chay hinallataqmi, llapan t'aqasqakunaq iñiq t'aqankupipas kanan.
[34] Warmiykichiskunaqa, iñiq t'aqa huñukuypi manan rimayta atinkumanchu. Aswanpas, imaynan Kamachikuy Simipas nin, chayman hina kasukuspa kachunku. Chayrayku warmikunaqa, iñiq t'aqakunapi upallalla kananku.
[35] Huñunakuyniykichispi, huk warmiq rimayninqa millaymi. Chayrayku, sichus imallatapas yachakuyta munanku chayqa, wasipiña qosankuta tapukuchunku.
[36] ¿Qankunamantachu Diospa siminri lloqsimurqan? Otaq, ¿qankunallamanchu Diospa siminqa chayamurqasunkichis?
[37] Sichus pipas Diospa rantinpi rimaq kasqanta, otaq espiritual runa kasqanta yuyaykukun chayqa, qankunaman qelqamusqaytaqa, Señorpa kamachikuyninkuna kasqanta yachachun.
[38] Ichaqa sichus pipas mana yachanchu chayqa, hina mana yachaqlla qhepakuchun.
[39] Chay hinaqa wawqe-panaykuna, profetisaytayá maskhaychis. Amataq wak simipi rimaqkunataqa hark'akuychischu.
[40] Llapantataq ichaqa, sumaqtapuni, hinallataq chaninninpipuni ruwaychis.