[1] Ñoqa Pabloqa, Diospa munayninman hina, Jesucristoq apostolninmi kani. Wawqe Timoteopas ñoqawanmi kashan. Hinan Korinto llaqtapi kashaq Diospa iñiq t'aqanmanwan, Akaya probinsiantinpi kashaq llapallan t'aqasqakunamanwan qelqamuykichis.
[2] Dios Yayanchispa, hinallataq Señor Jesucristoq allinpaq qokuyninpas, thak kayninpas qankunawanpuni kachun.
[3] Señorninchis Jesucristoq Yayan Diosqa saminchasqapuni kachun. Yanapaykukuqpuni Yayaqa, hinallataq tukuypi sonqochaykukuq Diosqa paymi.
[4] Tukuy ñak'ariyninchiskunapi sonqochawaqninchisqa Paymi. Imaynatachus Diosqa sonqochawanchis, chay hinallatataqmi ñoqanchispas tukuy ñak'ariypi kashaqkunatapas sonqochayta atisunman.
[5] Imaynan Cristoq ñak'ariyninkuna ñoqanchispi llimp'arishan, chay hinallataqmi kikin Cristoq chawpintapuni ñoqanchispa sonqochayninchispas llimp'arishan.
[6] Ichaqa sichus ñoqaykuta ñak'arichiwanku chayqa, qankunata Dios sonqochanasunkichispaq, hinallataq qespichinasunkichispaqmi ñak'arichiwanku. Otaq, sichus sonqo- chasqaña kayku chaypas, qankuna sonqochasqa, hinallataq qespichisqa kanaykichispaqmi sonqochasqaqa kayku. Kasqan ñoqaykuq ñak'ariyllaykutataq qankunapas kallpawan muchukunaykichispaqmi, chayqa ruwasqa karqan.
[7] Imaynan qankunaqa ñak'ariqmasiykuna kankichis, chay hinallataqmi ñoqaykuwan kuska sonqochasqa kallankichistaq. Chaytan yachayku. Chayraykun qankunamanta suyakuyniykuqa allin takyasqapuni kashan.
[8] Sinchi ñak'ariykunawanmi manaña kallpaykupas karqanchu. Hinan manaña kawsanaykupaqpas yuyarqaykuñachu. Chayraykun wawqe-panaykuna, Asia probinsiapi imaymana ñak'ariykuna hamuwasqankutaqa yachanaykichistapuni munayku.
[9] Ichaqa wañuchinapaqña kasqaykutan yuyarqayku. Chaymi manaña ñoqaykupi sonqo churayniykuqa karqanchu. Aswanpas wañusqakunata kawsarichiq Diosllapiñan sonqo churayniykuqa kasharqan.
[10] Diosmi haqaynaniraq wañuymanta kacharichiwarqanku, hinallataq kacharichishawankupas. Wañuymanta kacharichiwanankutapas payllapitaqmi suyakushayku.
[11] Qankunapas ñoqaykupaq mañakuspaykichisqa yanapawashankikun. Chay hinapi, Diospa ruwana qowasqankumanta mayta mañakuyniykichispa chawpinta askha runakunapas Diosman grasiasta qonqaku.
[12] Ñoqaykuq rimarikuyniykuqa kaymi: Konsiensiaykun imaynatachus kay pachapi kawsasqaykuta willakun. Anchatapuniqa imaynatachus qankunaq ñawpaqeykichispi kawsasqaykuta willakun. Ñoqaykuqa ch'ulla yuyayllawan, hinallataq Diosmanta hamuq sut'i sonqoykuwanmi kawsarqayku. Manan aycha runaq yachayninman hinachu, aswanpas Diospa allinpaq qokuyninman hinan kawsarqayku.
[13] Ñoqaykuqa manan ñawinchaspaykichis, entiendisqaykichismanta wakkunatachu qelqamurqaykiku. Ichaqa, hunt'asqatapuni entiendinaykichistan suyakushani.
[14] Qankunaqa wakillantapas entiendirqankichisñan, hinan ñoqaykuqa hatunchakunaykichispaq kayku. Chay hinallataqmi qankunapas Señor Jesuspa hamunan p'unchaypi hatunchakunaykupaq kankichis.
[15] Chaypi sonqo churayniyoqmi, ñawpaqta qankunaman hamuytaqa yuyaykurqani. Chaywantaqmi iskay kutipiraq samin chayqa kapusunkichis.
[16] Hinan qankunaq kasqaykichismanta, Masedonia probinsiaman riyta yuyaykusharqani. Masedonia probinsiamantataq wakmanta qankunaman kutimuyta yuyaykusharqani. Hinaspataq Judea probinsiaman rinay ñanman churaykuwanaykichispaq yuyaykusharqani.
[17] ¿Chayta yuyaykuspayqa, munayniyman hinalla ruwanaypaqchu yuyaykunkichis? Icha, ¿imatachus ruwayta munaspa, ‘arí’ nisqaypas, otaq ‘manan’ nisqaypas aychaman hinalla yuyaykusqayqa kananpaqchu yuyaykunkichis?
[18] Ichaqa, imaynan Diosqa hunt'aqllapuni, chay hinallataqmi ñoqayku qankunaman ‘arí,’ nispa, otaq ‘manan,’ nispa nisqaykuqa manan kanmanchu.
[19] Silvanopas, Timoteopas, hinallataq ñoqapas Jesucristoqa Diospa Churinpuni kasqantan qankunaman willarqayku. Willakuyniykuqa manan ‘arí,’ nispa nisqachu, nitaq ‘manan,’ nispa nisqachu karqan. Aswanpas Jesucristopi ‘arí,’ nispa nisqallapunin karqan.
[20] Diospa tukuy promesankunaqa Jesucristopin ‘arí,’ nispa nisqallapuni kashan. Chay hinaqa, Jesucristollapitaqmi ‘ahinapuni kachun,’ nispa niypas kashan. Hinan runakunaqa ñoqaykuq chawpiykuta Diosta yupaychanqaku.
[21] Diostaqmi, ñoqaykuta qankunatawan kuska Cristopi takyachiqniykuqa. Payllapunitaqmi hawiykuqniykupas.
[22] Hinallataq sellowan selloqninchispas paymi. Espirituta sonqonchispi garantiata churaqninchispas payllataqmi.
[23] Ñoqaqa almaypa testigon kananpaqmi Diosta waqyakuni. Qankunata mana llakichinayraykutaqmi manaraq Korinto llaqtamanqa hamunichu.
[24] Iñiyniykichishawataqmi, qaqa takyasqa kashankichis. Chayraykun mana iñiyniykichismantachu munaychakushaykuqa. Aswanpas kusikunaykichispaq yanapaykuqkunan kayku.